Skopje East Gate (поранешно ERA City)

Македонски градежни фирми ќе ја градат инфраструктурата и деловниот центар од огромниот проект наречен град во град - „Ера сити“, кај Скопски саем. Словенечките директори велат дека битката за зделката вредна 40 милиони евра е во завршница. Во игра се речиси сите поголеми градежни компании од земјава. Според информациите на „Време“, победникот е веќе познат. Станува збор за скопска фирма што располага со голема градежна оператива и работи на повеќе проекти надвор од земјава. - Селекцијата се прави по основа на квалитет, на материјали за изградба, па потоа по цена и услови на плаќање - вели Петер Тршан, директор во групацијата „Ера“, посочувајќи дека критериумите биле по европски стандарди. Дел од градежните фирми што ги консултираше „Време“ велат дека се работи за строги критериуми за изборот на компанијата што ќе ја реализира првата фаза. Останува отворено прашањето дали македонските фирми ќе добијат и дел од планираните изградби во наредната фаза, проценети на 110 милиони евра. - Имаме намера да соработуваме со фирми од Македонија, но дали ќе учествуваат во изградбата на двата огромни трговски центри во рамките на „Ера сити“ ќе зависи од нивните понуди, велат словенечките директори. Изградбата на првата фаза треба да почне во март. Оваа словенечка инвестиција со месеци беше блокирана. Сопствениците на Скопски саем не можеа да обезбедат комплетна градежна документација поради административно-бирократски бариери. Изградбата на деловно-трговскиот комплекс кај Саемот ќе чини 150 милиони евра. Објектите ќе бидат на површина од 157.000 квадратни метри. Според планираната динамика - комплексот треба да биде изграден за пет години, а инвестицијата да донесе 800 нови вработувања.

Македонски конзорциум ќе го гради „Ера Сити“

Конзорциумот на македонски изведувачи предводени од „Гранит“ е избран за најдобар понудувач на тендерот за изградба на комплексот „Ера Сити“ на словенечката Групација ЕРА, што во наредните пет години треба да се изгради на просторот кај Скопски саем.

„Предноста за изведување на градежните работи ја доверивме на најдобриот понудувач кој обезбедува висок квалитет на градежни работи. Понуди испратија градежни компании од Македонија и ЕУ, меѓутоа, инвеститорот сепак на крајот се одлучи за конзорциум на домашни, односно македонски изведувачи кои ги предводи „Гранит“ како носител на работата“, велат од ЕРА.

Според најавите од компанијата, денеска ќе започне изградбата на комуналната инфраструктура и на комерцијално-деловната зграда, која претставува приоритетен објект од целокупниот комплекс „Ера Сити“.

Таа треба да биде готова за една година. Паралелно ќе продолжи и изградбата на комплексот и другите предвидени објекти, кои ќе бидат со различни дејности, со најсовремен деловен, трговски и забавен карактер во регионот.

„Веќе длабоко влеговме во разговори со потенцијалните партнери за двата шопинг мола, односно трговски центри. Нашата цел е до наесен со партнерите да ги договориме сите услови на заедничка изградба на двата трговски центри. Со тоа ќе постигнеме истовремено завршување на главните објекти на комплексот“, додаваат од ЕРА.

Во наредните пет години групацијата ЕРА ќе го гради најголемиот деловен комплекс според планираниот динамичен план.

Вредноста на целата инвестиција на комплексот „Ера Сити“ ќе изнесува приближно 155 милиона евра, што групацијата ЕРА ќе ги реализира преку партнерства.