Според Законот за заштита на потрошувачи прикажување на три-четири цени за еден артикл или физички неодвоените производи со дисконт од оние со редовна цена, се казнува со глоба од повеќе од 600 евра

"Се за половина цена", "ликвидација", "купи едно земи две", "чистка", намаление, акција, снижувања, од 30, 50 па дури и 70 насто, а на артиклите со флуоресцентни прашалници или со интересни логоа испишани проценти и три, четири па дури и пет цени... Ваквите финти на трговците за придобивање на муштериите се казнува според Законот за заштита на потрошувачите со глоба од 600 евра до 1500 евра. Со истиот Закон трговците се задолжени физички да ги одвојат производите со дисконт од оние со редовна цена.

Одговорните од Државниот пазарен инспекторат информираат дека иако казните се големи, овој дел од Законот често пати свесно се забошотува поради тоа што трговците знаат дека купувачите полесно се придобиваат со прикажување на три-четири цени, а и производите со редовна цена побрзо се продаваат кога се заедно со намалената.

Екипа на Вечер деновиве имаше ексклузивна можност да биде дел од тимот задолжен за контрола на Законот за заштита на потрошувачите кој ги чешлаше дуќаните во ТЦ Рамстор. По случаен избор се инспекторираше продавница на елитен бренд за облека која имаше прикажано дека има намаление од 50 и 70 проценти.
- Имате намаление од 50 и 70 проценти, но ние констатираме многу помали проценти. На пример, цената на ова палто што чинела 10.000 денари била намалена за 30 %, односно на 7000 денари. Таа цена е избришана и под неа имате напишано намалување од 50 % и цена од 5000 денари, што не е реално бидејќи 50% од 7000 е 3500 денари. Тоа се гледа од вашите трговски книги, односно со извештајот за намалување на цени каде што основната цена е последната - 7000 денари, а не цената од 10.000 денари што сте ја зеле како основа. Означувањата не ви се реални бидејќи ниту еден артикал во вашата продавница нема намаление од 50% ниту пак 70% - му објаснија инспекторите на сопственикот на фирмата пред да го потпише записникот. Тие му предочија дека за прекршување на Законот за заштита на потрошувачи е казнет со мандатна казна од 600 евра во денарска противвредност, која треба да ја плати во рок од 8 дена и во истиот период е задолжен да ги отстрани етикетите со тројни цени. Ако не ја плати мандатната казна во дадениот рок, Инспекторатот ќе поведе "постапка за порамнување" со која се предвидува глоба до 1500 евра, а доколку и не се спроведе и таа постапка, тогаш за предметот расправа прекршочна комисија која одредува двојно повисоки казни.

Трговецот рече дека ги знае своите обврски, но сметајќи дека купувачите треба да знаат која била основната цена на артиклот, заборавил да направи извештај за зголемување на цените, во случајот да ги врати старите цени, па дури потоа да ги намали за 50%. Се согласи да ја плати глобата.

Во меѓувреме, во дуќанот влегуваа муштерии, но никој не купи ништо.
- Кај нас не се реални попустите како на Запад. Лани во Шпанија, од истиот овој бренд купив палто за 15 евра. Овде не ги носат ниту актуелните модели, а и овие стариве не очекувам да бидат поевтини од 80-тина евра - ни рече една девојка која ги разгледуваше моделите.

Вчера беа објавени резултатите од конкурсот за Наградата на Светскиот Самит за информатичко општество. Македонските претставници на глобалниот натпревар ги одбра мултидисциплинарното Жири на Светскиот самит за информатичко општество. Жирито имаше задача да одбере по еден претставник во вкупно осум категории на проекти кои нудат креативни и иновативни е-содржини.

Во категоријата Е-бизнис и трговија, жирито реши македонски претставник да биде инвестициониот портал www.broker.com.mk. Ова воедно беше и најконкурентната категорија со оглед на тоа дека кандидати за наградата беа компанијата Seavus со веб-алатката за проектен менаџмент ProjectOffice.Net, веб-порталот на Стопанската Комора на РМ, како и Babylon Software Solution со системот за едноставно креирање и одржување на интернет страна, WebStudio. Broker.com.mk освои најмногу гласови од жирито, односно вкупно 27 гласа. Второпласиран е проектот на Seavus со 24 освоени гласови, а трет по број на гласови беше веб-порталот на Стопанската Комора на Македонија со 16 гласа.

Во прилог следуваат победниците од сите категории:

е-култура и наследство 

Дигитален архив на македонскиот јазик 

Инвестиционен портал broker.com.mk 

Авантурите на Дино 

IT.com.mk - Портал за информатичка технологија 

epolicy.mk 

Македонски портал за ракот 

Мултибокс 

Млади инфо

Победниците во сите осум категории ќе ја претставуваат Македонија на глобалниот натпревар за Наградата на Светскиот Самит за информатичко општество.

Брокер - 29.12.2008

Едно претпријатие од јужна Србија деновиве ќе извезе 12 тони бурек во неколку западно европски држави.

Како што пренесоа локалните медиуми, претпријатието „Хамеум“ од Прокупље договорило извоз на бурек со месо и со зеленчук во Германија, Холандија и Швајцарија.

Сопственикот на претпријатието, Драгиша Миловановиќ вели дека извозот на бурек би бил многу поголем, да не се проблемите со усогласување на стандардите на Србија со европската унија за контрола на млечните производи, поради што е блокиран извозот на бурек со сирење.

Тој појаснува дека бурекот во европските држави најчесто го јадат гастербајтерите од земјите од поранешна Југославија, но во последно време се зголемува бројот и на локалното население кое сака да го вкуси овој балкански специјалитет.

Алфа - 10.10.2008

Општината Прокупље одлучи да и додели локалната компанија “Хамеум интернационал”, која извезува бурек од Србија, бесплатно уредено градежно земјиште за изградба на фабрика за бурек во која ќе бидат вработени 200 луѓе. Новата фабрика ќе му овозможи на “Хамеум” месечен извоз на 60 тони еколошки бурек на пазарите на Западна Европа и во Обединетите Арапски Емирати. “Хамеум” веќе има склучено договори за извоз на 30 тони бурек месечно во Германија и во Швајцарија, а неодамна склучи такви аранжмани и со Италија. Откако неодамна го доби HALAL стандардот, компанијата почна да извезува и во муслиманските земји. Бурекот на “Хамеум” всушност се пити со компири, јаболка, вишни, соја и печурки и празни пити кои се извезуваат печени и смрзнати. Тие се единствен производ на српската фурнаџиска индустрија кој го има стандардот HACCP.