Нова железничка траса меѓу Европа и Азија

Со оваа линија треба да се добие побрз транспорт на стоки и да се избегне царинската бирократија

Деновиве беше пуштена во употреба нова железничка линија од пристаништето во Антверпен во Белгија до кинескиот град Чонгчинг, со која треба да се добие побрз транспорт на стоки и да се избегне царинска бирократија.

„Товарниот воз тргнува на пат од пристаништето во Антверпен дури петпати во неделата. Преку пругата во Германија, Полска, Украина, Русија и Монголија па се до градот Чонгчинг во централна Кина, тој поминува единаесет илјади километри. Предностите од овој вид транспорт ни стојат на дланка“, вели Зинг Су, претставник од службата за развојна помош на Антверпен во Чонгчинг: „Покрај скапиот и брз авионски превоз, како и бавниот и поволен бродски транспорт, сега имаме и релативно брза, но евтина алтернатива. Доколку некој клиент има повисоки побарувања, што се однесува до транспортот, тогаш може да се одлучи за железничкиот транспорт“.

Во проектот, што беше започнат минатата година, учествуваат градовите Антверпен и Чонгчинг, швајцарската фирма Хупац, како и по една руска и кинеска градежна фирма. Трасата проработи на почетокот од неделава на веќе постоечките шини. Посебното во проектот е тоа што транспортниот воз, и покрај тоа што преминува шест граници, сепак нема да наидува на големи застои поради царинската бирократија. „Во проектот белгиската царина направи пионерска работа“, вели Марк ван Пел, претседател на пристанишната служба Антверпен. „Сакаме да создадеме т.н. ’зелена траса’, што подразбира царински договори со поединечни земји. Се надеваме дека тоа и ќе го постигнеме до октомври, што значи дека потоа царинската бирократија ќе биде екстремно намалена“, истакна ван Пел.

Поради компликуваните царини, патот од Антверпен до Чонгчинг сепак трае 23 дена. Од октомври би требало да се скрати на само 18. Иако на Запад е малку познат, Чонгчинг е еден од најголемите градови на светот. Тој има централна управа и се наоѓа покрај реката Јангце. Градот е голем колку Белгија и Холандија заедно и има 30 милиони жители.

Кинеската влада со години вложува во градот, со намера тој да стане важен индустриски и трговски центар во кинеската провинција. Од тоа треба да профитира и релативно неразвиената област во западна Кина. Со изградбата на гигантската акумулациона брана „Три клисури”, градот Чонгчинг има директен излез на источното Кинеско Море. Од браната се создаде вештачко езеро со должина од 600 километри, каде можат да пловат прекуокеански бродови се? до Чонгчинг, кој е оддалечен 1.500 километри од морето.

Затоа, железничката линија е важна дополнителна алтернатива за бродскиот сообраќај, вели Зинг Су: „Железничката линија отвора сосема нови можности, кога е во прашање логистиката во Чонгчинг. Нашиот сервис помага да се развие внатрешниот, периферен дел на земјата“, вели Зинг Су. Пристаништето во Антверпен е второ по големина во Европа и е важен крстопат за трговската размена меѓу европските земји, но и за трговијата со американскиот и со африканскиот континент. (Дојче веле)

Со воз директно од Германија до Кина

Најголемиот железнички превозник во Германија, концернот „Дојче Бан“ планира да отвори редовна железничка линија за теретни сообраќај со Кина.

Но запамети дека е градена на крајот на 19-от век. Каква технологија тие имале тогаш, а каква имаме ние сега?