Споменици и скулптури (општо)

Спомен-плочата на Перо Наков пред триесетина години беше поставена пред Домот на АРМ, на местото каде што се наоѓале затворските зандани во кои починал

Обележјето беше тргнато кога почнаа градежните работи на Куќата на Мајка Тереза

Снежана Калабакова

„На секои три месеци одев да положам цвеќе на спомен-плочата на мојот чичко Перо Наков. Еден ден, кога се приближив до споменикот на Мајка Тереза, многу непријатно се изненадив кога забележав дека плочата е фрлена помеѓу градежниот материјал оставен за изградба на Спомен-куќата на Мајка Тереза. Им реков на мајсторите дека местото на едно спомен-обележје не е таму. Оттогаш помина време, објектот се изгради, а спомен-плочата на Перо Наков не е вратена на место“, вели Билјана Цуцулова, внука на овој великан и еден од членовите на врвот на политичкото раководство на НОБ на Македонија.

Цуцулова телефонски се обратила до Министерството за култура, од каде што барала некој да ја информира што се случува, но, како што вели, до ден-денес не добила никаков одговор, па со право се прашува каде завршила спомен-плочата. Цуцулова смета дека не е в ред едни спомен-обележја да се уриваат за да се изградат други. Сега нејзиното семејство ќе бара од Министерството за култура спомен-плочата на Перо Наков да се врати на старото место, независно дали и колку таа сега ќе се вклопи во околината на Спомен-куќата на Мајка Тереза.

Од Министерството за култура одговараат дека спомен-плочата ќе биде повторно поставена веднаш штом Здружението на борците од НОБ и Градот кажат точно на кое место да се постави.

„Спомен-плочата за мене беше гробно место на мојот чичко, затоа што никој не знае каде е неговиот гроб. Перо Наков починал во затворските зандани што се наоѓале зад Домот на АРМ, каде што сега е спомен-собата на Мајка Тереза, и никој не знаел каде завршило мртвото тело на чичко ми. Токму затоа, кога пред триесетина години се градел Домот на АРМ, во знак на спомен кон него била поставена и спомен-плочата. За нас и за македонската историја е особено важно спомен-плочата на Перо Наков да се врати на истото место и некој мора да го предвидел тоа“, објаснува Цуцулова.

„Спомен-плочата на народниот херој Перо Наков е дислоцирана од страна на градежната фирма ’Гранит‘ пред почнувањето на изградбата на Спомен-домот Мајка Тереза, а со дозвола на Град Скопје. Спомен-плочата сега се наоѓа во магацинот на ’Гранит‘, заштитена, конзервирана и реновирана согласно со сите процедури за заштита и таа ќе биде повторно поставена штом ќе се добие информација за точното место“, објасни Анита Јованоска, портпаролка на Министерството за култура.