Текнохосе пред три години на Бунарџик го купи напуштениот објект наречен Тајванска зграда, а лани го закупи и земјиштето на 50 години.

Во објектот инвеститорите ќе направат фабрика за производство на хидраулични цевки и гумени црева за автомобилската и градежната индустрија.

Според плановите, кои претходно ги одложи економската криза, производството треба да почне уште оваа година, а ќе се извезува во Источна Европа и Русија.

Покрај повластиците што ги дава државата, близината на Македонија до овие пазари е клучен фактор за изборот на земјава како производен центар на компанијата.

Проценетата вредност на инвестицијата е десет милиони евра, а треба да вработи 150 лица.

Тоа ќе биде трета фабрика во технолошко индустриската развојна зона Скопје. Статистиката покажа дека работата на постоечките две значително придонесува за зголемување на извозот.

Веста за стартот на работите на Бунарџик неофицијално ја потврдија и од владините институции.

Маја Томиќ


Дали има шанси последната најавена инвестиција на „Хаиер“ во зоната „Бунарџик“ да се реализира или, пак, и таа ќе остане во купчето веќе подзаборавени странски компании што закочија во фазата на меморандуми за инвестирање. Откако во јули годинава кинеската „Хаиер“ го раскина партнерството со јужнокорејската „Тривју“ за инвестирање во „Бунарџик“, од компанијата информираа дека продолжуваат сами, односно дека не се откажуваат од проектот.

Ниту тогаш ниту во изминатите два месеца не беше кажано нешто поконкретно, кога и како се стартува со реализација на инвестиција, а не се пласираа ни некои нови информации. Се' уште не се знае колкаво земјиште ќе биде земено под закуп, дали истото или некое друго и кога ќе се стават темелите и ќе почне производството.

Од Агенцијата за странски инвестиции информираат дека кон средината на октомври главниот човек на тимот што е одговорен за оваа инвестиција треба да дојде на преговори со Владата. Од тие преговори, велат во Агенцијата, потоа требало да произлезе нешто поконкретно. Кинезите ќе дошле и порано, велат од оваа институција, но не можеле затоа што во Кина не се работело неколку дена поради државен празник.

Значи, останува неизвесноста и околу реализацијата на вложувањето, иако од Агенцијата се децидни дека проектот нема да пропадне, затоа што досега такво нешто не било посочено од „Хаиер“.

Инаку, во почетокот на јули „Тривју“ се повлече од заедничкиот проект со „Хаиер“ за изградба на фабрика за производство на ЛЦД-телевизори и монитори во „Бунарџик“. Во писменото соопштение беше кажано дека причината за тоа е глобалната криза, но дека „Хаиер“ има цврста намера самостојно да го реализира инвестицискиот проект што беше во фаза на планирање околу две години и сега се наоѓал во финална фаза, односно започнување на активностите. За новонастанатата состојба со неуспехот на договорот како виновни не беа посочени македонската Влада и институциите.

Инаку, лани на 16 септември во „Бунарџик“ беше направена промоција на почетокот на заедничка инвестиција на двете компании, а вредноста се проценуваше на девет милиони евра. Беше најавен брз старт на ставање на темелите и почеток на производството во мај годинава, а притоа директорот на Агенцијата за странски инвестиции, Виктор Мизо, изјави дека целата потребна документација за оваа инвестиција ќе биде завршена за три недели, а потоа ќе биде удрен и камен-темелникот.

Владата претходно, есента 2008 година, имаше потпишано меморандум за разбирање со „Тривју“, а кон средината на март 2009 година „Тривју“ и „Хаиер“ склучија меѓусебен договор за заедничка инвестиција во „Бунарџик“.

Инаку, според претходната верзија на инвестицијата на „Хаиер“ и на „Тривју“, требаше да се закупат 7.300 квадратни метри од „Бунарџик“ и да се вработат за почеток околу 100 лица.

„Хаиер“ важи за најголемиот производител на компјутери на кинескиот и на светскиот пазар.

Италијанската компанија „Текнохосе“ која треба да гради фабрика за армирани гумени цевки во Бунарџик тврди дека нема да има поголеми одложувања во реализацијата на инвестицијата, иако и по четири месеци од потпишувањето на договорот за закуп на земјиштето на терен се уште не се почнати градежни активности. Според првичните најави на Италијанците, производството на автомобилските делови во технолошката зона треба да почне од наредната година, но на терен се уште не е почнато со пренамената на зградата што пред две години ја купија од Тајванците. Од фирмата велат дека во изминатите месеци работеле на проектот за реконструкција на објектот кој е завршен. Во тек бил избор на градежни компании кои ќе ја градат фабриката, а во наредните неколку недели ќе почнеле и со избор на работници. -Не планираме некои посебни одложувања на процесот. Почетокот на активностите најмногу ќе зависи од времето на реконструкција на зградата и од обуката на персоналот во Италија - вели Селена Панесе од „Текнохозе“. Италијанците по двегодишно одложување на инвестицијата, договор за закуп на земјиштето потпишаа годинава, во мај. Според Законот за слободните економски зони, Владата еднострано го раскинува договорот доколку инвеститорот во наредните девет месеци од денот на потпишувањето не почне со градба. Инаку, инвестицијата на „Текнохосе“ се проценува на девет милиони евра и треба да обезбеди вработување за 150 луѓе.

С. М.