Ќе се прави игралиште во Ѓорче Петров?

Веќе се почнати преговорите за откуп на земјиштето и нема никакви проблеми, никој досега се нема пожалено. Чекаме, и додека официјално не биде усвоен ДУП нема ништо да се гради на таа локација, велат од општината
На улицата Социјалистичка зора, според новиот нацрт-детален урбанистички план за Мирче Ацев, предвидено е да се прави спортско игралиште. Половина од земјиштето е државна сопственост, а дел е на приватни сопственици, кои во моментов се во преговори со општината Ѓорче Петров за обесштетување. На таа локација постојат и привремени објекти, кои, доколку биде решено да се гради игралиштето, ќе бидат урнати. Некои од сопствениците велат дека не сакаат да го продадат земјиштето, а се жалат и сопствениците на привремените објекти. - Овие објекти се тука уште од 1984 година. Нема смисла да се урнат, кога игралиште можат да прават и на друга локација. Според моите сознанија, и некои од сопствениците на приватното земјиште не сакаат да го продадат - вели една корисничка на тамошните дуќани. Кога ќе биде спроведена јавната анкета, тамошните жители ќе можат да си го кажат својот став. - Со досегашниот ДУП беа предвидени објекти за домување. Општината сака да направи пренамена на земјиштето и на тоа место да прави игралиште. Се работи за површина од три и пол хектари. Нацрт-верзијата на ДУП ќе се стави на јавна анкета, па граѓаните ќе можат да си го кажат својот став. Се работи за шест парцели, од кои дел се државно земјиште. Новиот план не е во согласност со генералниот урбанистички план на градот од 2002 година, според кој на таа локација се предвидени куќи, односно згради за семејно домување - вели Мирослав Наумовски, советник во општината од СДСМ. Тој додава дека игралиште може да се направи во близина на ОУ „Димитар Поп Георгиев-Беровски“, каде што има голема неискористена површина. Од општината Ѓорче Петров велат дека нема ништо да се гради на таа локација додека не биде усвоен деталниот урбанистички план. - Веќе се почнати преговорите за откуп на земјиштето и нема никакви проблеми, никој досега се нема пожалено. Чекаме, и додека официјално не биде усвоен ДУП нема ништо да се гради на таа локација - вели Момо Николовски, портпарол на општината Ѓорче Петров.

НА ЕЗЕРОТО МЛАДОСТ

На продажба два плаца за тениски игралишта

На брегот на езерото Младост кај Велес ќе бидат изградени две современи тениски игралишта. Плацевите што ќе се продаваат преку јавно наддавање се во близина на хотелот Романтик", мотелот Езеро Младост" и објектот на Уни проком банка. Површината на плацевите изнесува 7.432 квадратни метри за едниот и 5.231 квадрати за другиот плац. Продажбата, според условите, ќе биде со почетна цена од 300 денари по квадрат и платен депозит од 222.960 денари за првиот и 156.930 денари за вториот плац.

Според условите, право на учество на јавното наддавање што ќе се одржи на 25 март годинава во просториите на Министерството за транспорт и врски имаат сите правни и физички лица од земјата и државјани на земји од ЕУ и ОЕЦД. По изборот на најдобрите понудувачи Министерството склучува договор и се обврзува во рок од девет месеци да му обезбеди одобрение за градба од општина Велес, а идниот сопственик објектот треба да го изгради во рок предвиден согласно одредбите на Законот за градба.

По изградбата на угостителските и комерцијални објекти, викендиците, објектите за домување, изградбата на колекторот за отпадните води и уредувањето на плажите, велешкото езеро се повеќе го привлекува вниманието на домашните и странски туристи. Со изградба на две тениски игралишта и продажбата на уште триесетината плацеви наменети за угостителство езерото Младост ќе стане идеално место за одмор и рекреација не само за велешани, туку и за жителите од Скопје, Свети Николе, Штип и други градови од Македонија.