Повеќе од 40 приватни форми и градежни компании доброволно ќе се вклучат во големата акција за чистење на речните корита во државава која ја спроведува Владата преку Министерството за транспорт и врски што е планирана да почне идната недела

Повеќе од 40 приватни форми и градежни компании доброволно ќе се вклучат во големата акција за чистење на речните корита во државава која ја спроведува Владата преку Министерството за транспорт и врски што е планирана да почне идната недела. Ова е продолжение на акцијата од минатата година кога генерално се уредуваше коритото на Вардар.
- Во масовната акција реките ќе се чистат од градежен шут, одпад, од растенијата, а на местата каде што е потребно ќе се вршат реконструкции на коритата. Минатогодишната интервенција на Вардар беше оценета како успешна, но останаа само уште неколку делови каде што треба да се интервенира. Во Скопје ќе се работи на потегот од Железниот мост во Сарај до хотелот Александар Палас, со посебен акцент на левиот брег, потоа од мостот Близнак кон Јурумлери, а ќе се реконструира и коритото кај мостот во Орешани, како и на каналот во Таор. Истовремено ќе се чистат Лепенец, Брегалница, Пчиња, Црна Река и Драгор - информира Драган Јовановски од Дирекцијата за заштита и спасување.

Освен градежните фирми, во уредувањето на речните корита ќе се вклучат и јавните претпријатија, општините, армијата со механизација и луѓе, Министерствата за животна средина, за транспорт и врски, за земјоделство, Дирекцијата за заштита и спасување, Центарот за управување со кризи. За сите вклучени во акцијата ќе биде обезбедено гориво и потрошен материјал, транспорт на машините кои не се самоходни, а работниците ќе добиваат дневен надомест од по 1500 денари.

Минатата година за чистење на коритото на Вардар во Скопје беа ангажирани 600 лица.
Акцијата има за цел зачувување на животната средина и еколошка заштита на реките, а е превенција од поплави.