Скопска обиколница [A2/A4]

На автопатот ќе се преселат возилата што сега транзитираат низ Скопје, па се очекува значително да се намали метежот, бучавата и загадувањето во главниот град

Капиталниот државен проект, северната обиколница околу Скопје, е речиси готова. Свеченото пуштање на автопатот, како што најавуваат од Фондот за патишта, се очекува кон крајот на јуни. Ова значајно сообраќајно решение, чија изградба почна во 2002 година, се очекува значително да влијае врз намалувањето на сообраќајниот метеж, бучавата и загадувањето во главниот град. Се работи за класичен автопат долг 26 километри, со четири ленти, односно по две во обете насоки. Крајниот рок за завршување на двете фази на обиколницата и нејзино пуштање во употреба е 30 јуни. Изградбата на овој автопат значително ќе го намали транзитниот сообраќај низ градот Скопје во правец исток-запад и обратно - вели Катерина Панова-Илиевска, шеф на кабинетот на директорот на Фондот за патишта. Обиколницата е дел од европскиот Коридор 8 исток - запад, што треба да минува низ Албанија, Македонија и Бугарија како и од Коридорот 10 север -југ.

- Првата фаза од изградбата на обиколницата почна во 2002 година. За нејзината изградба, од клучката кај Хиподром до Шуто Оризари, беа предвидени 36,5 милиони евра, пари обезбедени со кредит од Европската инвестицска банка (ЕИБ). На оваа делница завршени се околу 80 отсто од работите, како и над 90 отсто од експропријацијата на приватен имот. За изградбата на втората фаза, од Оризари до Сарај се издвоени 48,8 милиони евра. Дел од овие пари, односно 28 отсто се обезбедени со кредит од ЕИБ, а 72 отсто се од Европската банка за обнова и развој (ЕБРД). Досега во оваа фаза се завршени околу 70 отсто од предвидените работи како и над 97 отсто од експропријацијата - велат во Фондот.  Парите за експропријација на приватното земјиште низ кое минува обиколницата и за надзорниот орган на изградбата се обезбедени од државниот буџет.  Наскоро треба да биде завршена и изградбата на приклучните патишта, по кои жителите на повеќе скопски населби ќе може да се приклучат на обиколницата. Предвидени се девет пристапни патишта, од кои два се готови. Вакви клучки ќе има во Хиподром, Синѓелиќ, Стајковци, Оризари, Бутел, Стенковец, Орман, Волково и Сарај. Досега се комплетно завршени клучките кај Бутел и Оризари. Оние кај Стенковец, Илинденска и Волково се готови, но во крајната фаза треба да се постави уште еден завршен слој асфалт. Градежните работи за пристапниот пат кај Сарај и кај Хиподром се при крај, останува уште асфалтирањето. Клучките кај Синѓелиќ и Стајковци не се готови - рече Панова-Илиевска.Со пуштањето во употреба на обиколницата се очекува сообраќајот од центарот да се пренасочи кон автопатот, затоа што транзитните товарни возила и автомобили, кои одат, на пример, од Куманово кон Тетово веќе нема да мора да минуваат низ Скопје. Со оваа сообраќајница бучавата и загадувањето ќе се намалат до 30 отсто. Сепак, се очекува обиколницата да ја зголеми бучавата во Ѓорче Петров, Кондово и Волково. За заштита на населението, ќе се градат високи ѕидови покрај патот.

Јорданка Ивановска

Привршува изградбата на обиколницата на Скопје

На трасата има неколку вијадукти од кои најдолгиот е 630 метри

Доколку се' се одвива според зацртаната динамика, автопатот треба да биде завршен до јули годинава

Билјана Ангеловска

Се наѕира крајот на изградбата на обиколницата на Скопје. Автопатот речиси комплетно ја има финализирано својата траса, која веќе е асфалтирана во над 90 проценти. Низ Скопската Котлина змијулесто се протегаат 26,5 километри сообраќајница со вкупна широчина од 22 метра, со девет приклучувања кон градот, три големи објекти - вијадукти и многу натпатници што ќе им го олеснат движењето на жителите од бројните скопски села.

