Ексклузивно: Рамстор со нов лик и нов концепт на работа

Модерен лик, луксузни кафулиња, ресторани, игротека. Трговскиот центар Рамстор за неколкум месеци ќе доживее целосна трансформација. Директорот Џеладин Џули  ексклузивно за МТВ го претстави новиот изглед. Почнаа градежните работи. Ќе се модернизира и најмалиот детаљ. Новиот лик ќе донесе и нов концепт на работа.

„Од плочките до таванот, до осветлувањето, до влезните врати, целосно ќе се смени. Добро познатиот дел за брза храна на Рамстор ќе добие убава тераса, исто така на горниот кат ќе имаме луксузни помодерни ресторани и кафулиња. Не ги заборавивме ни најмладите, ќе имаме доста модерна игротека во рамките на трговскиот центар“, изјави за МРТ, Џеладин Џули, иректор на трговскиот центар.

Задоволството на потрошувачите за првиот човек на трговскиот центар е врвен приоритет. Ќе има забава за целото семејство, пазарувањето ќе биде позабавно за сите. Зависниците од шопинг ќе добијат нови модни брендови кои за првпат ќе се појават на македонскиот пазар.

Се планира да се отворат нови работни места. Градежните работи ќе ги изведуваат македонски компании. Рамстор почна со еден супермакеркет и еден трговски центар. Денес има над 14 низ целава земја, а до крајот на годината ќе се отворат уште 2.

Експанзијата нема да застане тука. Догодина ќе се отвораат нови 10 Рамстор супермаркети.

Mодернизацијата на Трговскиот центар Рамстор треба да заврши за три месеци, а целата инвестиција е околу 2 милиони евра. Првиот Рамстор беше отворен во 2005 година.

http://mrt.com.mk/node/14931

ЗА ДВА МЕСЕЦА ПОЧНУВА ВНАТРЕШНА И НАДВОРЕШНА ОБНОВА НА ОБЈЕKТОТ

И трговскиот центар „Рамстор“ со нова фасада

Анела Петрова

По речиси девет години откако беше изграден, трговскиот центар „Рамстор“ годинава ќе биде реконструиран и ќе добие нова фасада. Зградата е амортизирана, и тоа е причината што раководството се одлучило на ваков чекор, информира Елида Трајковска, специјалист за односи со јавноста и за други операции во трговскиот центар „Рамстор“. Според неа, објектот ќе се обнови и однатре и однадвор, но не открива детали за почетокот на обновата и за идниот изглед.

- Поминаа речиси девет години откако профункционира трговскиот. Мора да се преземе нешто и да се следат светските содржини - рече таа.

Она што е сигурно, според неа, е воведувањето нови содржини.

- С` додека не се добие одобрението за изведба на градежните работи, не сакаме да откриваме детали. Можеме да кажеме само дека објектот ќе добие комплетно нова фасада - истакна Трајковска.

Проектот е веќе готов и е предаден на одобрување во нивната матична фирма во Турција, а барањето за градежна дозвола во Општината Центар с` уште не е доставено до локалната самоуправа. Трајковска рече дека ќе го достават најдоцна за еден месец. А ако биде одобрено, градежните активности би почнале во април или во мај. Потоа, јавно ќе обелоденат с` и ќе ја информираат јавноста за активностите.

Трајковска не сакаше да обелодени ништо ни за финансиската конструкција. Kако што кажа, и за тоа чекаат согласност од матичната фирма во Турција, која треба да им даде одобрение за сумата, заедно со проектот.

Трговскиот центар „Рамстор“ е првиот трговски центар со глобални стандарди во Македонија и пошироко во регионот со повеќе од 90 избрани дуќани, кои ги задоволуваат вкусовите, потребите и буџетот на посетителите. Тој почна да функционира на 11 јуни 2005 година и е синџир на интернационалните малопродажбени супермаркети на „Мигрос Турк Т.А.Ш.“, кој е дел од „KОЧ холдинг“.

Трговскиот центар е место со кафетерии, ресторани за брза храна, бутици, сместени на простор од 25.000 квадратни метри, со неколку киносали и просторија за забава на деца, каде што може да се помине слободното време. Исто така во рамките на трговскиот има безбеден паркинг, банка, салон за убавина, хемиско чистење, фотостудио и многу други поволности за задоволување на вкусовите на посетителите.

http://dnevnik.mk/?ItemID=04DD440FDEB8084CA85B239BA299637D