Ски центар Кожуф

На Кожуф и летово се гради

Убавините што ги нуди Кожуф го импресионираа и претседателот Ѓорге Иванов

Ангел Данов

И надвор од сезоната, на скијачкиот центар „Кожуф“ интензивно се работи. Интензивирана е изградбата на новиот регионален пат Р112, со кој покрај тоа што се поврзуваат два региона, ќе се воспостави директна врска меѓу општината Гевгелија и скијачките терени на Кожуф. Изведувач на новиот пат е компанијата „Гранит“, која за изведување на градежните работи на регионалниот пат набави комплетно нова механизација. Моментно на планината Кожуф се отворени околу 4 километри (од вкупно 16 км) од новиот регионален пат, почнувајќи од туристичкото место Смрдлива Вода. Проектот е дел од планот на Владата за обнова на патната мрежа на државата.

„За целокупната инвестиција, Владата издвои околу седум милиони евра, а градежните активности е предвидено да завршат в година, со што пристигнувањето до скијачкиот центар ќе биде побезбедно и во зима“, велат од ски-центарот.

Убавините што ги нуди Кожуф го импресионираа и претседателот Ѓорге Иванов, кој деновиве го посети скијачкиот центар. Тој рече дека доколку му дозволат работните обврски, ќе се врати на Кожуф и во текот на сезоната. Раководството на „Ски Кожуф“ му ги презентира реализираните активности и плановите за иднина. „За наредната сезона ќе биде завршен и регионалниот пат што го поврзува овој центар со Гевгелија, а помина и проектот за новиот пристапен пат од Демир Капија преку Крњево до Ски-центарот. На тој начин се реализира основниот предуслов, инфраструктурно поврзување на овој комплекс“, рече извршниот директор на компанијата „Ски Кожуф“, Ангел Наков, и најави дека во тек се градежни активности за уште еден ски-лифт. Тоа значи дека за претстојната сезона љубителите на скијањето на располагање ќе имаат една шестседечка жичница и три ски-лифта. Поради економската криза, одложена е изградбата на нова жичница.

Се' поголем е интересот за купување плацови за изградба на викенд-куќи. Меѓу оние кои најверојатно ќе градат викендички, се спомнуваат и Горан Пандев, Врбица Стефанов и Тодор Гечевски. На прашањето дали сака да купи плац, претседателот Иванов одговори дека ќе размисли, бидејќи се' уште немал доволно заработено. Моментно се гради викенд-куќа на фудбалскиот репрезентативец Горан Мазнов, вредна над 100.000 евра. И низ населбите на скијачкиот центар механизацијата работи на средување на патишта со цел подготовка за претстојната скијачка сезона.

Развојниот план за ски-центарот се однесува на целогодишниот центар, што вклучува и урбана зона со повеќе од 1.000 куќи, како и ски-центар во регионот на планината Кожуф на локалитетот Момина Чука, 500 метри оддалечен од Зелен Брег, на надморска височина од 2.200 м. Во рамките на посетувалиштето ќе биде вклучена инсталација на нови ски-лифтови, урбан комплекс, хотели, центар за конференции, трговски продажен мултимедијален центар, ресторани, ноќни клубови, барови, казино, вештачко езеро...

„Инвестицијата ќе даде нова димензија на туризмот, а посебно ќе ја развие туристичката индустрија на општината Кавадарци, околните општини и, генерално, целиот јужен и источен дел на Република Македонија“, велат првите луѓе на „Ски Кожуф“. Граничната поставеност на ски-центарот со Грција гарантира услови за летно-зимскиот туризам, како и за успешна трговија.

На Кожуф е убаво и во лето, во што се уверивме и ние при нашата посета. Шумските плодови се насекаде низ центарот. Прекрасните патеки за прошетка и климата гарантираат прекрасно поминати мигови и во лето.

Центарот е отворен и во овој период, може да се преноќува во вила „Тодоров“, како и во апартманите на скијачкиот центар.