Зонско паркирање во Скопје

Плаќаат за паркинг, а паркинг нема

Жителите на Аеродром, што живеат кај трговскиот центар „Бисер“, реагираат дека честопати немаат слободно место за паркирање, а наскоро ќе почнат да плаќаат месечна карта за користење на зонскиот паркинг. Тие велат дека немаат против да плаќаат по 100 или 200 денари месечно за зонското паркирање, но бараат да имаат загарантирано слободно место, а не да вртат кругови низ населбите.

Зонското паркирање есеноска беше воведено во центарот на Скопје, но и во Аеродром, во делот кај „Бисер“, а наскоро ќе почне да се применува и од спротивната страна на булеварот Јане Сандански, кај маркетот „Веро“, каде што местата се обележани. Паркирањето за посетителите чини 25 денари од час, а за станарите досега беше бесплатно. Штом беше воведено, на паркинзите зад „Бисер“ се создаде некаков ред, а средишниот дел престана да се користи за паркирање, но на сметка на тоа се создаде голем метеж во останатите улици во околината, каде што нема зонско.

- На ваков начин зонското паркирање е нефункционално и воопшто и не би требало да се спроведува. Многу често кога ќе се вратам од работа по 17 часот нема место каде да го паркирам возилото, па мора да одам на паркингот кој е на соседниот блок отспротива. А веќе ми стигна предупредување да платам 200 денари месечна претплата за паркинг-местото. Немам против да си платам и да имам паркинг, но зошто од „Градски паркинг“ продаваат повеќе места отколку што имаат - прашува А.Д. кој живее во околината на „Бисер“.

Од јавното претпријатие „Градски паркинг“ велат дека кај „Бисер“ има обележано 1.355 паркинг места, а за потреба од паркинг се пријавиле 1.120 жители.

Директорот на јавното претпријатие „Градски паркинг“, Панче Стојановски, вели дека проблемот кај „Бисер“ се создава затоа што се' уште не почнале да ги наплатуваат казните за пречекорување на времето на паркирање.

- Сите жители од овој реон се евидентирани, но досега не сме им испратиле барање за месечна наплата за паркирање. Проблемот е во тоа што се' уште не сме почнале да ги санкционираме оние што не плаќаат за користење на паркинг-местото и оние кои го пречекоруваат времето. Системот на зонско паркирање не може да функционира ако не е извршена евиденција на жителите и на правните лица и ако не се применуваат доплатните карти за несовесните граѓани. Со примена на казните состојбата ќе се среди - тврди директорот Стојановски.

Според него, таканаречените доплатни казнени карти ќе се активираат од 15 јануари и ќе чинат 1.300 денари.

- Ќе бидат ангажирани мобилни екипи, кои ќе контролираат и со доплатни карти ќе ги казнуваат граѓаните што не плаќаат за паркинг. На оние што не сакаат и тоа да го платат, возилата ќе им бидат блокирани со блокатори. Сметам дека до 1 февруари ќе функционира се' како што треба - вели Стојановски.

Досега претпријатието немало можност да казнува бидејќи немале официјален ценовник.

- На последната седница на Советот на Град Скопје беше донесена одлука да се воведе зоната Д за зонско паркирање, каде што цената за паркирање за жителите што живеат во неа ќе биде 100 денари, а не 200 денари месечно, како што беше најавено. За оние што доаѓаат да завршат одредена работа, привременото паркирање ќе чини 25 денари за час, а за правните лица ќе чини 750 денари месечно - вели Стојановски.

Истите цени ќе важат и за делот кај маркетот „Веро“, каде што допрва ќе се врши евидентирање на жителите на кои им е потребно паркинг-место.

Анела Петрова

Од Нова година казни и во третата зона за паркирање

Санкцијата за секој што нема да плати паркирање или ќе заземе место за инвалиди е 700 денари

„Градски паркинг“ по празниците ќе почне да казнува за неплаќање паркинг и во третата зелена зона, во Аеродром и во Дебар Маало. Од претпријатието велат дека засега се толерираат неплаќачите, бидејќи се' уште трае периодот на навикнување. Во првата зона во строгиот центар на градот одамна се наплатува казна од 1.300 денари, доколку некој не платил за паркирање или го надминал лимитот од два часа. Во втората зона казната за вакви прекршоци е 1.000 денари.

Неказнувањето во третата зона, пак, не им одговара на жителите на улицата „Орце Николов“, како и оние од зградите околу „Бисер“. Тие се жалат дека иако веќе три месеци плаќаат по 200 денари за станарски билет, сепак, се' уште се случува да нема место за паркирање. Жителите бараат „Градски паркинг“ да почне да ги санкционира несовесните или, пак, да им гарантира паркинг-место на станарите.

