Зонско паркирање во Скопје

Зонско паркирање против узурпаторите во Чаир

Зонското паркирање од денеска треба да профункционира и во општина Чаир, на паркингот пред и покрај стоковната куќа „Илинден“, а во наредниот период тоа ќе се прошири и кај Театарот на народностите и кај Здравствениот дом „Бит-пазар“. Просторот пред „Илинден“ веќе е обележан, а „Градски паркинг“ добило согласност и од градоначалникот Изет Меџити.

Сепак, големи се сомневањата дека проектот воопшто ќе профункционира, ако се знае дека со паркирањето во овој дел од Скопје владее вистински хаос. Има многу диви паркинзи, на кои непознати лица ставиле рампи без никаква дозвола и „вработиле“ деца да собираат пари за паркирање. Приходите што се собираат на овој начин се големи, а во чиј џеб завршуваат парите, никој од надлежните не е заинтересиран да истражи. Наместо нив, за парите од дивите паркинзи се интересираат само медиумите, па во изминатиот период се појавија претпоставки дека со профитот од паркинзите, кој се брои во милиони, се финансираат политички партии, сомнителни организации итн.

На пример, веднаш до паркингот пред стоковната куќа „Илинден“ постојат уште два импровизирани паркинга, на кои со години бесправно диво се наплаќаат по 20 или 30 денари за влез, без разлика колку време ќе остане автомобилот.

- Не знам кој им дал дозвола, веројатно работат на диво. Има дете што собира пари и бара по 30 денари за цел ден. Јас секој ден доаѓам овде со автомобил, бидејќи тука работам. Отпрвин плаќав, но повеќе не - вели еден од вработените во дуќаните до „Илинден“.

На другиот паркинг, кој се наоѓа веднаш до него, кон просторот на „Мавровка“, пари собираше еден постар човек. Нашата екипа забележа еден таксист кој се паркираше таму и одби да плати. Ни рече дека му побарале 20 денари.

- Секој ден доаѓам овде и немам намера некому да му го полнам џебот. Јас од таксирање вадам за леб - искоментира тој.

Иста е состојбата и со неколку паркинзи зад Здравствениот дом „Бит-пазар“. Тие се узурпирини и нив на диво ги стопанисуваат приватници. Дел од луѓето што работат таму не сакаа да зборуваат, со образложение дека се плашат од газдите, а други се вадеа со тоа дека паркингот бил на Здравствениот дом.

- Овде се наплаќаат 30 денари за еден час и 50 денари за цел ден - вели наплаќачот на еден од паркинзите.

Еден друг вработен тврдеше дека имале дозвола да го стопанисуваат паркингот.

- Овде нема да успее зонското паркирање. Тоа е само за делот од Скопје преку Камениот мост. Тешко можеме да се приспособиме кон тие правила што ги налага Владата. Овде нема ништо урбанизирано. Кога ќе се урбанизира, тогаш ќе зборуваме за зонско - рече тој.

Од Здравствениот дом негираа дека имаат каква било врска со стопанисувањето со паркинзите.

- Ние не ги стопанисуваме паркинзите. Здравствениот дом, како и паркинзите, се наоѓаат на територијата на општината Чаир и тие се узурпирани со дозвола од Општината. Неколкупати реагиравме и баравме барем да не плаќаме ние, вработените, по што нашата молба беше услишана - велат од Здравствениот дом.

Директорот на „Градски паркинг“, Панче Стојановски, е убеден дека зонското паркирање кај стоковната куќа „Илинден“ ќе се спроведе, бидејќи за тоа гарантирал градоначалникот Меџити.

- Нема да има никаков проблем. Градоначалникот на Чаир уверуваше дека ќе го среди проблемот со узурпаторите на паркинзите кај стоковната куќа „Илинден“ - вели Стојановски.

Градоначалникот Меџити потврди дека проектот за зонско паркирање кај „Илинден“ има негова поддршка и потенцираше дека со тоа узурпаторите ќе бидат тргнати. Тој негираше дека тие работеле со дозвола од Општината, иако немаше издржан коментар зошто досега ги толерирале.

- Тие немаат наша дозвола да работат со паркинзите. Ние немаме наше јавно претпријатие кое би ги стопанисувало паркинзите, па тие го користат тоа. Општината нема ингеренции да ги спречи, навлезени се во дворови на институции - се правда Меџити.

Паркингот кај „Илинден“ ќе биде во втората зона и ќе се наплаќаат по 35 денари за час. Ќе има капацитет за 98 автомобили. Станарите од околината ќе плаќаат по 200 денари за месечна карта, а дуќанџиите по 400 денари.

http://dnevnik.com.mk/?ItemID=C60BA270F391104FA0480DBF43A9FE23

ОД ИДНАТА НЕДЕЛА

Зонско паркирање и на улицата пред Телеком

Од претпријатието објаснуваат дека одлучиле и на оваа улица да наплаќаат за паркирање оти сега тука владее вистински хаос. Граѓаните ги оставаат возилата на улицата, со што е затнат сообраќајот и нема шанси да се разминат две возила

На улицата која води кон паркингот кај Телеком од понеделник паркирањето ќе се наплатува. ЈП "Градски паркинг" одлучило и на овој потег паркирањето да биде зонско и ограничено. Паркингот, согласно поделбите, ќе биде во првата зона, што значи дека на улицата ќе биде дозволено само два часа паркирање и за еден час ќе се наплатуваат 45 денари. Од претпријатието објаснуваат дека одлучиле и на оваа улица да наплаќаат за паркирање оти таму владее вистински хаос. Граѓаните ги оставаат возилата на улицата, со што е затнат сообраќајот и нема шанси да се разминат две возила.
"Ние на овој дел со пајак-службата секој ден подигнуваме по десетина автомобили оти ја блокираат улицата. Во моментов е хаос оти оттука поминуваат камионите и механизацијата кои на Плоштадот вршат градежни работи за поставување на фонтаната со споменикот на Александар Македонски. Камионите не можат да поминат од колите, па нè чекаат нас да дојдеме и да ги подигнеме за да можат да стигнат до Плоштад. Со воведувањето на зонско ќе биде дозволено паркирање само на тротоарот, со што улицата ќе биде слободна за движење", вели Панче Стојановски, директор на ЈП "Градски паркинг".
(А.А.)