Панорамското тркало, сепак, ќе се врти, а ќе добие и нов мост

По трет пат градската власт објави конкурс за идејно решение за Панорамско тркало, кое овој пат ќе добие и свој мост. Оваа содржина е предвидена со Деталниот урбанистички план „Мал Ринг“. Огласот е објавен денеска на страната на Бирото за јавни набавки, и во него се предвидува изработка на архитектонско-урбанистичко идејно решение за Панорамско тркало со придружни објекти и мостови.
Проектите треба да се достават најдоцна до 12 јануари, а предвидена е главна награда од 100.000 денари. Првиот пат конкурсот беше поништен поради промена на локацијата, а вториот пат поради измени во димензиите на тркалото. Овој пат, огласот е проширен и со него се бара и решение за мост.
Според единственото понудено решение на Јован Стефановски Жан, шеесетметарското Панорамско тркало, содржеше патека на македонските ѕвезди, цветен и сончев часовник, две летни тераси, фонтана, панорамско тркало и мирни водени површини.

Панорамското тркало ќе се заврти дури в година

Општина Центар се' уште бара нова локација за објектот, а Градот, пак, допрва ќе одлучи за неговиот изглед

Деспина Трајковска



Панормаското тркало ќе почне да се гради дури в година, иако проектот досега требаше да биде готов и да стартува со теренската реализација. Измената на локацијата на објектот, а со тоа автоматски и потребата од ново идејно решение, ги проби очекуваните рокови за почеток на изградба на оваа атракција во центарот на градот.

И градските власти и Општина Центар се' уште работат на неопходните процедури за да почне да се гради панорамата. Градот го избира новиот изглед на тркалото, а од Центар, пак, наводно, се' уште бараат нова локација за објектот.

„Во тек е измена и дополна на новиот ДУП ’Мал ринг‘. По неговото разгледување од комисијата, ќе имаме точен податок за новата локација на панорамското тркало“, велат од Центар.

Градските власти се очекува наскоро да го изберат новиот изглед на атрактивното здание. Повторениот конкурс за избор на идејно решение завршил но, комисијата се' уште не донела конечна одлука.

„Конкурсот за панорамското тркало заврши на 25 октомври и во моментов комисијата ги разгледува пристигнатите идејни решенија“, велат од Градот, од каде што не знаат ниту приближно колку средства ќе бидат издвоени за реализацијата на проектот, ниту, пак, дали евентуално финансиски удел ќе има и Владата, со оглед на тоа дека панорамското тркало е дел од урбанизацијата на центарот на Скопје.

Градските власти истовремено посочуваат дека, најверојатно, 500.000 денари што беа планирани за изработка на неопходните проекти во текот на оваа година ќе бидат пренаменети за идната, имајќи предвид дека не се потрошени. Имено, Градот единствено избра идејно решение. Беше одлучено тркалото да се гради по замисла на архитектот Јован Стефановски-Жан, но надлежните се откажаа од неговата идеја поради планираната траса на подземната сообраќајница. Поради неа, панорамата треба да се дислоцира, па автоматски било потребно ново идејно решение.

Панорамското тркало требаше да се издигне во зелениот појас на десниот брег на реката Вардар, меѓу Камени мост и мостот „Гоце Делчев“. Во неговата околина, според замислата на Стефановски, беше предвидена изградба на патека на македонските ѕвезди, цветен и сончев часовник, две летни тераси, фонтана...