Ако се' се одвива според планот и не се појават некои непредвидени проблеми, има реални шанси обиколницата да биде комплетно завршена уште во јули годинава. Оперативите на двете градежни компании кои работат на изградбата, скопски „Гранит“ и грчка „Терна“, се подготвени да финишираат секој во својот дел од автопатот. Нашата компанија работи на првата фаза од обиколницата, на делницата од Хиподром до Оризари, во вкупна должина од 14,7 километри, додека „Терна“ ја гради втората фаза, 11,8 километри долга делница од Оризари до Сарај.

Засега, единствено мали проблеми се' уште има на одредени делови од првата фаза каде што работи „Гранит“. Поради нерешена експропријација и натаму не се работи на околу 500 метри кај земјоделското стопанство „Сингелиќ“. На дел кај селото Стајковци, исто така, има неколку помали неекспроприрани парцели каде што оперативата не може да влезе во работа, како и кај Инџиково. Не може да се работи и кај Кучевишка Бара, поради високонапонскиот далновод Скопје - Вруток, бидејќи се чека тој да биде исклучен од страна на МЕПСО. Но, поради имотноправни проблеми, неговата дислокација и натаму се пролонгира.

Во „Гранит“ велат дека последниве денови е направен чекор напред во преговорите, во надминување на проблемите се вклучило и Министерството за транспорт и врски, па се очекува сите пречки конечно да бидат надминати. Доколку Фондот за магистрални и регионални патишта на Македонија го исполни својот дел од обврските и конечно ја заврши експропријацијата, „Гранит“ е подготвен до крајот на јуни да го комплетира објектот, што значи првата фаза од обиколницата да биде целосно завршена.

На оваа делница има вкупно пет клучки: Хиподром, Сингелиќ, Бутел, Оризари и Стајковци. На клучката Сингелиќ моментално се монтираат носачите, по што ќе се бетонира коловозната плоча. Клучките Бутел, Оризари и Хиподром веќе се готови, преостанува уште да се бојосаат и да се постават сообраќајните знаци. Другиот дел од трасата е комплетно завршен, електрифициран и треба само да се обележи, да се постави сигнализацијата и да се пушти во сообраќај.

Втората фаза од обиколницата, од Оризари до Сарај, е изградена повеќе од 90 проценти. Тука преостанува да се постави последниот, завршен слој асфалт, и да се изведат завршните работи, како што е поставување огради, хоризонтална и вертикална сигнализација, да се доврши оградата во средина и да се посипе хумус. Деновиве почна да се затревува средишниот дел.

На оваа делница има три вијадукти што ги градеше оперативата на „Бетон“ од Скопје, која учествуваше како подизведувач на „Терна“. Најголем е вијадуктот кај селото Орман, кој е долг 630 метри со најголема височина на столбовите од 19 метри. Вијадуктот Кондово е со должина од 435 метри, а оној кај Волково 368 метри. И двата објекта имаат висина од 12 метри.

Главниот надзор на изведбата на втората фаза од обиколницата, Бранко Стефановски, од Градежниот институт „Македонија“ потенцира дека изградбата на оваа делница се одвивала без проблеми и на задоволство на главниот изведувач - грчка „Терна“, која нема никакви забелешки ниту на работата на подизведувачот - скопски „Бетон“, ниту пак на Фондот за патишта.

Обиколницата на Скопје ќе биде долга вкупно 26,5 километри. Има автопатско решение со широчина од 10,75 метри во секој правец, со по две возни ленти и плус една за застанување. Ќе има вкупно девет клучки и нема да се плаќа патарина. Се гради со кредит од Европска инвестициона банка и ќе чини повеќе од 85 милиони евра.