Спортски објекти (општо)

Спортско рекреативен центар на кејот на реката Кумановка

Стеван Цаневски

Патека за Формула 1 е новата идеја на премиерот Никола Груевски, кој за ваков спектакуларен проект, кој државата би ја чинел околу 300 милиони евра, веќе разговарал со неколку компетентни личности, дознава „Шпиц“.
Претседателот на владата остварил контакт со одредени лица што важат за најстручни околу Ф1-спортот во нашата држава, при што ги добил и основните информации за изградба на патека за Формула 1. Меѓу другото, Груевски побарал да му биде доставен и детален проект за тоа колку точно пари ќе бидат потребни за реализација, во која премиерот, како што пренесуваат нашите извори, гледа уште еден добар начин за промоција на државата.
Портпаролот на Агенцијата за млади и за спорт, Тане Димовски не даде коментар на овие информации.
- Ние како Агенција за млади и за спорт не сме биле во контакт за реализација на ваква идеја. За сите поконкретни информации најдобро би било да побарате одговор од владата на Република Македонија - рече Димовски.
Идејата официјално не ја потврдува ниту владиниот портпарол Мартин Мартиновски.
- Засега, на ниту една владина седница не станало збор за изградба на патека за Формула 1 - изјави Мартиновски.
Со оглед на фактот дека се уште станува збор само за идеја, нормално е што во владиниот кабинет немало конкретни разговори на оваа тема, велат упатените во планот на Груевски.
Патека за шампионатот во Формула 1 мора да ги задоволува највисоките стандарди што ги поставува првиот човек на Ф1, Берни Еклстон. Впрочем, токму Еклстон дава јасни препораки за тоа какви се материјали треба да се користат при изградбата на патеката, и со самото тоа, ја диктира високата цена за изградба на еден ваков сериозен проект. Сумата достигнува и до огромни 300 милиони евра, пари колку што потроши Турција за изградбата на својата патека во Истанбул. Слична е и инвестицијата на Русија, која најавува градска трка низ улиците на Москва.
Сепак, главен проблем претставува фактот што Македонија нема да може да добие никакви гаранции дека со изградбата на ваква патека сигурно ќе добие организација на трка во Ф1-шампионатот. Имено, дури по евентуалната изградба на патеката, претставниците на Формула 1, предводени од нејзиниот шеф Берни Еклстон би допатувале во Македонија за да дадат зелено светло. Сепак, постои и реална опасност тоа да не се оствари.
Ваквата идеја на владејачката гарнитура наидува на големо изненадување кај финансиските експерти. Слободан Најдовски смета дека е потребен сериозен проект за реализација на ваков инфраструктурен зафат, но во секој случај тоа не би требало да биде приоритет на владата.
- Како граѓанин на Македонија секако дека би сакал да видам трка во Формула 1 во нашата држава, но гледано од економски аспект, сметам дека тоа е невозможна мисија. Дури и доколку постои можност за такво нешто, тоа никако не смее да биде приоритет на владата, која мора да се грижи за далеку посериозните проблеми со кои се соочува - вели Најдовски.
Ако навистина има интерес за реализација на проектот за патека за Формула 1, него, според Најдовски, мора да го водат спонзори, а не македонските власти.
- Треба да се направи целосна програма, да се утврди кога би можеле да се вратат овие пари. Ако владата навистина има толку многу пари за вложување, би им порачал тие средства да бидат насочени за подобрување на инфраструктурата на патиштата. Тоа ќе бидат далеку подобро искористени пари, отколку за евентуална изградба на Ф1-патека - коментира Најдовски.