Веро Центар

Да престане изградбата на деловниот центар на „Веропулос“ спроти Народната банка, додека не се размрси постапката за денационализација на ова земјиште, побара Антикорупциската комисија.

Комисијата пред четири месеци достави иницијатива до Обвинителството за кривично гонење на службеници од Министерството за транспорт и Комисијата за денационализација кои пред четири години биле инволвирани во овој случај.

Земјиштето во 2005 година било продадено на „Веро“ преку јавно наддавање, иако постапката за денационализација веќе била започната. Од Антикорупциска велат дека законски овој договор е ништовен, бидејќи постапката за враќање на земјиштето веќе била отпочната кога тој бил потпишан. Она што е најспорно во случајот е дека институциите биле запознаени со ова.

- Сега брзаат со градба за да потоа речат „не може да се руши“. Погледнете и ќе видите дека градбата е веќе завршена. Обвинителството мора да преземе мерки, а не да ја игнорира ситуацијава - вели Мирјана Димовска, претседател на Антикорупциската комисија.

Сопствениците на земјиштето четири години се заглавени во судски процеси. Во меѓувреме државата им понудила да им го откупи земјиштето за цена 15 пати помала од пазарната.

- Сакам да ми се врати она што ми припаѓа, па макар тоа да биде и еден метар квадратен. Има еден пример за Гинис, каде еден Парижанин со децении не сака да го продаде својот метар квадратен во центарот на Париз. И тоа стои, тоа е негово - вели Зорица Велкова, еден од сопствениците на земјиштето.

И Велкова и антикорупционерите очекуваат овој случај да добие завршница и соодветни мерки да бидат предземени од Обвинителството.