Аеродроми

Аеродромите да се дадат под концесија, предлага консултантот

Холандската фирма "Нако" ја оценува состојбата со пистата на скопскиот аеродром како критична

ВЕРЧЕ ГЕОРГИЕВСКА

Скопскиот и охридскиот аеродром можат да бидат предмет на интерес на странски концесионери кои би ги развиле авиопристаништата и би го зголемиле бројот на патници. Ова стои во студијата што ја изготвува холандскиот консултант "Нако" за развој и унапредување на двата аеродрома во државава. Во студијата, која се очекува да се комплетира до крајот на месецот, "Нако" согледал дека бројот на патници на скопскиот аеродром во наредните години нема да падне под 500.000 на годишно ниво. Како еден од предусловите кои Холанѓаните ги посочуваат во прилог на развојот на "Александар Велики" е близината на слободната економска зона, потоа растот на бруто-домашниот производ од 5,28 отсто со тенденција за зголемување, како и либерализацијата на визниот режим. Сите овие фактори, според холандскиот консултант, ќе придонесат за зголемување на авиосообраќајот, а дополнително ситуацијата ќе се подобри и со појавата на нискобуџетните авиокомпании. Но, како што посочува консултантот, за да дојдат евтините авиокомпании, една од клучните работи кои Македонија треба да ги направи е да се укинат привилегиите кои МАТ ги има како редовен национален авиопревозник.

Во студијата на "Нако" најлошо се оценува состојбата со пистата на скопскиот аеродром "Александар Велики". Токму таа треба да биде приоритет на идниот концесионер, кој треба да ја прошири и подобри категоријата на патеката за летнување и слетување или, пак, да изгради нова. Според нашите сознанија, консултантот предлага, меѓу другото, пистата да се продолжи од двете страни по околу 200 метри за да се олесни летнувањето и слетувањето и да се овозможи да слетуваат поголеми авиони, што досега беше хендикеп.

Студијата за развој на скопскиот аеродром опфаќа подготовка на проект за проширување и обновување на постојниот или за изградба на нов терминал за 1,5 милион патници со можност и за 2,5 милиони. "Нако" предлага, наместо проширување, изградба на нова терминална зграда веднаш до постојната, во правец на хангарите кои се во функција на армијата.

Холанѓаните предлагаат авиопристаништата да се дадат под концесија, потоа државата да стане нивни целосен сопственик или, пак, предлага лабава државна сопственост. Ако Владата се реши за концесија, тогаш ќе дојде предвид моделот БОТ (вложи, управувај и остави), што меѓу другото го предложи и консултантот "Скот и Вилсон", ангажиран од претходната Влада.

Целосната студија "Нако" ќе ја изготви до крајот на годинава, бидејќи Владата планира да распише тендер за концесионер во јануари или во февруари доколку државата се реши авиопристаништата да се дадат под концесија. Во тој случај, извесно би било дека во мај или јуни 2008 година ќе се знае кој ќе вложува и управува со скопскиот и со охридскиот аеродром.

Од моментот на распишување на тендерот за избор на консултант за изработка на студија како да се развијат аеродромите, нема никакви инвестициони активности за подобрување на состојбата со авиопристаништата, бидејќи се чека анализата на "Нако". Сепак, директорот на јавното аеродромско претпријатие "Македонија", Зоран Крстевски, вели дека за идната година се предвидени околу 5 милиони евра за инвестиции, кои треба да се завршат до почетокот на летната сезона во авиосообраќајот, односно пред доаѓањето на новиот концесионер. Крстевски истакнува дека дел од парите ќе се потрошат за опрема за аеродромите. Но, дел од парите ќе се наменат за изградба поголем број излези на скопскиот аеродром и повеќе места за пасошки контроли.

"Авиосообраќајот годинава е зголемен за 16,5 отсто и до крајот на 2007 ќе се превезат околу 630.00 патници, што е за 100.000 повеќе од лани. Има и пораст на операциите за 8,9 отсто. Овие бројки се резултат на намалување на цените за аеродромските услуги", вели Крстевски.