Телеком арена (арена Филип II Македонски)

УЕФА во август ќе одлучи каде ќе игра Македонија

Мечевите со Холандија и Шкотска може да се играат дење, но тогаш ќе бидат проблем ТВ-правата

Емил Китановски

Сериозната најавата дека фудбалската репрезентација на Македонија своите квалификациски мечеви против Шкотска и Холандија во септември да ги одигра надвор од границите на нашата земја, ги раздвижи сите фактори од кои зависат работите врзани со изградбата на северната трибина на Градскиот стадион во Скопје. Од ФФМ стигнуваат позитивни најави дека изведувачот на работите на Градски, дал уверување дека поголемиот дел од работите на овој спортски објект ќе бидат завршени до терминот кога треба да се одиграат квалификациските мечеви.

Ако е тоа навистина точно, значи дека изведувачот ќе ја отстрани едната од главните причини заради која може да дојде до дислокација на стадионот на кој ќе се одиграат мечевите. Затворената северна трибина, на која не би се изведувале градежни работи видно ќе ги зголеми шансите на ФФМ пред доаѓањето на надлежната комисија на УЕФА. Извори од Федерацијата велат дека Комисијата на УЕФА може да направи контрола најдоцна еден месец пред почетокот на мечевите, а тоа значи во август.

Досегашното искуство на другите федерации по ова прашање вели дека ставот на УЕФА е различен и се одредува од случај до случај. Изворот кој ние го исконтактиравме во Швајцарија, и кој инсистираше да остане анонимен, ни изјави дека доколку се завршени сите градежни работи на северната трибина, шансите мечевите да се одиграат во Скопје се „50-50“.

„Многу е важно нашата Комисија да ги прифати затекнатите состојби на вашиот репрезентативен стадион во Скопје. Мислам дека комисијата сигурно ќе го земе предвид фактот дека Македонија, за жал, нема втор репрезентативен фудбалски стадион и тоа на некој начин може да биде олеснувачка околност за вашата федерација. Сепак, најважно е да бидат завршени градежните работи во Скопје“, ни изјави функционерот на УЕФА, кој досега во истата функција (ревизија на стадионите) веќе неколкупати беше во Македонија.

Алтернативните стадиони кои се примени од УЕФА, во Прилеп и Струмица, се приказна за себе. Таму тревната површина веќе подолго време бара комплетен ремонт, а за осветлувањето воопшто да не говориме. Првите проценки велат дека за поставување на соодветно осветлување на овие два стадиони ќе бидат неопходни околу еден милион евра, кои засега нигде ги нема.

Втората сериозна пречка пак, дуелите против Шкотска и Холандија да не се одиграат во Скопје, може да биде сопственикот на ТВ правата на македонската фудбалска репрезентација, Холдингот „Спорт 5“ од Германија, со кој ФФМ има потпишано долгогодишен договор. Имено, оваа куќа како сопственик на ТВ правата на репрезентацијата, веројатно ќе инсистира мечот да се одигра во вечерен термин, односно 20,45, кој полесно може да им го продаде на Холанѓаните. Ако на Градски во септември не бидат поставени рефлекторите ова може да биде уште еден сериозен проблем и да предизвика конфликт на ФФМ - „Спорт 5“.

„Се' уште е многу рано да се даваат точни и прецизни одговори кога станува збор за ова прашање. Нас како сопственици на ТВ правата на фудбалската репрезентација ни е најважно во Македонија да се обезбедат најоптималните услови мечевите да се одиграат во Скопје. Значи ние од се срце посакуваме изведувачот на градежните работи да си ги заврши своите обврски преземени со договорот, а потоа ние како рамноправни партнери со раководството на ФФМ се надевам ќе го изнајдеме најдоброто решение“, ни изјави Слободан Вујчиќ, кој има влијателна улога во германскиот холдинг.

Сепак, кога станува збор за терминот кога ќе се одиграат мечевите, него го одредува ФФМ како организатор на мечот. Значи, последното е на Федерацијата, која може и мора во овој случај да си ги заштити интересите на фудбалската репрезентација.

Средбите со Шкотска и со Холандија ќе се играат во Белград или во Софија?

ЈП кое стопанисува со Градски завчера ја извести ФФМ дека привремено ќе ги извади рефлекторите

Емил Китановски

Јавното претпријатие кое стопанисува со станбен и деловен простор и во рамките на своите ингеренции располага со Градскиот стадион во Скопје, пред два дена ја извести фудбалската федерација на Македонија (ФФМ) дека по извршените стручни консултации со изведувачите на градежните работи на овој фудбалски храм, реши привремено „да се ослободи“ односно да ги извади рефлекторите на Градскиот стадион во Скопје. Во образложението на ваквата своја одлука надлежните од Јавното претпријатие ја известуваат ФФМ дека последните активности ќе ги преземат за да полесно ги довршат започнатите градежни работи во комплетната изградба на северната трибина. Последниот потег на Јавното претпријатие и дефинитивно ги закопа сите надежи на љубителите на фудбалот во земјава дека во септември и покрај градежните работи на Градски ќе можат да проследат репрезентативен фудбал во Скопје. Имено, во рамките на новиот квалификациски циклус за пласман на СП, во овој термин во Скопје треба да гостуваат фудбалските репрезентации на Шкотска и Холандија. Ситуацијата дополнително се искомплицира бидејќи нашата земја нема втор репрезентативен фудбалски објект каде што би можеле да се одиграат квалификациски мечеви од овој ранг. Стадионите во Струмица и Прилеп ниту оддалеку не ги исполнуваат условите за да ги прифатат селекциите на Шкотска и Холандија, така што е се поизгледно дека ќе се случи еден парадокс и нашиот национален тим ќе биде приморан мечевите против Шкотска и Холандија, најважните дуели во новиот циклус според мислењето на селекторот Среќко Катанец, да ги одигра во соседството односно Софија или Белград.

Причините за оваа работа лежат во два големи проблеми со кои ќе се соочи ФФМ. Најпрво, строгите прописи на европската фудбалска асоцијација (УЕФА) наложуваат квалификациски мечеви за ЕП во никој случај да не се одигруваат на фудбалски објект кој е во фаза на реконструкција или изградба.

И второ, според истите правила за да се избегнат летните спарнини, и несаканите последици врз фудбалерите, УЕФА сугерира квалификациските мечеви на националните тимови кои треба да се играат во септември да се одиграат во ноќни термини, што во нашиот случај, по вадењето на рефлекторите на Градски ќе биде незамисливо.

Последното известување на Јавното претпријатие вчера беше примено во ФФМ со голема недоверба, бидејќи во минатото овие две институции функционираа одлично. Да потсетиме, ФФМ пред две години му префрли 500.000 евра средства добиени од УЕФА на сметката на Јавното претпријатие за средување (шминкање) на Градскиот стадион во пресрет на дуелот со националниот тим на Англија.

Тогаш беше поправена комплетната инфраструктура на Градски, беше направена мониторинг соба, амбуланта, а беше саниран и поправен и комплетниот водоводен и санитарен чвор на стадионот. За возврат Јавното претпријатие со ФФМ потпиша дванаесетгодишен договор за користење на стадионот за потребите на националните фудбалски селекции.