МАТ под притисок да го смени името

Грчкото лоби не' уценува ако сакаме да го решиме спорот со Еуроконтрол, кој ни ги забрани летовите кон Германија и Италија поради камати на долгови направени во време на кризите во 1999 и 2001 година, велат во авиокомпанијата

Врз Македонски авиотранспорт (МАТ) се врши силен притисок од грчкото лоби да го промени името ако сака брзо да го реши проблемот со Еуроконтрол, кој им ги забрани летовите кон Германија и Италија поради долгови, велат во авиокомпанијата.

Според раководството на МАТ, забраната од Еуроконтрол и актуелната светска криза се причина за тешката финансиска состојба на редовниот авиопревозник, поради која ќе бидат принудени да отпуштат околу 40 отсто од 180-те вработени. МАТ ќе ги намалува и трошоците и со промени во флотата, при што ќе се изнајмуваат постојните авиони „бомбардиер ЦРЈ-900“ и „боинг 737-500“ и ќе се користат помали и поекономични воздухоплови.

Според раководството на МАТ, грчкото лоби е очигледно премногу силно, така што ниту обидите на МАТ ниту официјалното барање испратено од Владата до Еуроконтрол за решавање на проблемот не резултирале.

- Иако Македонија е земја-членка на Еуроконтрол, институцијата, што е преседан, не ја ни удостои Владата да и' одговори на писмото испратено на 18 декември лани. Во писмото ни се дава поддршка и се бара да се најде целисходно решение за проблемот што не ни штети само нам, туку има и директни економски последици за целото стопанство - велат во МАТ.Според првите луѓе на авиокомпанијата, долгот кон Еуроконтрол од 1,3 милион евра е врз основа на камати и датира од кризните 1999 и 2001 година, кога имаше прекини во редовните линии кон скопскиот аеродром.

Како последица од светската економска криза, МАТ се соочува со драстично намалување на патници од дијаспората, но и во ударните термини за време на новогодишните и врските празници. Ограничувачки фактор за да се зголеми бројот на патници е и визниот режим со ЕУ. МАТ лани врз основа на процените дека Македонија ќе влезе во НАТО и дека ќе има уште поголеми инвестиции, подготви деловен план за следните години со кој се предвидуваше да се зголеми флотата со нови воздухоплови.

- Намалени се деловните патувања, а и гастарбајтерите поретко доаѓаат дома. Принудени сме да ги промениме деловните планови. Досега не сме побарале парична помош од Владата, но планираме. Ќе се обидеме да опстанеме сами, но мора да го намалиме бројот на вработени за 70 луѓе - велат од МАТ.Во МАТ се надеваат на поддршка од Владата со најавените субвенции за туристичките оператори кои ќе донесат странски туристи во земјава. Раководството на компанијата потврди дека се водат интензивни разговори со странски партнер за купување на МАТ, но не открива детали во интерес на зделката.

Марјан Блажевски

Според пишувањето на српските медиуми, на овој начин МАТ ќе го подмири долгот кон ЈАТ од над 10 милиони долари

Српскиот национален авиопревозник ЈАТ ервејз наскоро ќе стане сопственик на дел од акциите на МАТ. Ова го договориле во Скопје првите луѓе на двете авиокомпании, Саша Влаисављевиќ, претседателот на Управниот одбор на ЈАТ и Златко Петровски, генералниот директор на МАТ. На тој начин МАТ ќе го подмири повеќегодишниот долг кон ЈАТ, кој надминува 10 милиони долари.

Според пишувањето на српските медиуми, постигнат е договор за стратешко партнерство, а формирана е и работна група која за 30 дена треба да процени дали ЈАТ ќе стане мнозински или малцински сопственик на македонскиот авиопревозник. Разгледувана е и можноста МАТ-овите авиони да ги одржуваат техничари на ЈАТ.
-Пазарот што МАТ го покрива има потенцијал од 600.000 патници годишно. Особено внимание обративме на потенцијалот кој МАТ го има благодарение на иселениците од Австралија и Канада. ЈАТ би можел со својата мрежа да ги покрива тие патници - изјавил Влаисављевиќ по средбата.
МАТ се наоѓа во тешка финансиска криза поради што го конзервираше еден од двата авиони и сега опслужува три дестинации - Цирих, Виена и Истанбул со само еден авион. Пред три и пол месеци ЕУРОКОНТРОЛ му забрани на МАТ да лета на дестинации во Италија и Германија поради неплатени камати што датираат од времето на воениот конфликт во Македонија. МАТ има долгови и кон Агенцијата за цивилно воздухопловство од 2 милиони евра и околу 3,8 милиони евра кон скопскиот и охридскиот аеродром.

И на ЈАТ ервејз не и цветаат рози. Компанијата лани направи загуби од околу 25 милиони евра. Според Влаисављевиќ, над 20 милиони евра се загубени поради високите цени на керозинот, а остатокот поради набавка на резервни делови. Тој очекува дека годинава, со цена од околу 40 долари за барел нафта, ЈАТ нема причина да прави загуби, а компанијата од наредната година би можела да работи со профит и со сегашната флота. Влаисављевиќ најавува скусување на трошоците преку намалување на бројот на вработени од сегашните 1.697 на 1.200. За доброволно заминување од ЈАТ со отпремина од 300 евра по година работен стаж, досега се пријавиле околу 300 вработени. Според светските стандарди, ЈАТ со постојниот број на авиони и бројот на патнички седишта, треба да има помеѓу 800 и 850 вработени. Скусување има и во платите на менаџерите на ЈАТ кои во последните девет месеци се намалени во просек од 20 до 30 проценти.
Покрај од МАТ, српскиот авиопревозник има побарувања и од компанијата Сосолисо од Нигерија, Вест африкан ерјанс од Бенин, како и од АДЦ Ерлајнс од Нигерија.

МАТ демантира, со српскиот превозник биле "стратешки партнери"
Од МАТ го демантираат пишувањето на српскиот весник "Вечерње новости", а на кои се повика ВЕЧЕР дека ЈАТ ќе го преземе МАТ поради високи долгови и камати. Од МАТ потврдуваат дека меѓу двете компании е постигната начелна согласност за стратешко партнерство што ќе претставува продолжување на претходната десетгодишна успешна соработка која извесен период била прекината поради некои отворени прашања. За тоа од двете страни биле формирани посебни работни групи.
- Стратешкото партнерство подразбира долгорочна деловно-техничка соработка меѓу двете компании во насока на користење на воздухоплови, одржување на авионите на МАТ во ЈАТ-техника, обука на кадар и заеднички комерцијални проекти со што се очекува отворање на нови дестинации и искористување на потенцијалот на двата пазари. Отворена е можноста и за учество на ЈАТ во капиталната структура на МАТ - велат од компанијата.

За влез во капиталната структура на МАТ, се заинтересирани уште две странски авиокомпании и еден инвестициски фонд и некои од овие преговори, велат од компанијата, се во завршна фаза.