Маџир Маало

Да се избрише трасата на булевар Крушевска република и на трамвајската линија, да не се гради црква, да се урбанизира просторот десно од проектираниот булевар Никола Карев и да се зголеми со поткровје катноста на објектите кои сега е зацртани како приземје и два ката. Овие измени ги побараа жителите на населбата Маџир Маало на јавна дебата по повод предлог-планот на општина Центар. Тие усвоија заклучок да ги достават своите предлози до премиерот Никола Груевски и до надлежните министерства, градот и општината. - Генерално не сме против донесување детален план, но сакаме таков план кој ќе одговара за сите граѓани. Повеќе од 40 години не може да се реши проблемот со Маџир Маало, а сега сакаме да се реши до крај. Ако дозволиме населбата да се расцепка со булеварот Крушевска република, таа ќе ја загуби пазарната цена и во неа ќе нема живот - нагласи еден од присутните жители. Лидија Андреевска, планер и проектант на „Инпума“, фирмата што го изработи планот, пред граѓаните објасни дека овој ДУП се носи преку програма на Владата за приоритетни планови и посочи дека во новата проекција габаритот на булеварот е намален од 85 на 65 метри. - Во моментот кога градот ќе има пред себе Генерален урбанистички план кој нема да го вклучува булеварот на оваа локација, тој ќе може да се избрише и од деталниот план - изјави Андреевска. Таа додаде дека локацијата за црква е земена од план на Општина Центар и од направени ископи кои тука покажале постоење на постар храм. - Планот условно речено е направен како тантела бидејќи парцелите кои ги имате според катастарот се многу мали, а во нив секој, без да бара согласност од соседите, ќе може да гради. Планот ви е потребен и за да може да се изградат водоводна мрежа, канализација, мрежа за топлификација и за да се направат улиците - нагласи Андреевска. Од Град Скопје велат дека градоначалникот Костовски ја прифатил иницијатива од граѓаните за дислокација на булеварот Крушевска република. - Во моментов се работи на студија за наоѓање ново сообраќајно решение со кое од ГУП ќе се избриши постојната локација низ Маџир Маало - велат од Одделението за односи со јавност на градот. Меѓу другото, некои жители реагираа и за решението од Управата за заштита на културното наследство со кое целата населба и неколку определени куќи во неа се земаат за заштитено подрачје и со тоа е спречено нивно менување, туку само конзервирање. - Маалото е ставено под заштита бидејќи е првата целина во Македонија изградена според урбанистички план и се смета за вредно во однос на неговата улична мрежа, која не дозволува поголеми објекти - објасни Снежана Герасимова-Матоска од Управата за заштита на културното наследство.

Врз основа на член 24 и член 26 став 8 од Законот за просторно и урбанистичко планирање (пречистен текст) /“Службен весник на РМ” бр.24/08/, Градоначалникот на Општината Центар, го издава следното

С О О П Ш Т Е Н И Е

Се известуваат граѓаните и правните лица од Урбаната заедница Раде Јовчевски Корчагин дека Градоначалникот на Општина Центар – Скопје донесе Решение за организирање

ЈАВНА ПРЕЗЕНТАЦИЈА И ЈАВНА АНКЕТА

по Предлог на Детален урбанистички план за градска четврт Маџир Маало Општина Центар – Скопје.

 Границите на опфатот се :

• Северозапад: трасата на булеварот Кочо Рацин се до мостот на реката Вардар;

• Север: од мостот на реката Вардар кон запад по кејот на реката Вардар се до Транспортниот центар;

• Североисток: трасата на улица Никола Карев;

• Југоисточно: следејќи ја трасата на ул. Никола Карев.
  

Јавната презентација на Предлог на Детален урбанистички план за градска четврт Маџир Маало Општина Центар – Скопје ќе се одржи во просториите на УЗ Раде Јовчевски Корчагин на ден 29.10.2008 година (среда) во 10,00 часот.

Предлог на Детален урбанистички план за градска четврт Маџир Маало Општина Центар – Скопје ќе биде изложен во просториите на УЗ Раде Јовчевски Корчагин 10 работни дена, сметано од денот на објавувањето на Соопштението, секој работен ден од 10-17 часот.

Контакт телефон 3203 605

Во определениот рок заинтерисираните правни и физички лица од конкретното подрачје опфатено со Планот можат да доставуваат забелешки, предлози и мислења на анкетните листови.

                                                                             ОПШТИНА ЦЕНТАР