Телеком арена (арена Филип II Македонски)

Шпанија го потврди гостувањето во Скопје

Неизвесноста за гостувањето на актуелниот европски фудбалски првак Шпанија, во Скопје, на 12 август, на тест-меч со Македонија, од вчера е симната од дневен ред. ФФМ официјално го потврди играњето на овој контролен натпревар што одамна го најавува, откако доби писмена потврда од Мадрид. Натпреварот, кој ќе предизвика голем интерес во Македонија и поблиското соседство, ќе се одигра на реконструираниот Градски стадион во Скопје, со почеток во 22 часот. Овој меч треба да биде и централна манифестација во деновите за одбележување 100 години од играњето фудбал во Македонија.

До 12 август, Јавното претпријатие што го стопанисува стадионот „Филип Втори“ ќе треба да ја заврши северната трибина, со покрив, столчиња и да го комплетира осветлувањето. Поттрибинскиот простор ќе продолжи да се гради и по овој термин.

Составот на Шпанија, кој триумфира на последното ЕП изминатата година и неодамна заврши како третопласиран на Купот на конфедерациите, е вистинскиот противник за одбележувањето на стогодишнината на мак-фудбалот. Шпанија вторпат ќе гостува во Скопје. Македонија и „црвената фурија“ одиграа два квалификациски натпревара во групата од еврозоната за учество на ЕП-96. Двата натпревара ги доби фаворитот Шпанија, во Скопје (0-2) и во Елче (0-3).