Соравиа центар

Ексклузивниот „Соравија центар“ ги отвори вратите

Австријците го купија објектот за 10,3 млн. евра и во неговото опремување вложија дополнителни 20-ина милиони

Билјана Ангеловска

Македонскиот бизнис центар, ексклузивниот „Соравија центар“ од вчера ги отвори вратите за нашите граѓани. Австриската корпорација „Соравија груп“, која е сопственик на луксузниот објект, го опреми центарот по највисоки светски стандарди.

Објектот има површина од близу 13.000 квадратни метри на 12 ката, од кои првите четири се трговски простор наменет за продавници, додека горните катови претставуваат софистициран деловен простор со модерно опремени канцеларии со најсовремена климатизација, вентилација, брзи лифтови и 24-часовно обезбедување. Во подземјето на објектот има паркинг на четири нивоа со 110 места за паркирање.

Во шопинг-центарот, на 4.000 квадрати кои се поврзани со ГТЦ, ќе се најдат бројни бутици, кафетерии и кафулиња. „Фешн груп“ користи дел од просторот во кој ќе се продаваат над 30-ина познати светски брендови. На околу 8.000 квадратни метри на горните катови се наоѓа модерен деловен простор од висока категорија, најсовремено опремен и со услови за регионална и прекуокеанска конференциска комуникација. Просторот ќе го користат познати светски фирми, најголем дел од нив клиенти на „Соравија“ во нејзините објекти низ Европа, како „Мобилком Австрија“, ВИП, Светска банка, „Сони“ и други меѓународни корпорации и организации.

И продавниците во шопинг-центарот и канцелариите нема да се продаваат, туку ќе се изнајмуваат. Деловниот простор ќе се издава по цена од 20 евра за квадратен метар, додека дуќаните по околу 40 евра за квадрат, во зависност од местоположбата.

Во преуредувањето и обновувањето на внатрешноста на објектот „Соравија“ вложи повеќе од 20 милиони евра. Во периодот кога Австријците ја купија зградата, таа беше градена според сега веќе застарени стандарди. Токму од тие причини беа потребни големи средства, но и време за објектот да се трансформира во современ деловен простор каков што бараат големите фирми и компании.

Еден од сопствениците на австриската корпорација и член на одборот на директори Хано Соравија изрази задоволство од условите на работа во Македонија и во Скопје. На завчерашното свечено отворање на центарот, тој го најави и новиот инвестициски проект на „Соравија груп“, резиденцијалната населба Олимписко село. Инаку, „Соравија груп“ е компанија со стогодишна деловна историја и е една од водечките компании на пазарот на неподвижен имот во Централна и во Источна Европа. Меѓу нејзините клиенти се синџирот хотели „Хилтон“, потоа „Лафарџ“, „Прајс вотерхаус“, ЦАП, „Есприт Њу Воркер“ и други.

Објектот на Бизнис-центарот, кој во почетокот имаше лиценца на Светскиот бизнис-центар, почна да се гради во 1994 година како заедничка инвестиција на тогашниот ПУИГ, сега Јавно претпријатие за станбен и деловен простор и приватната фирма „Јукан инженеринг“. Меѓутоа, по извесен период соинвеститорството се соочи со нерешливи проблеми, па во 2001 година Јавното претпријатие му исплати на „Јукан“ 6,5 милиони марки, колку што изнесуваа неговите вложувања, со што стана единствен сопственик на Бизнис-центарот.

Сепак, изградбата не продолжи и така недоизграден објектот беше пуштен на продажба на првата лицитација во 2002 година. На тендерот се јави само еден купувач, швајцарската корпорација „Нигл груп“, која понуди 10,8 милиони евра, но иако потпиша преддоговор, не ја уплати бараната гаранција. Подоцна, во 2005 година имаше уште еден неуспешен обид за продажба и тоа по иста цена, додека на следната лицитација, вредноста на објектот беше намалена за 10 проценти. Но, и тоа не беше доволно да се продаде. Четврти пат Бизнис-центарот се продаваше во декември 2005 година, со почетна цена од 8.720.000 евра, но лицитацијата беше поништена поради инсистирањето на лицитантите заедно со објектот да го купат и земјиштето под него, што тогаш не беше предвидено со тендерската постапка.

Потоа, на 15 февруари 2006 година следуваше уште една, петта лицитација, на која центарот го купи австриската фирма „Соравија Баутрегег“ за 10,3 милиони евра. Тоа беше за 1,6 милиони евра повеќе од сумата што ја понуди Владата, а во пакет го продаде и земјиштето под него за 66.650 евра. Тогаш, во трка за Бизнис-центарот, заедно со „Соравија“ беа и фирмите ЛБИС ДООЕЛ од Скопје и „Робул Бетелигунс“ од Австрија.

http://utrinski.com.mk/?ItemID=C99B495CB98CD24090AE642786BC9194

Зградата на центарот Соравија, поранешен Светски бизнис центар, денеска ги отвора вратите за граѓаните. Австриската компанија Соравија груп, завчера, со голем огномет го најави официјалното профункционирање на новиот трговски и деловен центар во Скопје. Оваа атрактивна зграда на почетокот на 2007 година беше продадена на лицитација на Соравија груп за 10, 3 милиони евра. Питер Рот, менаџер на Соравија-центарот рече дека Македонија покажа оти има срце за сериозни странски инвеститори.

- Реализацијата на Соравија центарот е пример дека се е можно ако се сака - рече Рот.
На свеченоста присуствуваа министрите за финансии и за економија Трајко Славески и Фатмир Бесими, кој во кусото обраќање пред присутните, истакна дека Владата спроведе крупни реформи за да ја направи Македонија посакувана бизнис дестинација за странските инвеститори.
Хано Соравиа, еден од сопствениците на Соравиа груп и член на Бордот на директори, изрази задоволство од условите за работа во Македонија, градот Скопје и од македонската Влада и го најави следниот инвестициски проект во Македонија - резиденцијалната населба Олимписко село на падините на Водно.

Во приземниот дел и до ниво на Градскиот трговски центар на 4.000 квадратни метри се сместени локалите што Австријците ги имаат издадено под наем. Погорните катови од оваа атрактивна зграда, или околу 8.000 квадрати, се наменети за канцеларии. Центарот располага со стотина подземни паркинг-места, брзи лифтови, независно снабдување со електрична енергија, климатизација.

http://vecer.com.mk/?ItemID=514731674B2B4849A66200C9BB975884