Веро Центар

Финишира новиот „Веро“, локалите распродадени

Александар Момировски	Коментари (0)

40 илјади квадратни метри во завршна фаза. Огромниот комплекс на грчко „Веро“ веќе е резервиран за познати бренд имиња, но уште пред да се отвори странците се соочуваат со проблеми со општинската власт.

Менаџерите се жалат дека локалната власт не реагира и не го чисти теренот од времените објекти околу трговскиот, а не ја реализира ниту обврската за изградба на улицата зад трговскиот кој треба да го олесни пристапот до шопинг центарот.

„Околу објектот постојат две-три бараки коишто се нелегални и за коишто ние добивме решение и дозволи за нивно уривање заради тоа што самата поставеност на бараките, дури го спречуваат и влезот на возилата во самиот центар и никој нема храброст и не презема иницијатива да ги урне овие бараки“, рече Константинос Теодосијадис, „Веро“.

Од општина Центар велат дека утре ќе излезат со свој став за проблемите на „Веро“. Во меѓувреме, трговскиот иако недоизграден веќе е распродаден. Резервирани за под закуп се речиси сите локали.

Стотици апликации со понуди за кафетерии, ресторани, бутици, дуќани стасале на адреса на компанијата. Менаџерите најавуваат и влез на популарни брендови во трговскиот меѓу кои е и познатиот „Џамбо“.

„Ќе биде закупнината во некои нормални рамки, во моментот не можам да одредам заради тоа што зависи од многу фактори, зависи како прво од местоположбата која ќе ја има продавницата, зависи и на катот на кој ќе биде“, вели Теодосијадис.

Во отсуство на посериозни инвестиции од типот на фабрики и големи преработувачки капацитети кои во голема мера се проекти блокирани и од економската криза, трговските центри се ретки успешни примери за странски вложувања во земјава.

По грчки „Веро“, турски „Рамстор“, словенечки „Туш“ и домашната „Тинекс“, трговски центар ќе се гради и кај скопска „Алумина“ од страна на израелската компанија „Газит Глоуб“.                                                                                                            http://www.time.mk/read/NONE/477268410c/index.html