Зграда од 23 ката со вкупна висина од 105 метри ќе доминира над вкупно 20-те објекти што се предвидени да се градат во кругот на фабриката „Алумина“ со новиот детален урбанистички план за тоа подрачје што го подготви општината Карпош, а општинскиот совет ќе треба да го усвои на наредната седница. Висококатницата треба да биде хотел, но се остава можност да стане и станбена зграда ако инвеститорот го посака тоа.

На подрачјето на оваа општина ќе има и други урбанистички промени, според најавите на градоначалникот Стевчо Јакимовски. Така, напролет ќе почне да се уредува реонот меѓу населбите Карпош 3 и 4, каде што ќе се гради трговски центар. Засега јавните објекти како пензионерскиот дом, црквата и спортските терени ќе треба да почекаат за да се решат имотноправните проблеми.

- Голем дел од оваа парцела стана приватна сопственост со денационализацијата, па ќе мора дополнително да утврдиме каде што ќе може да се гради. Местото каде што ќе се прави трговскиот центар отсекогаш било приватно и таму нема пречки за да почнат градежните работи. Фирмата што ќе ги изведува ни најави дека за половина година ќе почне со работа - рече Јакимовски.

И булеварот Партизански одреди ќе добие нов лик со хортикултурното уредување во делот од населбата Карпош 3.

- Овој булевар е огледало на нашата општина и затоа треба да го уредиме и да спречиме возилата да се паркираат во тревата покрај него. Напролет ќе се садат цвеќиња и ниски украсни грмушки и дрвја, односно целиот потег ќе биде уреден како делот пред Факултетот за туризам - додаде Јакимовски.

Веќе се градат жардиниерите за овие садници и до наредната пролет ќе бидат целосно готови тие од мостот „Обединети нации“ до Карпош 3. Потоа овие градежни работи ќе продолжат и кон Влае и кон Карпош 1.

Тоа што најскоро ќе почне да се спроведува се 40-те проекти за реконструкција на улици, од кои 27 се или почнати или ќе почнат до крајот на неделава, а уште 13 од наредната недела. Некаде ќе се обновува асфалтот, некаде тротоарите, а на некои места ќе се поплочат пешачки патеки. За овие работи се обезбедени 40 милиони денари од општинскиот буџет.