Когенеративни електрани (Термоелектрани-Топлани)

По години на стагнација и неинвестирање во енергетиката, конечно никна нов енергетски капацитет во Македонија. Когел Север е првата централа во земјава што ќе произведува комбинирано топлинска и електрична енергија на природен гас. Таа треба да ја намали увозната зависност од струја. Произведената енергија ќе биде понудена на домашниот пазар, но и ќе се извезува.

- Оваа електрана во целост се вклопува во напорите на Владата за привлекување инвестиции и проширување на капацитетите на електроенергетскиот систем. Ваквите инвестиции за нас се охрабрување за натамошно олеснување на условите за стопанисување, за водење бизниси и континуитет на соработката со јавниот сектор. Тие се и добар показател за мерките на Владата за ублажување на глобалната криза, рече Премиерот Никола Груевски.

- Централата е прв комерцијален проект за комбинирано производство на електрична и топлинска енергија на природен гас, кој е во целост изведен во рамките на интернационалниот “механизам за чист развој” (ЦДМ) согласно Кјото протоколот за заштита од климатски промени, вели Александар Гечовски, директор на Когел Север.

Дваесет милиони евра се инвестирани во централата лоцирана во комплексот на Железара. Инвеститор е домашната фирма Когел блиска до РЖ услуги. Комбинираниот енергетски капацитет ќе работи на природен гас со инсталирана моќност од 30 мега вати електрична и речиси 14 мега топлинска енергија.

Во националната енергетска стратегија што ја изработи МАНУ а која се уште не се објавува се потенцира неопходноста од нови енергетски капацитети кои треба да ги заменат старите и дотраени и да ја намалат увозната енергетска зависност. Академиците препорачуваат и да се зголеми цената на електричната енергија за да се привлечат инвестиции во овој сектор.