Аеродроми

ПРЕДВРЕМЕНИТЕ ИЗБОРИ ГО ОДЛАГААТ ЈАВНИОТ ОГЛАС

Ќе почека изборот на нов газда на аеродромите

Неопходно е да ги дадеме аеродромите под концесија за да се остварат значителни инвестиции,за што во овој момент немаме пари , вели министерот Миле Јанакиески

Се замрзнува планот на Владата за давање на македонските аеродроми под концесија ако се закажат предвремени парламентарни избори во јуни. Иако заврши претквалификацискиот повик, на кој над 20 странски компании изразија намера да станат стопанственици на аеродромите, Законот за спречувањето на корупцијата налага целата постапка да се одложи до изборот на новиот состав на Ссобранието.Од денот на донесување одлука за распишување избори до нивното завршување, вклучувајќи го и рокот за жалби, односно до издавањето решение за добиен мандат на пратеник, не може да се отуѓува државен имот - вели Мирјана Димовска, претседателка на Државната комисија за спречување на корупцијата.

ИНТЕРЕСОТ ГОЛЕМ

Деновиве се очекуваше да биде објавен огласот за доделување концесија за градба, реконструкција и за користење на аеродромите „Александар Велики“ во Скопје и „Св. Апостол Павле“ во Охрид и за изградба на нов карго-аеродром во Штип. Меѓу заинтересираните компании се споменуваат виенскиот и парискиот аеродром, како и аеродроми од Германија и од Грција. Македонските воздушни пристаништа ќе се издаваат на 20-годишна концесија. Инвеститорот треба да вложи 200 милиони евра во реконструкција и осовремување на аеродромите, при што има обврска да ги задржи сите вработени во аеродромското претпријатие „Македонија“ најмалку седум години.Утврдени се условите што концесионерот мора да ги исполни во определен рок. Неопходно е да ги дадеме аеродромите под концесија за да се остварат овие цели, за кои се потребни значителни инвестиции, за што немаме пари. Со доделување на концесијата на инвеститор што има значително искуство за користење и развој на аеродромски услуги ќе добиеме поефикасни аеродроми. Со тоа ќе се зголеми и бројот на превезените патници и товар - изјави министерот за транспорт Миле Јанакиески.

СЕРИОЗНИ ОБВРСКИ

Според условите од јавниот оглас, еден концесионер ќе ги добие аеродромите во Скопје и во Охрид, а штипскиот може да го добие и друг инвеститор. Концесионерот на „Александар Велики“ за 20 месеци треба да изгради нова терминална зграда со минимална површина од 40.000 квадратни метри и со шест порти за патници. Пистата ќе се продолжи за 500 метри, со што ќе се овозможи слетување на воздухоплови за директни прекуокеански летови. Концесионерот има обврска да постави системи за земска и за сателитска навигација, да изгради паркинг за автомобили и пристапен пат, нова клучка, да ја догради административната зграда и да изгради нов карго-терминал. „Свети Апостол Павле“, пак, за 12 месеци од одењето под концесија треба да добие нова навигациска опрема, ВИП-објект, пречистителна станица и реконструирана аеродромска зграда. Штипскиот аеродром треба да биде со полетно-слетна патека од 2.400 метри, со можност за продолжување до 3.000 метри. Системите за инструментална и визуелна навигација и радионавигациските уреди треба да се постават три години по потпишувањето на договорот.Аеродромот во Штип во почеток би бил за карго-превоз и алтернатива за потребите на цивилната авијација. Намерата ни е во иднина да прерасне во главен аеродром во Македонија. Местоположбата на скопскиот аеродром диктира прескапи зафати за да се подигне неговата категорија - истакнува Јанакиески.

Став

Продолжена агонија

Предолго трае агонијата на скопскиот аеродром, кој повеќе личи на меѓуградска автобуска станица отколку на главна воздушна порта низ која пристигнуваат странските посетители. Условите на аеродромот со „велико“ име не се достојни ниту за нашите граѓани. Ако во концесијата се најде единственото решение за доближување на македонските воздушни пристаништа до европските стандарди, не е јасно зошто постапката се влече со години. За модернизирање на аеродромите се зборува многу одамна, но за тоа време речиси ништо не се направи. Се земаа и кредити за нивно опремување и обновување, но од тоа не се виде никакво фајде. Остана надежта дека странскиот инвеститор ќе биде многу поодговорен газда од државата и ќе вложи пари со цел аеродромите во земјава да заличат европски. Додека ние губиме време, земјите во регионот не претркаа и нивните аеродроми станаа модерни авиопристаништа на кои слетуваат сите водечки авиокомпании и секоја година соборуваат рекорди по бројот на патниците. За тоа време скопскиот и охридскиот аеродром пропаѓаа поради претерано вработување и нестручно раководење од партиски гарнитури. Најтрагичниот епилог беше појавата на безбедносни дупки, кои се закануваат „Александар Велики“ да го стават на црната листа со небезбедени аеродроми од терористички закани. Тоа ќе биде најтрагичниот крај на долгогодишната агонија

Dnevnik