Административно раководење на Скопје

КОСТОВСКИ НЕ СЕ ОТКАЖУВА ОД БАРАЊЕ ЗА ПРОМЕНА НА ПРОСТОРНО И АДМИНИСТРАТИВНО УРЕДУВАЊЕ НА НАШАТА МЕТРОПОЛА

Скопје - една општина со повеќе квартови

Суштината на работната верзија на новиот Закон за Град Скопје, кој деновиве ќе биде доставен до Владата, е да се овозможи единствен концепт на урбан економски и социјален развој на општината, како и да се избегне дуализам во надлежностите, меѓу Градот и Општините, велат во Градот

Скопје да биде една општина со повеќе квартови, а границите на нашата метропола да се утврдат во рамките на постоечкиот генерален урбанистички план. Работната верзија за промена на просторното и административно уредување на нашата метропола, градската администрација деновиве планира да ја достави и до Владата на разгледување. Според надлежните во Градот, суштината на целиот овој зафат, што по иницијатива на градоначалникот Костовски, го подготви градската администрација, е да се овозможи единствен концепт на урбан економски и социјален развој на општината, како и да се избегне дуализам во надлежностите.

- Во работната верзија на новиот Закон на Град Скопје, што го предлагаме е Скопје да биде една општина, но со 10 или помалку квартови во кои граѓаните полесно би ги добивале услугите што ги дава Градот, кој во случајов би бил единствен субјект што ќе ги спроведува надлежностите. На овој начин ќе имаме и порационална организација на администрацијата на локално ниво, би се одбегнала потребата од создавање на нови јавни претпријатија, како и судир на надлежности од областа на урбанизмот, издавање на одобренија..., вели Бранко Трајчевски од секторот за правни работи на Град Скопје.

Работната верзија од измените на Законот на Град Скопје, опфаќа и предлог за нов начин на финансирање на Град Скопје, кој треба да овозможи зголемување на внатрешните приходи на Градот во согласност со неговите надлежности и потребата за изградба на објекти од негова надлежност. Дел од измените е и нов начин на просторно уредување на Градот, кој предвидува сведување на Градот во рамките на постоечкиот Генерален урбанистички план, без рурални средини.

- Урбаните општини, како што се Аеродром, Центар, Кисела Вода и Аеродром во буџетот на Град Скопје учествуваат со 96 отсто, и по логика на нештата Градот би требало да биде обврзан тие средства, по основ на комуналии, да ги врати во тие општини. Од друга страна Ѓорче Петров, Шуто Оризари и Сарај придонесуваат со само 4 отсто, но ние во Градот водиме една социјална политика со која треба да го развиеме целиот град, а се знае дека руралниот дел, има сосема други и многу поголеми потреби, вели Костовски, кој посочува дека и самите општини губат огромни средства кои би ги добивале од надлежните институции доколку се самостајни општини.

Предлог - измените од Законот за Град Скопје наскоро ќе бидат готови и пред да бидат поднесени во Собранието, ќе бидат презентирани во јавноста. За деталите, Костовски деновиве ги информираше министерот Џефери и евроамбасадорот Фуере

Градските служби интензивно работат на подготовка на измените на Законот за Град Скопје, кој според експертската јавност, се покажа како исклучително непродуктивен и неефикасен. Со измените, најголем акцент ќе се стави на прецизирање на недоволно јасните надлежности и одговорности меѓу главниот град како посебна единица на локалната самоуправа и десетте скопски општини, како и начинот на финансирање. Градоначалникот Трифун Костовски во неколку наврати досега се жалеше на притисок и на преземање на надлежностите од страна на централната власт. Токму затоа пред неколку месеци покрена и медиумска кампања за менување на Законот. Предлог - измените на Законот за Град Скопје наскоро ќе бидат готови и пред да бидат поднесени во Собранието, ќе бидат презентирани во јавноста.
- Сегашниот Закон не овозможува вистинско управување со главниот град, туку имаме лажна заедница на општини со кои ни се преклопуваат ингеренциите. Од друга, страна имаме мешање во ингеренциите на централната власт. Ова неодамна го изјави Костовски, потенцирајќи ги причините за корекции во основниот закон, но и во другите подзаконски акти кои се однесуваат на територијалната организација и на финансирањето на локалните заедници.

За сите новини и деталите градоначалникот Костовски деновиве го информираше министерот за локална самоуправа Муса Џафери. "Ова е прва средба со министерот на која го информирав за новата промена на законот за град Скопје. Наидов на разбирање и се надевам дека до крајот на мојот мандат, законот ќе биде донесен, рече Костовски. Вчера, пак на истата тема разговараше со евроамбасадорот Ерван Фуере. По средбата, скопскиот градоначалник изјави дека заедничка констатација била дека децентрализацијата која претставува суштински дел во приближувањето на Македонија кон ЕУ, навистина е бавен процес.

Костовски и Џафери разговараа за измените на Законот за Скопје

Градоначалникот Трифун Костовски вчера се сретна со министерот за локална самоуправа, Муса Џафери, за да го информира за предлозите за измена на Законот за Град Скопје. Градските власти наскоро ќе го финишираат предлогот за измена на Законот, кој пред да дојде во Собранието ќе и' биде презентиран на јавноста. Костовски смета дека измените се неопходни за да му се овозможат на неговиот наследник нормални услови за работа.

„Ова ни е прва средба со министерот Џафери, на која го информиравме за содржината на измените што ги предлага Градот Скопје со цел да се подобрат условите за работа. Министерот има големи познавања за функционирањето на локалната самоуправа, што е голема предност за нас“, истакна Костовски. (С.Н.)

http://utrinski.com.mk/?ItemID=4AF045EA422DA6449E8A6E67E131564B