Булевар Јане Сандански

Градот Скопје денеска ја започна најавуваната реконструкција на булеварот Јане Сандански во општина Аеродром, на потегот од крстосницата со булеварот Србија до крстосницата кај ресторанот „Мекдоналдс“ близу трговскиот центар „Бисер“. Иако најавувана до улицата Васко Карангелески, локалната власт се одлучи овој сегмент од булеварот да го обнови во втората фаза од реализацијата на овој проект, за која веќе е распишан тендер. „Сообраќајницата на овој потег ќе се реконструира во должина од околу 700 метри, во двете насоки. Во текот на градежните работи на булеварот Јане Сандански ќе се изгребе постојниот оштетен асфалтен слој, а каде што има потреба ќе се засили подлогата. На површина од 21.200 метри квадратни ќе се нанесе нов асфалтен слој од Сплит Мастикс, кој дава дополнителен квалитет на асфалтот“, изјави градоначалникот на Скопје Коце Трајановски.

На одредени делови од булеварот ќе се санираат тротоарите и ќе се нивелираат 40 шахти и сливници, а оштетените рабници ќе се заменат со нови. Рокот за изведба е 60 работни дена. Градежните активности на терен ќе ги врши оперативата на претпријатието „Гранит“ од Скопје. Во претстојниот период се очекува избор на најповолен понудувач кој ќе ја изведува реконструкцијата на овој булевар до крстосницата кај „Мајчин дом“.