Реонски Центар Аеродром

Елена Мачевска

Огромни купишта од шут се создаваат на секој чекор во Реонскиот центар во Аеродром, реагираат жителите што живеат во околните згради. Според нив, од секој нов објект што се гради во нивна непосредна близина, градежниот отпад се фрла на тоа место затоа што на тој простор има ископано дупки поради изградбата на нови згради во овој дел од општината. Реонскиот центар до пред извесно време беше едно од најзапуштените места во општината и во негово заживување многу малку се инвестираше. Сепак, во последниот период на тоа место се градат огромен број станбени згради, а од страна на Општината на овој простор е најавена и изградба на зграда на општинската администрација, основно училиште и градинка. Поради ваквата градежна офанзива која владее во центарот, како што тврдат надлежните, тешко може да се контролира исфрлањето на целиот градежен отпад што секојдневно се создава. Сепак, граѓаните сметаат дека надлежните институции треба да воведат ред околу создавањето на дивите депонии кои се строго забранети. - Секој ден се натрупуваат се поголеми количества шут. Мора надлежните да ја решат ваквата состојба што е можно поскоро затоа што после наместо да го исфрлат создадениот шут, истиот се рамни и на него никнуваат нови објекти - вели жител од Реонскиот центар. И од Општина Аеродром не негираат дека на тоа место се насобира шут. Тие само кратко ни одговорија дека на посоченото место во Реонски центар Аеродром, шутот кој се насобира во последниот период се рамни бидејќи теренот се подготвува за изградба на основно училиште во согласност со проектот, во соработка со Министерството за образование. Во меѓувреме се прават и геомеханички испитувања на носивоста на теренот. Од ЈП „Комунална хигиена“, пак, не знаеја да ни кажат дали закопувањето на градежниот шут, односно неговото мешање со земја, е дозволено и тоа на места каде што подоцна е предвидено да се гради. - Немам информации дали шутот може да се срамнува со земја, односно дали тоа е дозволено. Инаку, строго е забрането да се создаваат диви депонии од градежен шут. Ваквите остатоци од градежни материјали задолжително мора да се носат на депонијата „Дрисла“ - вели Катерина Лаова, портпаролка на ЈП „Комунална хигиена“. Таа вели дека иако сите граѓани знаат дека исфрлањето шут на недозволени места е казниво со закон, сепак ретко кој ги повикува комуналните екипи да го соберат создадениот отпад. За расчистување на дива депонија создадена од градежен отпад, екипите на ова комунално претпријатие наплатуваат по 1.080 денари за товарен кубен метар. Во Законот за јавна чистота, пак, јасно стои дека е забрането фрлање градежен материјал, како и палење, закопување и уништување на истиот. Доколку Законот се прекрши, следуваат казни од 1.000 до 2.000 евра за фирма, како и за трговец-поединец, а за граѓаните кои фрлаат шут на недозволена локација е пропишана казна од 50 евра.