Трговски објекти (општо)

Отворен трговски центар „Сума“

Во Куманово во саботата свечено беше предаден во употреба новиот трговски центар „Сума“, сопственост на фирмата „МГ проперти“.

Центарот, во кој функционираат 20 објекти и се простира на 4.000 квадратни метри, свечено го отвори директорот на објектот, Горан Стојчевски.

„Во новиот објект засега се вработени 100 лица, а наскоро се очекува вработување на уште 150 работници“, рече Стојчевски.

Трговскиот центар е лоциран во центарот на градот и се наоѓа во просториите на поранешната фирма „Текстил промет“. Објектот е со два влеза и има обезбеден паркинг-простор. Во него веќе функционираат повеќе светски и европски бреднови, Инвест банка, а наскоро се очекува отворање на „СП маркет“. (МИА)

Турскиот „Рамстор“ ќе го проширува својот синџир маркети, со отворање нов супермаркет во општина Чаир. Од компанијата велат дека маркетот официјално ќе биде отворен за потрошувачите кон крајот на октомври или во почетокот на ноември. - Маркетот ќе се простира на површина од 1.700 квадратни метри, а во него ќе има кафетерија, пекарница и сето она што го има во веќе постојниот маркет и“вели Еркин Салих, одговорен за односи со јавност во „Рамстор“. Новиот продажен простор ќе биде во населбата Топанско Поле, а во моментот се изведуваат градежните работи околу приспособувањето на објектот, кој компанијата го изнајми за маркет. Според најавите на раководителите на „Рамстор“, предвидено е веднаш по отворањето, во маркетот да се вработат околу 50 луѓе, за чиишто работни места веќе подолго време се објавени конкурси, а најавуваат и зголемување на нивниот број. Веднаш по завршувањето на изградбата на супермаркетот во Чаир, првите луѓе на овој гигантски синџир на трговски центри и маркети од Турција најавуваат ширење на мрежата најпрвин во Скопје, а подоцна и во целата земја. - Нашите активности со отворање нови супермаркети и трговски центри нема да застанат со отворањето на новиот супермаркет во општина Чаир. Напротив, планираме да создадеме синџир маркети насекаде низ Скопје, а подоцна и низ целата земја. Во зависност од локацијата и од првичните процени колкава ќе биде потрошувачката, ќе зависи и големината на објектот, односно доколку се процени, не е исклучено да бидат изградени и мали, но и големи трговски центри во градот и“вели Ебру Радевски од ТЦ „Рамстор“. Во веќе постојниот објект во Скопје има повеќе од 90 дуќани и се простира на 25.000 квадратни метри површина. Во трговскиот центар „Рамстор“ дневно доаѓаат повеќе од 20.000 посетители, од кои 5.000 се посетители на супермаркетот. Трговскиот центар „Рамстор“ кај нас е отворен пред четири години и е синџир на интернационалните малопродажни супермаркети на Мигрос Турк, кој е дел од „КОЧ холдинг“, најголемата кооперација во Турција со вкупен промет од околу 12 билиони евра годишно.

„Конзум“ ќе се шири и во Македонија

„Сити центар“ и „Маркет гетро“ дадени на користење без употребна дозвола

Двата грандиозни објекта во Гостивар ги немаат потребните одобренија

Киро Кипроски

Гостивар - Два современи и грандиозни објекта во Гостивар, „Сити центар“ и „Маркет гетро“, сопственост на гостиварската трговска организација „Гетро“, минатата седмица на свечен начин, но без неопходните одобренија и без присуство на претставници на локалната и на централната власт, беа предадени во употреба.

Гостиварци се задоволни што добија современи деловни објекти каде што ќе можат да тргуваат за секојдневни потреби, да се забавуваат, пред се', и што градот се разубави со нови урбанистички достигнувања. „Сити центар“ е изграден на аголот на булеварот „Гоце Делчев“ и улицата „Илинденска“, односно се наоѓа на најдобрата локација во Гостивар. Авторите на проектот беа наградени за архитектонското решение од Асоцијацијата на архитекти на Македонија, со Големата годишна награда за архитектура за 2008 година. Центарот располага со 8.000 квадратни метри корисна површина, две киносали со 380 и 270 седишта, детско катче, кафетерија, бутици, продавници и фирми што извршуваат услужни дејности, подземна гаража со 2.000 квадратни метри со паркинг-простор за 55 возила.

Маркетот „Гетро“ е изграден на поранешната локација на зградата на експозитурата на Стопанска банка, на аголот на улиците „Браќа Жиноски“ и „Мајор Чеде Филипоски“.

Во текот на градењето двата објекта ги следеа многу контроверзи. Општинската градежна инспекција донесе решение за забрана за продолжување на градењето на двата објекта, бидејќи инвеститорот не ги почитувал техничките услови за градба, што ги предвидувала градежната маркица. Исто така, и државниот градежен инспектор констатирал недоследности. Но, и покрај констатираните недостатоци и решението за забрана, сепак, непречено се работеше на градењето на двата објекта. По повеќе од три години тие целосно се завршени и од минатата седмица без потребната употребна дозвола се ставени во функција.

„Ги имаме добиено сите дозволи и сите потврди, двата објекта легално се изградени и непречено можат да ја извршуваат својата дејност“, изјави Цана Апостолоска, генерален менаџер на „Гетро“ на свеченото предавање во употреба на објектите.

Од Секторот за урбанизам на Општина Гостивар го тврдат спротивното. Двата објекта отстапуваат и не се изградени според одобрената техничка документација. Во приземјето на маркетот „Гетро“ има отстапување, односно се изградени 590 квадратни метри повеќе од дозволеното. „Сити центар“ има отстапувања во габаритот на објектот, како и во височината.

Ставот на градоначалникот на Општина Гостивар, Руфи Османи, е дека и за овие два објекта ќе се постапува според законот. Нема да се издаде употребна дозвола се' додека димензиите на изградените објекти отстапуваат од добиените услови за градба.

Во гостиварската подрачна единица на Министерството за економија ни рекоа дека по националниот празник Илинден ќе извршат контрола на сите бутици, продавници и кафетерии во двата деловни објекта на „Гетро“. При тоа, ако се констатира дека носителите на дејност не ги исполнуваат минимално техничките услови за вршење трговија, угостителство, да почне со работа продажен или друг деловен објект, ќе се донесе решение за нивно затворање.