Комплексот кај „Алумина“ чека маркичка

Израелските сопственици го оградија комплексот и го расчистуваат теренот, но за дозвола ќе мора да го чекаат детаљниот урбанистички план, кој со месеци е во изработка во Општина Карпош

Нема надеж дека до крајот на годинава ќе почне изградбата на луксузниот трговско-хотелски комплекс „Џи-мол“ на местото на поранешната фабрика „Алумина“, како што пред неколку месеци најавуваа сопствениците на комплексот - израелската фирма „Газит глоуб лтд“. Се' уште не е донесен детаљниот урбанистички план за тој дел од градот, иако беше на листата со приоритети на Владата, а неговото усвојување се најавуваше уште пред локалните избори, во времето на в.д. градоначалникот Сашо Димиќ.

Со проектот за „Џи-мол“, освен трговски центар, Израелците предвидуваат да изградат и две деловни кули со по 25 ката, но оваа нивна желба допрва ќе треба да се утврди со урбанистичкиот план.

- Тој се' уште е во фаза на изработка. Деталите за можностите за градба на градежната парцела ќе се дефинираат со планот - велат во Општина Карпош.

Останува нејасно дали овој план ќе биде „жртва“ на препукувањата меѓу советниците на ВМРО-ДПМНЕ со градоначалникот Стевчо Јакимовски за неколку урбанистички планови, кои беа повлечени од дневен ред пред еден месец. Објаснувањето на советниците беше дека им е потребно повеќе време за да ги разгледаат. Јакимовски ова го оквалификува како еден вид блокада, и не сакаше да одговори дали на Владата ќе и' врати со иста мера за плановите што се приоритет за неа и кои треба да се усвојат во брза постапка. Тоа се плановите за „Алумина“ и за касарната „Илинден“.

Процедурата пред усвојување на плановите, налага пред членовите на Советот прво да се најде нацрт-верзијата, да се распише јавна анкета, па потоа да се усвои планот. Имајќи ја предвид долгата процедура, ќе минат месеци додека Израелците да добијат градежна дозвола.

Тие, во меѓувреме ќе работат на отстранувањето на објектите од кругот на фабриката, за што, исто така, ќе биде потребна дозвола, но и елаборати, имајќи предвид дека се работи за голем комплекс.

- За добивање одобрение за отстранување на постојните објекти на теренот, инвеститорите имаат обврска да приложат проекти за уривање и за расчистување на теренот, како и планирано одвезување на градежниот отпад - објаснуваат од Општината.

Како што е познато, израелската фирма „Газит глоуб лтд“ имотот од 150.000 квадратни метри го купи на јавна лицитација во 2007 година за 19 милиони евра.

Неодамна, имотот на поранешната фабрика беше ограден со лимена ограда, па граѓаните помислија дека почнуваат градежните работи. Во внатрешноста на комплексот се гледаат машини, но со нив сега само се испитува почвата и се расчистува дел од теренот. Од Општината потврдуваат дека се работи на поситни интервенции и додаваат дека Израелците уредно си платиле и данок на имот.

Од Карпош не прецизираат кога планот ќе се најде на дневен ред на Советот. Велат дека тој е дел од Програма за приоритетни планови на Владата и дека во постапката ќе има приоритетен третман.

Оттаму потенцираат дека еден од главните услови за издавање дозвола за градба е паркирањето да биде решено во рамките на градежната парцела. Според проектот на компанијата, во рамките на парцелата се предвидени 2.500 паркинг-места.

Компанијата „Газит глоуб лтд“ ја купи „Алумина“ на јавно наддавање и за неа плати 20 отсто повеќе од почетната цена, односно 22 милиона евра со пресметан ДДВ. Планираната инвестиција е околу 100 милиони евра. Ова е еден од трите проекти кои „Газит глоуб“ планира да ги гради во Македонија со вкупна вредност од 200 милиони евра.

Јорданка Ивановска

http://dnevnik.com.mk/?ItemID=8CAC055BFFF3294AB8A16FE180546830

Зграда од 105 метри среде Алумина

Објектот треба да биде хотел, но се остава можност инвеститорот да направи и станбена зграда, ако не сака да се занимава со угостителство