Телеком арена (арена Филип II Македонски)

ДЕЛ ОД ГРАДСКИОТ СТАДИОН ИНТЕНЗИВНО СЕ ГРАДИ

Север никнува, УЕФА може да дојде на гости

Ако дозволи УЕФА, со Шкотска и со Холандија можеби ќе играме од 17 часот

Северната трибина на Градскиот стадион во Скопје, која е во изградба, почна да никнува над земја. Тоа беше еден од условите што ФФМ неодамна го посочи пред да повика гости од УЕФА да дојдат во контрола на објектот. Понатамошното користење на овој единствен фудбалски храм во земјава за потребите на најдобрата репрезентација, ќе зависи од нивната виза. Со оглед дека „Бетон“ работи деноноќно, во текот на месецов или во наредниот, ФФМ ќе ги повика гостите од Нион. Луѓето, задолжени за безбедноста на стадионите треба да дадат инструкции како да се обезбеди градилиштето за да може да се играат фудбалски средби. Луѓето од УЕФА требаше да дојдат пред квалификацискиот натпревар со Швајцарија за играчи до 21 година за да го видат и стадионот во Куманово, но поради зафатеност ја одложија посетата за подоцна - вели Никола Костов, генералниот секретар на ФФМ. Од оваа сезона почнува категоризацијата на стадионите. За да се играат меѓународни натпревари, стадионот треба да биде најмалку рангиран во втората категорија, а тоа значи дека мора да има рефлектори и покриена трибина. Каде и кога ќе ги игра квалификациските натпревари македонската фудбалска репрезентација за СП 2010, останува голем товар за челниците на ФФМ. Со уривањето на северната трибина на Градскиот стадион во Скопје и рефлекторите од истата страна, ФФМ очекува најпрвин дозвола од УЕФА да го користи овој засега единствен стадион за организирање меѓународни средби од највисок ранг со подигање заштитна ограда. Ако добиеме дозвола, натпреварите од 9. квалификациска група, на 6 и на 10 септември годинава, со Шкотска и со Холандија, во Скопје, ќе се организираат во дневен термин. Во тој период, најдоцниот временски термин за почеток на „дневен“ фудбалски натпревар е 17 часот. Ситуацијата може да ја смени само Спорт 5, кој ги има ТВ-правата од настапите на нашата репрезентација. Во првичните разговори со нивниот застапник на оваа тема имаше размислување да биде донесено привремено осветление. За реализација на оваа идеја, математиката треба да си ја направи токму имателот на ТВ-правата, кој ќе пресмета колку ќе добие, а колку ќе загуби со продажбата на ТВ-правата од овие натпревари. Ако се играат дневни средби, и ние ќе останеме покуси во планираните финансиски средства - вели Харалампие Хаџи-Ристески, претседателот на ФФМ. Рокот за пријавување на времето за почеток на натпреварите е 30 дена пред нивното одигрување.

(Д.Н.)

Dnevnik