„Често се случува, особено во вечерните часови кога има поголем прилив на автомобили, особено во околните кафулиња, да немам каде да го паркирам својот автомобил. Иако имам станарска картичка, сепак, се наоѓам во ситуација да морам да го паркирам автомобилот некаде во околните улички. Излегува дека сме казнети ние што имаме картички, а тие што не плаќаат паркинг поминуваат неказнето“, вели жителка на улицата „Орце Николов“.

Во „Градски паркинг“, пак, информираат дека санкционирањето ќе почне по Нова година. Ќе се наплатува доплатен билет, како и во првите две зони. Ќе се казнува секој што нема да испрати СМС-порака или нема да поседува талонче за паркирање, а казната ќе изнесува 700 денари. Истата сума ќе треба да ја плати и секој што ќе заземе место наменето за инвалидизирани лица.

Во Аеродром почнува да функционира зоната Д за паркирање

Во белата зона ќе има поповолни цени за паркирање, особено за правните лица

Сања Наумовска


Зонското паркирање во Скопје добива четврта, бела зона, наречена зона Д, која ќе профункционира во општината Аеродром. Деновиве, со бележењето на паркингот зад маркетот „Веро“, ќе се отвори новата зона, која во прво време ќе има иста цена како и зелената зона Ц. Во иднина, најавуваат од јавното претпријатие „Градски паркинг“, зоната Д ќе има поголеми поволности, особено за правните лица, како и за сопствениците на дуќани во рамките на зоната.

Зад „Веро“ се отвораат 750 паркинг-места, кои ќе им бидат на располагање, пред се', на станарите на околните згради. Веќе се одбележани околу 250 места, а до крајот на неделата ќе се одбележат и другите. Ќе се постават и сообраќајни знаци, како и првата табла со бела боја во Д-зоната.

Како што информираат од „Градски паркинг“, сите заинтересирани станари за месечните картички за паркирање ќе можат да аплицираат на информативниот пункт кај „Бисер“. Службите ќе работат во две смени, од 7 до 21 часот. Се' додека не се создаде комплетната база на податоци, за станарите зад „Веро“ паркирањето ќе биде бесплатно.

„Засега цената и условите на паркирањето ќе бидат исти како и во зоната Ц, но наскоро ќе бидат предложени нови цени, кои ќе бидат пониски. Најповолно ќе биде за правните лица, чиј бизнис гравитира околу зоните што ќе добијат многу поевтина месечна карта. Цената за зоната Ц е 3.000 денари месечно, а за зоната Д предлагаме да биде 750 денари. За станарите останува 200 денари месечно паркирање“, информираат од „Градски паркинг“.

Паркирањето, како и во зелената зона, нема да биде временски ограничено, но ќе биде поевтино. Според пресметките на јавното претпријатие, на Советот на Скопје ќе му биде предложено еден час паркирање во Д-зона да чини 20 денари.

Во новата зона ќе влезе и веќе направениот паркинг зад „Бисер“, како и планираниот кај „Три бисери“. Белата зона ќе ги опфати и зонското паркирање во општината Карпош, каде што е договорено на овој начин да се среди хаосот на паркингот пред трговскиот центар „Лептокарија“. Во општината Чаир, зонско паркирање ќе се воведува на малиот паркинг покрај трговскиот центар „Мавровка“. Белата зона ќе ги опфати и општината Кисела Вода, почнувајќи од Рампа, како и општината Ѓорче Петров, каде што, исто така, планирано е зонско паркирање на неколку фреквентни локации.

