Веро Центар

„Веро“ од септември чека муштерии

На 1 септември ќе биде отворен новиот трговски центар „Веро“ што се гради на просторот спроти Народна банка. Претстојното лето ќе биде искористено за внатрешно доуредување на просторот и за опремување и вселување на дуќаните.

Објектот со површина од 40.000 квадратни метри, кој е меѓу најголемите трговски центри во Македонија, се гради веќе две години. Инвеститорот, грчката фирма „Веропулос“, досега во него потроши околу 40 милиони евра.

Главниот менаџер за продажба, Христос Капсурис, вели дека во центарот ќе има се' што му треба на еден човек кога тргнува во шопинг. На граѓаните ќе им понуди можност да купат производи од познати светски марки, на кои се навикнаа одејќи на шопинг во Грција, како што се продавницата за деца Jumbo, потоа New Yorker, Betty Barclay, Office shoes, Oxette и други. Ќе има и многу македонски фирми.

Капсурис е убеден дека посетителите ќе се чувствуваат многу пријатно во објектот, оти не е клаустофобичен, туку напротив, има многу отворен простор и светлина во големи количини. Новина за наши услови е што паркинг освен во подрумот, ќе има и во приземјето. Капацитетот е за околу 4.000 возила.

- Објектот е комплетно застаклен и има сончев покрив. Градбата е пространа и модерна, а во неа се употребени материјали според стандардите на ЕУ. Посебно внимававме на убавите нешта, на естетиката и на природната светлина. За граѓаните е обезбеден и затворен паркинг на две нивоа, внатре во зградата. Сметаме дека е многу е важно секој што ќе пазари во објектот да не стравува за временските услови надвор. На пример, ако врне, тоа нема да е проблем, оти автомобилите се внатре. Паркингот ќе биде бесплатен за сите муштерии - вели Капсурис.

Во трговскиот центар ќе има вкупно 42 пространи продавници, 19 лифта, ескалатори и подвижни ленти по кои купувачите ќе може да се движат сосе количките за пазарење, како и 96 безбедносни камери.

На првиот кат ќе се наоѓа супермаркет „Веро“. Со површина од 4.700 квадратни метри, со висина колку три ката, односно до покривот на центарот, и со 20 каси, маркетот ќе биде најголемиот во Македонија. На муштериите ќе им нуди околу 10.000 производи, продажба на готвена храна и на свежа риба во секое време, како и можност да гледаат како се меси и се пече леб во застаклена пекарница. Наспроти маркетот ќе се наоѓа голема продавница Jumbo за детски играчки, која ќе се протега и на вториот кат, исто како и New Yoker.

На вториот кат ќе има голем атриум, кој како тераса се надвиснува над маркетот. Тука е предвиден простор од околу 300 квадратни метри за игротека, а ќе има и „Мекдоналд“, десетина големи дуќани за облека, чевли, дреболии и часовници. Ќе има хемиско чистење, фризерница, пицерии и неколку кафулиња, како и ресторан во кој ќе се подготвува грчко гиро.

На третиот кат ќе бидат сместени канцелариите на дирекцијата на „Веро“, која ќе се пресели од досегашната локација во Тафталиџе.