Црква на Плоштад Македонија

МПЦ треба да плати симболични 44.225 евра за црквата на плоштад!

Во епицентарот на државата квадрат државна земја за верските заедници чини само 1.800 денари

Деспина Трајковска

Македонската православна црква на државата ќе треба да и' плати минимални 44.225 илјади евра за најатрактивната парцела од 1.525 метри квадратни на скопскиот плоштад за изградба на црквата „Свети Константин и Елена“.

Министерството за транспорт и врски вчера за „Утрински весник“ изјави дека оваа сума на МПЦ ќе и' ја пресмета врз основа на Уредбата која го регулира начинот на отуѓување државно земјиште. Иако за актуелната Влада продажба на државна земја во четири очи е непопуларна и неприменлива мерка, во случајов таа ќе направи исклучок оти станувало збор за верска заедница. Освен непосредната спогодба, цената за МПЦ е и со бенифицирани услови, имајќи ги предвид пазарните цени за ваква локација.

„Утврдувањето на цената за отуѓување градежно неизградено земјиште, сопственост на Република Македонија, се врши во согласност со важечката Уредба за начинот и постапката на отуѓување. Согласно со оваа Уредба, цената за отуѓување градежно неизградено земјиште, кое согласно со Детален урбанистички план е предвидено за изградба на верски објект, изнесува 1.800 денари по квадратен метар. Со непосредна спогодба, државното градежно земјиште се отуѓува и се дава под долготраен закуп во случај и за потребите на верските заедници за изградба на верски објекти предвидени со урбанистички планови. Со ДУП е предвидена изградба на црква на државно земјиште со вкупна површина од 1.525 квадратни метри“, информираа вчера од ресорното министерство.

Оттаму тврдат дека и досега било постапувано по барања од страна на верски заедници кои го оствариле правото на отуѓување градежно земјиште по пат на непосредна спогодба, но конкретно не информираа за таков случај.

Црковните власти вчера останаа без одговор дали располагаат со потребниот буџет за купување на земјиштето и од каде ќе ги обезбедат милионските суми за изградба на верското здание. Ниту од Скопската епархија, ниту, пак, портпаролот на Синодот, владиката Тимотеј, немаше време да разговара на оваа тема. Неодамна за „Утрински весник“ од Скопската епархија накусо рекоа оти се убедени дека потребните пари ќе ги соберат преку донации.

Инаку, како што тврдат од Министерството за култура, кое до неодамна беше одговорно за проектот, се' уште трае постапката за префрлање на неопходната документација на адреса на црковните власти со што МПЦ и официјално ќе стане одговорна за возобновување на храмот.

„Согласно со заклучокот на Владата, формирани се комисии со членови од Министерството за култура и Македонската православна црква, кои до крајот на неделава треба да извршат примопредавање и преземање на документацијата, со записник“, изјави вчера Анита Јовановска, портпаролка во Министерството за култура. Практично, тоа значи дека уште извесен период МПЦ како субјект на која со владина одлука и' е префрлена целата надлежност за овој проект нема да можат да ја поведат постапката за купување на земјиштето, па затоа и никој не сака да лицитира со рокови за почеток на изградбата.

„Верувам дека кога-тогаш ќе се реализира проектот, оти тоа дефинитивно е приоритет на премиерот, кој пред очите на јавноста со срамни манипулации си ги остварува намерите. Точно е дека законот дозволува државата со непосредна спогодба да даде земјиште на верска заедница, но во случајов се поткопува секуларноста, се фаворизира МПЦ. Од друга страна, отуѓувањето со непосредно спогодување не ја ослободува Владата од обврската со државното земјиште да управува како добар стопан. Тоа значи дека во спогодувањето Владата е должна да ја постигне највисоката пазарна цена, а законската форма за спогодување не е покритие за недомаќинско работење, како што е во случајов“, смета архитектот Мирослав Грчев. За него цената од 1.800 денари за квадрат земја на скопскиот плоштад е повеќе од смешна, па макар станувало и збор за парцела што ќе ја користи МПЦ под привилегирани услови, што практично е дозволиво со пропишаните норми.