Новогодишно украсување

НОВОГОДИШНОТО УКРАСУВАЊЕ ГОДИНАВА НЕМА ДА ДОЦНИ

Скопје ќе се накити со елка и со илјадници светилки

Неизвесно е кој ќе настапи на традиционалниот дочек на Новата година, оти Градот се' уште бара донации за да донесе светска ѕвезда

Новогодишното украсување на Скопје годинава нема да доцни, туку ќе биде завршено до 15 декември, уверуваат градските власти. Со проектот за светлосна декорација на градот е предвидено да се украсат плоштадот Македонија, улиците 11 Октомври, Васил Аџиларски, Даме Груев, Димитрије Чуповски, булеварот ВМРО и просторот пред Судска палата.

- Со идејниот проект за дочекот на Новата 2008 година е предвидено Скопје да биде украсено цел месец, односно од 15 декември до 15 јануари следната година. На плоштадот ќе биде поставена елка висока15 метри, направена од вештачко зеленило. Таа ќе биде украсена со 50 илјади светилки и блицеви во бела боја. Исто така, ќе бидат украсени канделабрите и ќе бидат поставени сцена и осветлен портал - изјавија од Градот.

Освен главните улици во центарот на Скопје, во план е да се украсат и други улици, и тоа со ѕвездено небо, декорации на дрвјата и бандерите, како и со светлосни мрежи и завеси.

За реализација на традиционалниот дочек на Новата година на плоштадот, годинава од Градот Скопје распишале два конкурса. Едниот е веќе завршен, а се однесува на изработка на идеен проект за дочек на Новата 2008 година.

- За најдобро идејно решение за новогодишната ноќ е избрана фирмата „Баги комуникации“, зашто според мислењето на комисијата, овој проект ги задоволува сите пропишани критериуми. Нуди оригинално и унифицирано решение за украсување на централното градско подрачје, како и новини во културно-забавната програма, која опфаќа дневни манифестации за најмладите и вечерни програми за граѓаните во предновогодишниот перид, но и во деновите по празниците - објаснуваат градските власти.

Вториот конкурс е распишан за избор на фирма што ќе го реализира овој проект, и тој е во тек. За украсување на градот се одделени околу 4,8 милиони денари од буџетот на Скопје. Градските власти велат дека оваа сума е мала за вака голем настан, па ги повикуваат сите заинтересирани големи фирми да се вклучат со донации за да се спроведе новогодишната програма.

- Атрактивноста на програмата ќе зависи многу и од интересот на големите компании да спонзорираат гостување на голема светска музичка ѕвезда или група, со алтернатива да се реализира програма со учество на наши уметници и групи. За жал, во последните години интересот на големите спонзори е значително намален - велат во град Скопје.

Лани доцнеше новогодишното украсување на Скопје, па празничната атмосфера во градот се почувствува само неколку дена пред дочекот на Новата година.

(Ј.И.)