Ако знаеме дека во минатите години имавме огромни проблеми со пожарите и појдовниот проблем беше нивното лоцирање, сега со овој систем убеден сум дека ќе имаме ефикасност и навременост на предвремено отстранување на овие катастрофи со кои изгубивме голем број на шуми низ Македонија, рече Спасеновски

Радиоспектометри со сателитска поддршка кои детектираат чад, зголемена топлинска енергија пропратена со моментална слика ќе ги чуваат шумите во земјава. Ова беше речено на вчерашната прес-конференција во УХМР на која министерот за земјоделие Ацо Спасеновски и директорот на Управата за хидрометерологија Ѓорѓи Котев ја презентираа новината која од деновиве ќе се инсталира во просториите на заводот.
- Досега ако имаше конвенционален пристап на местата зафатени со пожари сега тоа ќе се прави со помош на сателитски сигнал како што се прави во сите институциолошки хидрометеоролошки заводи во Европа и во светот. Начинот на примената на овој систем се состои од добивање повратен сигнал од МетеоСат, светската агенција за хидрометеорологија, која од деновиве ќе ни праќа информација, која пак ќе содржи прецизна слика, и ќе алармира доколку сателитот забележи зголемување на топлина на критичен регион насекаде низ земјава, рече директорот Котев.
- Ако знаеме дека во минатите години имавме огромни проблеми со пожарите и појдовниот проблем беше нивното лоцирање, сега со овој систем убеден сум дека ќе имаме ефикасност и навременост на предвремено отстранување на овие катастрофи со кои изгубивме голем број на шуми низ Македонија. Со ова ќе се намали материјалната штета и ќе се запре економскиот импакт кој го претрпуваме како ефект од уништените шуми.

Министерот Спасеновски информираше дека ова ќе биде дел од олеснителните и превентивните мерки кои министерството ќе ги преземе во наредниот период, се со цел да биде навремено подготвено за претстојниот критичен летен период. Тој најави и привршување на постапката околу набавка на хидроавионите Канадери, кои според него би требало да бидат достапни во текот на годинава.

Припадниците на Противпожарната бригада добија нова опрема за лична заштита, што им ја додели Градот Скопје. На свеченото примопредавање во Автокоманда, градоначалникот Трифун Костовски симболично направи смотра на бригадата.

Костовски нагласи дека ПП-бригадата мора да се гради според европски принципи, а за таа цел последниве три години Градот издвојува средства од буџетот. Во тој правец се и набавките на модерни противпожарни возила. Но, покрај опремата, Костовски ја нагласи и потребата од кадровската подготвеност, за што тој лично смета дека Министерството за образование треба да обезбеди студии за пожарникари, со цел овие кадри да одговорат на поставените задачи.

Благоја Менковски, командант на бригадата, потенцираше дека објектот на бригадата е реновиран по 30 години и притоа се обезбедени добри услови за работа. Две специјални противпожарни возила и автомеханичарски скали се последната донација што ја добиле од збратимениот град Нирнберг, а се надева дека годинава единицата ќе купи едно ново противпожарно возило. (Сн.К.)