Трговски објекти (општо)

МИНИСТЕРСТВО ЗА ТРАНСПОРТ И ВРСКИ

Конкурс за изградба на голем трговски центар

Министерството за транспорт и врски објави оглас за отуѓување на градежно земјиште, сопственост на Република Македонија, по пат на јавно наддавање, коешто се наоѓа во Општината Гази Баба, а е наменето за изградба на Б2 - големи трговски единици. Предмет на јавното наддавање е градежно неизградено земјиште, сопственост на Република Македонија, предвидено со Деталниот урбанистички план за дел од УЗ Маџари" урбан блок 3 - локалитет кино Маџари", Општина Гази Баба, усвоено со Одлука на Советот бр. 07-2784/10 од 30 јуни 2009 година. Земјиштето е со вкупна површина од 4004 квадратни метри, на коешто е предвидено да се изградат Б2 - големи трговски единици. Површината за градење е 1949 квадратни метри, процентот на изграденост е 48%, коефициентот на искористеност 1.26, а висината од нивото на заштитниот тротоар до венецот изнесува 9.2-13.2 м/П+1-П+2.

Право на учество на јавното наддавање имаат физички и правни лица. Заинтересираните физички и правни лица треба да поднесат пријава за учество на јавното наддавање во писмена форма, во согласност со условите од објавата, во затворен плик со назнака на пликот за јавно наддавање" и за која парцела се однесува пријавата, комплетирана со следните докази: пријава за учество на јавното наддавање, доказ за платен депозит, за физичките лица уверение за државјанство, доказ за регистрација на правното лице од соодветен регистар, уредно полномоштие за полномошникот што го претставува правното лице, односно доказ за својството овластено одговорно лице на правното лице. Почетна цена на земјиштето што е предмет на јавното наддавање е 6.000,00 денари за квадратен метар.

Пријавите за учество на јавното наддавање можат за да се доставуваат најдоцна до 14 јули 2010 година, на адресата на Министерството за транспорт и врски, улица Црвена скопска општина" бр. 4 во Скопје или непосредно во архивата на Министерството.
Јавното наддавање ќе се одржи на 21 јули 2010 година во просториите на Министерството за транспорт и врски.

Земјиштето за трговски центар кој со урбанистички план е предвиден да се гради зад киното „Маџари“ во општина Гази Баба за еден месец треба да добие сопственик. Министерството за транспорт и за врски распиша оглас со кој бара инвеститор за парцелата. Таа ќе се продава по почетна цена од 6.000 денари за метар квадратен. Трговскиот ќе зазема простор од 4.000 квадратни метри, од кои градбата ќе се протега на 1.950 квадрати, со висина од девет до 13 метри, односно со приземје и со два ката. - Во согласност со ДУП се предвидени трговски единици на една градежна парцела со еден објект или комплексна градба. Предвидено е паркирањето да се реши во рамките на градежната парцела - вели Емилија Кипровска, задолжена за информирање од Општина Гази Баба. Со изградба на трговскиот центар треба да се подобри урбанизацијата на Маџари, каде и онака не се нудат многу содржини за жителите. Единствената карактеристична точка во населбата е старата руинирана зграда која некогаш била кино и сведочи дека во овој дел од градот се случувале културни настани. Сега нејзината состојба е очајна, фасадата на објектот се лупи и во делови пропаѓа, целата зграда е исчкртана што покажува дека за неа никој не се грижи. Единствено зачувани се натписот „Кино Маџари“ и покривот, кој барем однадвор изгледа солидно. Жителите од околината, кои честопати сакаат да навраќаат овде, велат дека местото е многу запуштено. - Општината постави клупи и еве се грижи и за тревата, но тоа не е доволно. Местово се уште изгледа запуштено и не е целосно средено. Некои од клупите се оштетени, па не може да се седи на нив, а и фонтаната не функционира како што треба. Општината малку го уреди дворот на киното, но не го одржува редовно. За самиот објект, пак, се уште ништо не се презема. Го направија народна кујна, додека во истиот простор работи и матичната служба - вели Вале, жителка од населбата. За тоа како ќе функционира еден модерен градски трговско-деловен центар веднаш до руинираното кино со исчкртани ѕидови, во општината не добивме одговор. Оттаму не кажаа дали во скоро време планираат нешто да преземат за конечно да го решат проблемот со прастарата зграда и да и дадат соодветна намена. Дотогаш постарите жители во своите сеќавања ќе го паметат некогашното кино, како и основното училиште што било сместено во истата зграда. Општинарите ветувале и дека објектот ќе стане свечена сала за венчавање бидејќи се наоѓа блиску до локалната црква „Свети Спас“, но засега нема ништо од ваквите најави.

Ќе се гради трговски центар на граничниот премин Богородица