Општината ќе им го плаќа зонското паркирање на станарите во Аеродром

Градоначалникот признава дека размислува како да им излезе во пресрет на граѓаните

Деспина Трајковска

Општина Аеродром ќе им го плаќа зонското паркирање на станарите без притоа да троши пари од сопствениот буџет. Општинската каса веќе почнала да собира приходи од комуналната такса што и' ја плаќа ЈП „Градски паркинг“, којашто била значително поголема од трошоците што би ги имала Општината доколку станарите се паркираат на нејзина сметка.

Неофицијално, токму оваа шема ќе ја употреби градоначалникот Ивица Коневски за да се искупи, пред се', кај станарите што живеат зад ТЦ „Бисер“, а на кои им вети евентуално укинување на зонското паркирање, но очигледно се премисли и им овозможи бесплатно да се паркираат, но само до Нова година. Стравувајќи од повторни реакции од жителите и обвинувања на негова сметка, Коневски одлучил дека бесплатно паркирање за станарите на сметка на Општината е најдобрата варијанта за решавање на проблемот.

„Точно е дека размислувам како да им излезам во пресрет на граѓаните, иако искрено мислам дека 200 денари е симболична сума што тие би требало да ја плаќаат за паркирањето. Размислувам за неколку варијанти како да го решиме случајот, но не би сакал ништо да зборувам предвреме“, ни изјави Коневски и потврди дека токму ова била една од темите за кои во петокот разговарал со градоначалникот Коце Трајановски и директорот на ЈП „Градски паркинг“, Панче Стојановски. Коневски одби да ги коментира нашите сознанија, со образложение дека за сите новини во врска со проблемот јавноста ќе биде запозната наскоро. Истиот коментар го добивме и од директорот на „Градски паркинг“, Стојановски, кој единствено дополни дека претпријатието не го интересира дали за зонското паркирање ќе добива пари од станарите или од Општината.

„Единствено е јасно дека ние не се откажуваме од наплатата“, рече Стојановски и најави дека до крајот на годинава во Аеродром ќе се воведе зонско паркирање и кај „Веро“, а кратко време потоа и зад ТЦ „Скопјанка“ и евентуално кај „Три бисери“, за каде што се' уште се прават анализи дали проектот има економска и функционална исплатливост.

Инаку, во план е дуќанџиите од ТЦ „Бисер“ наместо досегашните 1.000 денари за месечна картичка за зонско планирање, да плаќаат 700 денари. Сепак, дали ќе има намалување на цената, ќе зависи од одлуката на Советот на Град Скопје.

Казна од 1.300 денари за предолго паркирање

И Центар сака пари од зонско паркирање

Советниците од Општина Центар ќе им објават „војна“ на градските власти зашто им узурпирале неколку општински улици за зонско паркирање, а претходно ниту ја известиле Општината ниту побарале одобрение за тоа. На последната седница на Советот прв пат советниците од власта и опозицијата во Центар беа единствени дека ќе мора да се борат за да си ги вратат улиците.

Јавното претпријатие „Градски паркинг“ неодамна со проектот за зонско паркирање ги зафати тротоарите на три најфреквентни улици во Дебар Маало. На дел од улиците Орце Николов, Ѓуро Ѓаковиќ и Ленинова претпријатието обезбеди околу 330 места за паркирање, каде што граѓаните плаќаат по 25 денари од час. Овие улици се под ингеренција на општинските власти, па зонското паркирање во Дебар Маало за Општината е проблематично, бидејќи и тие имаат свое општинско претпријатие „Паркинзи на општината Центар“, кое остварува приходи од истата дејност како и „Градски паркинг“.

Советниците велат дека паркинг-местата во Дебар Маало на општината би и' носеле најмалку по илјада евра на ден, што значи сериозно полнење на буџетот.

Градоначалникот на Центар, Владимир Тодоровиќ, најави дека ќе имаат судир со Градот Скопје.

- Мора да се најде решение. По подготовките и предлозите лично ќе разговарам со градоначалникот Коце Трајановски и решение мора да се најде - изјави Тодоровиќ.

Од Градот велат дека ЈП „Градски паркинг“ за реализација на овој проект, согласно законот, требало да добие согласност само од МВР, врз основа на изработен проект, а според правилник подготвен од Министерството за транспорт и врски.

- Не се потребни дополнителни одобренија и согласности од кој било друг орган - велат во Градот.

Претседателот на Советот на Општината, Владимир Здравев, на седницата рече дека Градот ја води истата политика како и претходната гарнитура. Тој најави дека на следната седница проблемот ќе го постави на дневен ред. Во меѓувреме, директорот на општинското претпријатие за паркирање и службите на општината мора да подготват план и стратегија како ќе го решат ова недоразбирање со Градот.

Тодрор Делјановски, директор на „Паркинзи на општина Центар“ , вели дека тој не можел да реагира за „зулумите“ што им го прави Градот, оти за тоа се одговорни градоначалникот и општинските служби.

Нејасно е зошто општината Центар дури сега се противи на зонското паркирање, откако проектот почна да се реализира. Особено што веќе неколку години е познато на кои улици ќе се воведе овој систем.

Марија Тасев

Опасна зона

Тротоарите во Скопје никогаш не биле слободни за пешаците. Проблемот со зонското паркирање не е во тоа што пешаците сега останале без пешачки патеки, туку што нивната узурпација со возила стана легална за одреден паричен надомест.

Зонското паркирање треба да постои во центарот на градот, но само таму каде што има соодветни услови. Недозволиво е на одредени улици да се зафатат тротоарите од обете страни, без да се остави простор за минување. Паркирањето по зони првенствено треба да биде воведено на коловозите, а тротоарите да се зафаќаат само во исклучителни случаи.

Вака излегува дека „Градски паркинг“ ќе се збогати на сметка на безбедноста на граѓаните. Како инвестиција потроши само боја за бележење на местата и си приграби одамна изградени тротоари, односно заедничка сопственост, кои ќе ги користи како простор за најмување.

Соња Христовска