Аеродроми

ЖАН ДИНАН, ДИРЕКТОР ВО КОМПАНИЈАТА „ЕГИС ПРОЖЕКТ“

Ќе донесеме евтини авиокомпании во Македонија

Клучна цел на нашиот проект е да го направиме летањето достапно за сите, а тоа може да се постигне ако се соз адепоголема конкуренција

Европскиот конзорциум „Егис прожект“ е една од четирите фирми што се квалификуваа за учество на тендерот за земање под концесија на македонските аеродроми. Проект-директорот во „Егис“, Жан Динан, вели дека инвестирањето во аеродромите „Александар Велики“ и „Св. Апостол Павле“ се вклопува во нивните стратегиски определби. Засега не открива колку ќе вложат во модернизација на двата аеродрома и во изградба на карго-аеродром во Штип бидејќи тендерската постапка се' уште трае. Една од целите на „Егис“ е да донесе евтини авиокомпании во Македонија, кои ќе ги намалат цените на авионските билети. Клучна цел на нашиот проект е да го направиме летањето достапно за сите. Тоа може да се постигне само ако се создаде поголема конкуренција и во Македонија ако дојдат евтини авиокомпании. Досега овие компании речиси ги игнорираа македонските аеродроми, што негативно се одразува врз цената на авиобилетите. Со сличен проблем се соочивме и на марсејскиот аеродром. Цените на авиобилетите беа превисоки и патниците често како превозно средство користеа воз. Сега една од овие компании очекува да превезе еден милион патници за само една година. Евтините авиокомпании на македонските аеродроми не само што ќе овозможат поголем број патници од земјава да летаат поевтино до повеќе европски и светски градови туку ќе придонесе и за унапредување на туризмот во Македонија. Благодарение на нив поголем број туристи ќе може да престојуваат во земјава.

Развој на „Бунарџик“

*Во конкуренција за земање на аеродромите под концесија се уште три меѓународни компании. Што предвидува Вашата понуда за да ги победи другите?

- „Егис“ во последните неколку години работеше на 1.000 проекти во 140 земји. Деловната стратегија на компанијата е експанзија преку обезбедување инженерски решенија за инфраструктурни и градежни проекти во сите делови на светот. Првичниот контакт со Македонија го имавме во 2005 година како носители на проектот за регионални патишта, кој се спроведува преку Министерството за транспорт. За овие неколку години добро ги научивме условите, правилата и олеснувањата за странските инвеститори. Остварената формална соработка со неколку градежни компании од Македонија ни овозможува уште подобро да се запознаеме со деловните обичаи во земјата. Имајќи предвид дека аеродромот „Александар Велики“ е на само три километри од слободната економска зона „Бунарџик“, нашата понуда ќе вклучи изградба на инфраструктура што индиректно ќе овозможи развој на зоната и ќе обезбеди полесен развој на инвестициите во „Бунарџик“. Досегашното искуство во изградба на автопатишта и други инфраструктурни објекти во Австралија, Германија, Австрија, Франција, Кореја и во други земји ќе ни биде од голема помош за исполнувањето на овие планови.

*Модернизацијата на двата аеродрома предвидува изградба на повеќе објекти. Колку овие градежни зафати ќе ги направат аеродромите во Скопје и во Охрид современи и функционални?

- Инвестицискиот план на „Егис“ вклучува изградба на потребната аеродромска инфраструктура и на споредни објекти и патишта, кои ќе овозможат ефикасно функционирање на аеродромите во земјата. Во светот авионскиот сообраќај бележи рапиден пораст, особено во земјите во развој. Обврска на компаниите што управуваат со аеродромите е да го следат и да го предвидат овој пораст. Овие трендови наметнуваат аеродромите да бидат подготвени да примат поголем број авиони, патници и карго-сообраќај. Во наредните неколку години очекуваме трендот на пораст на сообраќајот во авионската индустрија да се почувствува и на аеродромите во Македонија. Сметаме дека досегашниот аеродромски капацитет е целосно искористен и затоа се потребни инфраструктурни зафати. Сега на аеродромите во Македонија се нудат само неколку основни патнички и карго-услуги, а во иднина очекуваме нивниот број да се зголеми. Но, не е се' во порастот. Мора да се земат предвид и безбедноста и сигурноста на аеродромите. „Егис“ работи на истражување и развој на безбедносни производи за потребите на Меѓународната организација за цивилно воздухопловство. Врз таа основа планираме македонските аеродроми да прераснат во модел за безбедност и сигурност и да бидат управувани според нови светски стандарди.

Соработка со домашни фирми

*Споменавте соработка со домашни компании. Со кои фирми планирате да работите и за кои проекти?

- За проектот за стопанисување со македонските аеродроми „Егис“ веќе има склучено два ексклузивни договора со „Гранит“ и со „Давос“. Се решивме на ваков чекор зашто и двете страни може да извлечат голема корист. За вашата земја тоа значи задржување на капиталот и отворање нови работни места, а ние како инвеститори добиваме локална експертиза која само домашните компании може да ја понудат и обезбедат. Во сите земји каде што инвестираме никогаш не ја потценуваме вредноста на експертизата на домашните подизведувачи.

*Имаше многу полемики за тоа дали треба да се
 гради карго-аеродром во Штип. Дали ова е
 исплатлива инвестиција?

- Потребата за развој на карго-индустријата е најчесто предизвикана од зголемената трговска размена со други земји. Одлуката на македонската влада да изгради карго-аеродром во Штип зборува за еден економски модел што Македонија сака да почне да го применува. Земјата располага со поволна географска положба за да привлече и да пренесе карго од регионот до земјите на ЕУ, иако и врските со Кина не се помалку значајни. Изградбата на инфраструктурата околу Штип ќе биде клучен фактор за развој на аеродромот. Во Македонија се воведуваат промени, како што се проектите за транспортна инфраструктура финансисрани од ЕУ (ЕГ ИПА, ЕРДФ и други), за кои се очекува да го олеснат развојот на карго-превозот.

Спасијка Јованова