МИЛЕНИУМСКИОТ КРСТ НИКАКО ДА ЗАЖИВЕЕ

Никој не го сака ресторанот на врвот на Водно

Главна причина за слабиот интерес, според членовите на Фондацијата, е тоа што сè уште не е реализиран проектот за изградба на жичарницата, па инвеститорите стравуваат дали ќе имаат доволен број гости

Уште 330.000 евра и Крстот е готов

Фондацијата за доизградба на Милениумскиот крст со веб-страница ќе се обрати до сите христијани во светот да донираат пари за неговото довршување

Фондацијата за доизградба на Милениумскиот крст со веб-страница ќе се обрати до сите христијани во светот да донираат пари за довршување на комплексот на врвот на Водно. За комплетната доизградба на објектот, според претседателот на Фондацијата Благоја Дојчиновски, ќе бидат потребни 20 милиони денари, односно околу 330.000 евра.

Изминатиов период е застаклен ресторанот што е во подножјето на Крстот и 11 дуќани каде што ќе се продаваат разни сувенири, разгледници и разни други дреболии. Се малтерисува ресторанот однадвор и одвнатре и се поставуваат плочки.

- Во подготовка е страница на интернет преку која луѓето, пред се', христијаните во светот ќе се запознаат со Милениумскиот крст, за да помогнат, ако сакаат, во неговата доизградба. Тоа ќе биде една поголема активност и еден вид кампања на членовите на Управниот одбор на Фондацијата. Освен ресторанот и дуќаните, како дополнителен објект треба да се изгради и мала црква и хортикултурно да се уреди партерот во површина од 18.000 квадратни метри, каде што ќе се засадат борови. Сметаме дека до крајот на мај ќе го видиме Милениумскиот крст комплетно уреден и готов - истакна Дојчиновски.

На Крстот се' уште не е извршен технички прием на металната конструкција на објектот, ниту на електриката ниту на лифтот. Тоа, според Дојчиновски, ќе биде направено штом ќе бидат довршени ресторанот и продавниците, кои ќе бидат дадени под концесија.

- Сепак, со изградбата на жичницата од Средно Водно до врвот, која треба да биде готова до август в година, објектот ќе го добие своето вистинско лице и значење - смета Дојчиновски.

Тој информира дека деновиве се прават и договори за тоа на кој начин ќе се носи вода до објектот. Таму ќе се постави и пречистителна станица, каде што водата ќе се пречистува со помош на микроорганизми.

Досега за доизградбата на Милениумскиот крст, Фондацијата потрошила 200.000 денари. Објектот почна да се гради во 2002 година. (А.П.)

Лифтот вози само во викендите

Лифтот на Милениумскиот крст работи само за викендите. Според Дојчиновски, не се исплати да работи и во другите денови.

- Немаме можност да плаќаме работници. Договорот со фирмата што го монтира е за него да се грижат и да го пуштаат во функција нивни тројца работници за време на викендите. Освен тоа, посетеноста засега не е толку голема. Од пуштањето на лифтот во функција, лани на 8 Септември досега се продадени околу 600 карти - изјави Дојчиновски.

Едно возење со лифтот на Милениумскиот крст чини 100 денари, а парите се користат за негово одржување.

Дојчиновски вели дека кога објектот ќе биде даден под концесија, лифтот ќе работи и во другите денови од неделата.

Лифтот е монтиран на средината на Крстот, а со него посетителите може да пристигнат до платформата на краците, од каде што имаат убава панорамска глетка на градот. Тој е застаклен од трите страни и може да пренесува осум лица. Беше купен за 45.000 евра од грчката фирма „Доплер“, а го монтира фирмата „Емо“.

http://dnevnik.com.mk/?ItemID=F1039E55E8A61D4782B114D0417EB4E4

Застаклен ресторанот на Милениумскиот крст

Ресторанот на Милениумскиот крст е застаклен, а стаклени ѕидови веќе имаат и единаесетте дуќани наменети за продажба на сувенири, разгледници и други дреболии. Деновиве ќе се лепат подните плочки во ресторанот, а потоа ќе следат занаетчиските работи. Ќе се довршуваат и работите околу електриката и бојадисувањето на ѕидовите. Во дуќаните допрва ќе се малтерисуваат внатрешните столбови, а потоа, исто така, ќе се премине на доуредување на просториите.

Благоја Дојчиновски, претседател на Фондацијата „Милениумски крст“, вели дека досегашните активности чинат 50 илјади денари, пари обезбедени од Фондацијата. За останатите зафати ќе се бараат дополнителни средства од донатори.

„Фондацијата размислува најнапред за официјален технички прием на Милениумскиот крст, а дури потоа да се види кој ќе стопанисува со ресторанот и дуќаните, или тие ќе бидат дадени под концесија. Решавањето на овие прашања, сметаме ќе го реши и самоодржувањето на крстот“, објасни Дојчиновски. Од Фондацијата велат дека Владата и Министерството за транспорт и врски прават напори до крајот на идната година да се изгради и жичарницата до крстот. (Сн.К.)