ТИРЗ Скопје - Бунарџик

Безброј меморандуми за „Бунарџик“, каде се фабриките?

Премиерот потпиша повеќе меморандуми со странски компании, но во зоната засега е само „Џонсон контролс“

Александрија Стевковска
Нина Нинеска-Фиданоска

Станува ли „Бунарџик“ само зона на празни ветувања и потпишани безброј меморандуми за разбирање, без конкретна реализација или, пак, оваа локација навистина ќе прерасне во своевидна инвестициска оаза во земјава, во која ќе никнат голем број фабрики? Оваа дилема се наметнува откако премиерот Никола Груевски во изминативе неколку месеци потпиша повеќе меморандуми со реномирани странски компании проследени со огромна медиумска помпезност, но она што засега е факт е дека на слободната зона во близината на Скопје, засега, функционира само фабриката на американската „Џонсон контролс“.

Британската „Џонсон Мети“, француската „Монтипе“, словенечката „Искра“, италијанската „Орланди“, турскиот „Бортекник отомотив“ се само дел од познатите брендови кои премиерот Груевски спектакуларно ги најавува како главни адути за развој на македонската економија. Со првите луѓе на овие компании, македонскиот владин естаблишмент веќе го стави својот параф на меморандумите. Се патуваше во Франција, Италија, Турција, се организираа презентации и серија други промотивни активности, се' во функција овие вложувања да се прикажат безмалку како сигурни, иако сите се само ран предвесник за можни инвестиции.

„Џонсон Мети“, британска компанија која требаше да почне да гради фабрика за катализатори во „Бунарџик“ уште во април годинава, се' уште го нема потпишано договорот со Владата за закуп на локацијата. Потпис на овој документ се најавуваше дека ќе се стави веднаш по изборите, кои се одржаа на 1 јуни, но и по четири месеци се' уште нема ништо ново на тој план. Факт е дека извесни подготвителни активности се случуваат на терен, но темелите на новата фабрика не можат да се удрат се' додека не се изрегулира ова прашање. Од Владата убедуваат дека доцнењето е од техничка природа и дека прашање на време е кога ќе стартува изградбата.

„Во постапка е да се потпише договорот за закуп. Овластениот претставник Колин Џефри во моментов е зафатен, така што, штом тој ќе најде слободен термин, договорот ќе биде потпишан. Значи, доцнењето е чисто формално. Една од причините за доцнењето е и фактот што компанијата речиси во последен момент да го зголеми капацитетот на фабриката, така што има нова динамика на релација. Работата не е дојдена нож до коска и затоа се неразбирливи притисоците од јавноста“, изјави за „Утрински весник“, Марјан Јованов, директор на Дирекцијата за слободни економски зони.

Според него, на парцелата на „Џонсон Мети“ веќе се прават редица подготвителни активности, односно компанијата врши геомеханички истражувања, објектот е ограден, се носат материјалите, а во меѓувреме се вршат усогласувања со нашата законска регулатива.

Во врска со „Монтипе“ со кој беше потпишан меморандум за разбирање само неколку дена пред изборите, Јованов вели дека нашите власти се во секојдневна комуникација со оваа компанија. „Монтипе“ ги врши сите неопходни подготвителни активности, така што се очекува изградбата на фабриката да почне во предвидениот рок - март идната година. Истото важи и за словенечка „Искра“ која, според одговорните, е еден од сигурните играчи за „Бунарџик“. „Потпишувањето меморандум за разбирање значи 99 отсто желба кај двете страни за да се реализира одредена инвестиција. Но, од моментот на потпишување продолжуваат да течат куп технички и подготвителни активности за тој проект“, вели Јованов. Според него, една работа е факт, дека „Бунарџик“ беше ливада, а сега прераснува во индустриска зона.

Инаку, „Џонсон Мети“ имаше намера да закупи 13,8 хектари од земјиштето на економската зона „Бунарџик“. Според најавите, објектот требаше да биде готов до крајот на ноември годинава. Фабриката на „Монтипе“ би требало да биде готова идната година, по што ќе почне производството на прототип. Словенечка „Искра“ најави дека во „Бунарџик“ ќе гради фабрика за производство на електронски делови.

За време на престојот во Италија премиерот Груевски, придружуван од министерот за финансии, Трајко Славески, и директорот на Агенцијата за инвестиции, Виктор Мизо, во Бреша го потпишаа меморандумот за разбирање со италијанскиот гигант „Орланди“. за производство на приклучни уреди за камионската и индустријата за земјоделски машини. И турски „Бортекник отомотив“ ќе гради фабрика во „Бунарџик“, барем според сегашните најави. За тоа, исто така, во Истанбул беше потпишан Меморандум за соработка, кој предвидува компанијата за шест до седум месеци да изгради фабрика за производство на калапи и елоксиран алуминиум.