Кочани,Штип,Делчево

Штип ќе урива гаражи за згради

Во населбата Сењак се прави место за изградба на дел од четиринаесетте станбени објекти

Иван Бојаџиски



ШТИП - Шеесетина диво поставени, главно, лимени гаражи, ќе бидат отстранети во населбата Сењак за да ослободат место за изградба на дел од четиринаесетте нови станбено-деловни згради што ги промовира штипскиот градоначалник Зоран Алексов. За овие објекти локалната самоуправа постојано добивала поплаки од жителите на населбата дека го деградирале нејзиниот лик и биле поставувани без каков било ред.

„Ги информиравме сите сопственици на гаражите, кои треба да се отстранат, сами да го направат тоа во рок од една недела за да не прават непотребни трошоци. Ако дотогаш не се ослободи просторот, гаражите ќе бидат дислоцирани од наши екипи, но сопствениците ќе мора да платат за нивниот ангажман. Се надеваме дека ќе нема потреба од наша интервенција“, рече на вчерашната прес-конференција градоначалникот Алексов, во присуство на стручниот тим што ја води урбанизацијата на Штип.

Според Алексов, градот определил четиринаесет локации на кои ќе се граделе толкав број станбени и станбено-деловни објекти. Интересот кај бизнис-заедницата за добивање локации бил значителен, бидејќи сите биле во урбани средини каква што е и населбата Сењак.

„Во Штип можат да се избројат на прсти новите објекти изградени во последните две децении. Градот сега ја има шансата да почне динамична изградба на станбени и станбено-деловни комплекси. Со отворањето и развојот на Универзитетот „Гоце Делчев“ побарувачката на станови значително е зголемена, и како град сакаме да им излеземе во пресрет на инвеститорите што изразија спремност да градат“, објасни Зоран Алексов.

За да може да се тргне во постапка за доделување на четиринаесетте зацртани градежни локации на заинтересираните фирми, потребно е тие целосно да се исчистат од сите дивоизградени објекти, кои се многубројни. Градот, според градоначалникот, е на прагот на градежна експанзија, бидејќи постоел интерес за градба, а на општината била одговорната задача на таквите позитивни барања да одговори во што покусо време.

Инаку, Штип, според некои податоци од пред една година, се соочува со околу пет илјади дивоградби. Станува збор за комплетно дивоизградени куќи и други објекти, гаражи, но и доградби и надградби. Градежни стручњаци упатуваа на разните опасности што со себе ги носат самоволните доградби, а посебно надградбите. Безброј станбени згради во Штип, меѓу нив и во центарот на градот, се доградија со по еден кат без консултација на луѓето од таа струка.

Владо Бутлев, инженер-статичар, вели дека во Штип барем половина од надградбите не го поминале стручниот тест и не се знае дали можат да го издржат тој дополнителен товар. „За каква било надградба или доградба е неопходно да се направи статичка анализа на целиот објект за да се знае кој и колкав товар може да издржи таа зграда. Тоа кај половина објекти со такви доградби не е извршено, па секогаш ќе биде присутен стравот за безбедноста на станарите во нив“, додава Бутлев.

Штип не успева да го реши проблемот со дивоградбите, чии актери се и сиромашни луѓе, но и познати јавни личности. Постои уверување дека дивоградбите дури и во центарот на градот не се санкционирани поради т.н. јавни личности, кои секогаш имале пријатели кај надлежните локални водства. Имено, влијаеле нивните нелегални градби да не се уриваат што ги „спасувало“ и останатите што низ сите овие години граделе без какво било одобрение.