Спортски објекти (општо)

Ако некогаш се реализира урбанистичкиот план, запуштениот хиподром ќе стане репрезентативен објект каков што заслужува главниот град 

Скопскиот хиподром, стар шеесетина години, кој сега е запуштен и неугледен, ќе стане современ рекреативен центар со хотел, покриени трибини и со други содржини, ако еден ден стане реалност Детаљниот урбанистички план на Општина Гази Баба.

Клубот за коњички спорт „Илинден“, кој стопанисува со објектот, мака мачи со средства за негово елементарно одржување. Оттаму велат дека преживуваат со 17.000 денари месечно, што ги добиваат од Агенцијата за млади и спорт.

- Се најдовме неколкумина ентузијасти за да ја задржиме намената на овој објект, бидејќи е единствен во регионот и е многу значаен за коњичкиот спорт. Одвојуваме сопствени средства за да опстане хиподромот и да се прехранат коњите - вели Фарух Омерагиќ, член на управата на клубот.Градската власт вели дека не е надлежна и нема намера да преземе нешто за заживување на хиподромот.

Нацрт-планот, кој е во изработка, предвидува хиподромот да стане современ спортско-рекреативен центар со многу нови содржини. Мирослав Марковски, раководител на Секторот за урбанизам во Општината Гази Баба, објаснува дека се опфатени 42 хектара површина во две урбани парцели. Едната е спортско-рекреативниот центар „Хиподром“ за коњички спорт и втората е за рекреација и зафаќа 4,5 хектари. Во првата парцела се предвидува простор за коњички турнири, со патеки за галоп и трки со каскање, како и патеки со пречки. Треба да има покриени трибини со 1.500 седишта, а во поттрибинскиот простор гардероби, санитарни јазли и мали комерцијални објекти.

Хиподромот ќе добие и две простории за дресура на коњите со трибини за 400 седишта и комерцијални објекти под трибините. Планирани се и простории за клубот, кој ќе има приземје и кат, со површина од 1.200 квадратни метри. Ќе бидат изградени и 10 штали за 200 коњи, хотел за спортисти, со површина од 9.000 квадратни метри и со 120 легла. Ќе има терени за тенис, кошарка, ракомет и одбојка, детско игралиште, забавен парк, простор за ролање, вештачка карпа за искачување и водени површини.

Хиподромот сега располага со 20 коњи и една штала, магацински простор и простории за чување опрема. Има и три простори за тренинзи со коњите, кои имаат специјална подлога од песок во висина до 15 сантиметри, простор за загревање пред државни, регионални и меѓународни натпревари, со површина од 8.000 квадратни метри и со трибина за 2.000 гледачи, како и угостителски објект. Има и две асфалтирани пристапни патеки, паркинг и угостителски објект.

Омерагиќ нагласува дека последниве неколку години хиподромот е заграден со рампи за да се спречи влегувањето со автомобили. Хигиената е на завидно ниво, поставени се канти и буриња за отпад, а живата ограда редовно се кастри. Главната врата ноќе се затвора заради поголема безбедност на целиот објект.Хиподромот има училиште за јавање и во него може да се запишат деца од 7-годишна возраст. Еден час јавање чини од 300 до 600 денари.

ЌЕ СЕ ГРАДИ СПОРТСКО-РЕКРЕАТИВЕН ЦЕНТАР ВО БЛИЗИНА НА СМИЉКОВЦИ

Езерото што ладеше лимови ќе ги лади скопјани

Покрај вештачкото езеро на Железарницата, според планот на Општина Гази Баба, ќе се градат спортски игралишта, базен, патеки, ресторани, кафулиња, продавници, камп, мотел...

Засега на езерото се рекреираат само рибарите

Вештачкото езеро кај село Смиљковци, кое порано ги ладеше челичните лимови од Железарницата, сега ќе ги лади скопјани. Со програмата на Општина Гази Баба е опфатено малото езеро, во чија околина се предвидуваат терени за спорт и за рекреација. Езерото сега е напуштено и за него не води сметка никој. Порибено е, па околните жители тука често ловат риба. Активностите ќе почнат напролет, од страната на северната заобиколница. Нацрт-урбанистичкиот план за овој спортско-рекреативен центар е на Агенција за планирање на просторот.

Планирана е изградба на игралишта за ракомет, одбојка, тенис, кошарка, мал фудбал... Просторот ќе биде збогатен и со детски базен и игралиште, ролерско- велосипедска и пешачка патека, како и рекреативен спа-центар со дополнителни содржини (ресторани, кафулиња, продавници...). На овој простор е планиран и камп и мотелски комплекс. Просторот на кој е предвиден овој центар зафаќа околу 45 хектари. На западната страна е планирана улица, а на северната страна е заобиколницата.

- Агенцијата за планирање на просторот работи на сообраќајното решение за да може граѓаните, веројатно со клучка, да имаат пристап до автопатот, објаснува Мирослав Марковски, раководител на Секторот за урбанизам, просторно планирање и за заштита на животната средина, комунални дејности и уредување на градежното земјиште во Општина Гази Баба. Од Агенцијата за планирање на просторот ни рекоа дека не сакаат да даваат никакви информации за подготовките. Засега Општината има само програма што предвидува ревитализација на постојното мало езеро со партерно уредување на околината. Оттаму информираат дека претходно било планирано со Нацрт-урбанистичкиот план да се опфати и поголемото езеро, кое се наоѓа во непосредна близина, но ова е одложено поради далноводот што минува оттука.

До 15 ноември, Општината Гази Баба треба да добие согласност од Министерството за транспорт и врски, а потоа и од Министерството за земјоделство, бидејќи се работи за земјоделско земјиште од кое 80 проценти се државна сопственост. Потоа Урбанистичкиот план, кој сега се работи во нацрт-верзија, треба да биде усвоен од Советот на Општината, а на крај следува неговата реализација.

- Бидејќи 80 проценти од земјиштето се на Република Македонија, најверојатно ќе биде дадено на лицитација, на која ќе биде избран инвеститорот, кој ќе го гради спортскиот комплекс - вели Марковски. Тој истакна дека можеби и ќе и' се понуди на Агенцијата за млади и спорт за да ги изгради, на пример, тениските игралишта. Изработката на овој урбанистички план е приоритет на Владата на Република Македонија, за што таа издвои 1.300.000 денари.

http://dnevnik.com.mk/?ItemID=5C55B63A0158D04085DF184FF74E2C29

Агенцијата за спорт ќе гради тениски терени

Агенцијата за млади и спорт денеска го презентираше владиниот проект за изградба на 100 тениски терени во поголемите градови во Македонија. Се работи за 25 тениски центри со по четири терени наменети за домашни и меѓународни натпреварувања.

Директорот на агенцијата, Ивица Георгиевски истакна дека терените ќе бидат од цврста подлога, а ќе бидат во сопственост на општините.

Терените треба да бидат готови до 2009 или 2010 година, а целиот проект ќе чини четири до пет милиони евра.

„Се решивме да изградиме 100 тениски терени, кога размислувавме дали би требало да изградиме вакви терени со цврста подлога или земјена подлога, земавме повеќе аспекти, повеќе фактори. Овие тениски терени да бидат во сопственост на општините каде што ги градиме и потоа ќе бидат одговорност на општините, за да ја намалиме одговорноста, за полесно одржување се решивме овие терени да бидат со цврста подлога“, изјави Ивица Георгиевски, директор на агенција за млади и спорт.