Такси превоз

Компанијата располага со педесетина нови возила, а ќе почне со работа следниот месец

Возилата се наполно нови, марка „шкода октавија“ и ќе бидат во жолто-бела комбинација

Кон средината на идниот месец на скопските улици ќе почне со работа нова такси-компанија со педесетина нови возила марка „шкода октавија“ во жолто-бела комбинација. Возилата се веќе набавени и моментно им се монтираат такси-таблите и уредите за гас. Компанијата ќе се вика „Наше такси“ и ќе вработува поголем број возачи кои ќе работат во смени. Возачите се бираат на оглас што е распишан во соработка со Агенцијата за вработување. Сите ќе бидат вработени, ќе поседуваат лиценци за работа и ќе имаат правила на облекување и однесување во возилото и кон патникот. Според европските искуства, секое возило ќе се мие неколкупати дневно, а патниците ќе добиваат и екстра-услуги за користењето на оваа компанија. Сопственик на возилата е еден од сопствениците на месарниците „Промес“.

„Нашата компанија ќе биде препознатлива по неколку новини, унифицираниот изглед на возилата, возачите и услугата што ќе ја нудиме. Ќе склучуваме договори и со фирми, но најмногу очекуваме да не' прифатат граѓаните на кои ќе им понудиме квалитет во превозот“, изјавуваат во „Наше такси“.

Возилата, според новиот правилник кој важи од годинава, ќе бидат опремени со заштитни ремени и на задните седишта, АБС-кочници и воздушни перничиња. Сите возила, возачите и патниците ќе бидат осигурани од несреќи, што е новина во такси-превозот. Возилата се опремени и со фискални таксиметри. (С.Н.)