Во сите скопски општини постојат проблематични пунктови, места што не можат да се затворат со рампи, па зонското паркирање за нив е најсоодветното решение. Ова е ставот на новоименуваниот в.д. директор на „Градски паркинг“, Панче Стојановски. По два месеца откако почна да се спроведува новиот систем на паркирање, сегашниот прв човек на јавното претпријатие ги наведува првите резултати, оценките за нив, но и идните амбициозни планови на претпријатието. у Какви се досегашните резултати од зонското паркирање, се паркираат ли граѓаните во зоните или ги избегнуваат поради високите цени?
- Во строгиот центар постигнавме задоволувачки резултати. Прво, успеавме да го намалиме бројот на граѓаните што во центарот се паркираа без некоја поголема потреба и се отворија места за тие што таму секојдневно гравитираат. Финансискиот резултат е 70 проценти од тој што го очекувавме, а од трите паркиралишта, кај полициската станица „Беко“, зад хотелот „Бристол“ и зад Собрание дневниот приход е меѓу 12.000 и 15.000 денари. Втората зона каде што паркирањето се одвива на улиците Орце Николов и на дел од Ѓуро Ѓаковиќ не ги исполни очекувањата. Тука приходот е од 2.500 до 4.000 денари дневно. Кога ќе почнеме со работа и на Ленинова тој ќе се зголеми. На двете улици ќе ставиме метални пречници на тротоарите, за да ги принудиме возилата прописно да се паркираат, а за пешаците задолжително да остане простор од 1,6 метри. Планираме и да го продолжиме работното време на 24 часа, затоа што овде метежот настанува навечер кога луѓето доаѓаат во кафулињата. Се на се, целосните ефекти ги очекуваме по една година од воведувањето на системот. у Зошто зонското паркирање што првично беше најавено да го реши проблемот во централното градско подрачје се прошири и по општините, на пример во Аеродром?
- Скопје е специфичен град во кој општините имаат одредени проблематични пунктови, места што не можат да се затворат со рампи, туку зонското паркирање за нив е најсоодветното решение. Ова особено важи за улици, зашто по нив не може да се паркира, освен ако не се спроведе системот на зонското паркирање. За да ги решиме тие проблематични точки имаме добра соработка со општините. Затоа се вклучи и Аеродром. Но, ние ќе им дадеме време на жителите сами да ги увидат придобивките од зонското паркирање. Во општина Карпош, исто така, разговаравме со градоначалникот Стевчо Јакимовски, кој сака да го реши проблемот со паркирањето кај ТЦ „Карпош 3“. Зборувавме и со општина Ѓорче Петров, но засега немаме ништо конкретно, а истиот систем сметаме дека има потреба да се спроведува и во општините Чаир и Бутел. Планираме да ја вклучиме и улицата Максим Горки, за која сега го работиме проектот, но таму имаме проблем со амбасадите. Тие мора да разберат дека паркирањето треба да се плаќа, како што и ние во нивните земји ја исполнуваме оваа обврска. Па, во други земји, како на пример во Белград, ако живееш во центар не можеш возилото да си го регистрираш ако не покажеш документ дека имаш каде да го паркираш. у Зошто кај нас зонското паркирање почна да се применува на веќе постојните паркиралишта место на коловозот од улицата?
- Тоа не е точно. Првите три паркиралишта каде што го почнавме системот се сервисни улици, а и на дел од Орце Николов паркирањето е на улица. уОпштина Центар сака да ја преземе надлежноста на паркиралиштата, за кои тврди дека ги изградила, а „Градски паркинг“ ги стопанисува, и бара да се вклучи во зонското паркирање, односно да добива дел од приходот остварен на улиците во нејзиното подрачје. Ќе ги отстапите ли паркинзите во Центар? - Не стопанисуваме ни едно паркиралиште што го изградиле тие. Ние разговаравме со градоначалникот на Скопје, Коце Трајановски и на Центар, Владимир Тодоровиќ, и кажавме дека сме подготвени да ги отстапиме улиците, ако најдат сметка да спроведуваат систем вреден 300.000 до 400.000 евра. у Сепак, ставивте рампи кај белите згради, спроти последната автобуската станица на автобусот број 23, на паркиралиште што не е ниту градско, ниту општинско, туку го изградил инвеститор?
- Таму сме по желба на граѓаните. Просторот има 112 места за паркирање, а потребата е за 270 возила. Затоа им понудивме на станарите да го преземеме управувањето и за тие за кои нема место да можат да паркираат во непосредна близина, спроти „Нова Македонија“. у Дали ќе ги намалите цените за паркирање?
- Ако има корекција на комуналната такса. Сега таа изнесува 10 денари од цената за паркирање по еден час и 30 денари од влез. Бараме таксата да се намали и да се пресметува процентуално, односно да биде 10 проценти од цената за паркирање. у Но, имате долг за неплатена комунална такса кон Градот, иако двапати беа донесувани одлуки од Советот да ви се доделат субвенции?
- Откако сме формирани не сме добиле ни еден денар од Градот. Не бараме субвенции. Само бараме од тие пари што ги одобрија да ни дадат 20 милиони денари, кои беа наменети за инвестицијата за зонското паркирање.

Ќе се исцрта четврта бела зона

Јавното претпријатие „Градски паркинг“ го продолжува проектот зонско паркирање со уште една, бела зона. Разликата со другите три зони, односно црвената, жолтата и зелената, ќе биде во цената. За станари паркирањето останува 200 денари месечно, а цената за фирмите ќе биде пониска во однос на другите зони. Белата зона, чиишто граници се уште не се конечни, ќе се протега од Железничката станица кон Аеродром и по Рузвелтова, до каде завршува зелената зона.


Интерес и за катните гаражи

Директорот Стојановски најавува дека заедно со Градот се заинтересирани да учествуваат и на некоја од наредните продажби на земјиште за катна гаража, меѓу кои ги спомнува локациите спроти зградата на Лотарија на Македонија и кај работничкиот дом „Кочо Рацин“. Според него, јавното претпријатие не може самостојно да ја финансира изградбата, па затоа се размислува за јавно-приватно партнерство.