Ски центар Кожуф

Ски центарот Кожув активно се подготвува за започнување на новата скијачка сезона. Оваа година од ски центарот велат дека имаат направено инвестиции како во делот на ски терените така и во урбаниот дел на населбата.
“Покрај постоечката жичара 6-сед „Марково езеро” и ски лифтот „Зелен брег” кои беа на располагање минатата ски сезона, изграден е уште еден ски лифт „К-92”,  на надморска височина од 2160 метри. Овој ски лифт, исто како и другите, е производ на светскиот лидер за производство на овој вид на опрема - австриската компанија Доппелмаер, и со ставањето на овој ски лифт во функција, се отвори можност за три нови ски патеки кои верувам ќе бидат вистински предизвик за скијачите“ вели Јасмина Плачкова, раководител на секторот за маркетинг во Ски Кожув АД.
Плачкова додава дека се набавени и се во процес на инсталирање, 10 топови за заснежување, кои се производ на компанијата SUFAG. Во престојната скијачка сезона една од патеките ќе биде покриена со вештачки снег, што ќе биде атракција за посетителите кои уживаат во снежните спортови. Исто така тоа ќе помогне и во деновите кога нема да има природен снег. Сето ова ќе овозможи оваа година на Кожуф да се скија на преку 12 километри препарирани ски патеки и околу 20 километри free style патеки.
Исто така во завршна фаза е и пристапниот пат до ски центарот.
“Во урбаниот дел од населбата целосно е завршена инфраструктурата во населбата: приклучок на вода, струја, телекомуникации и канализација до сите градежни парцели; нови сообраќајници со вкупна должина од пет километри;  изградба на апартмански комплекс; набавка на мини прочистителна станица за отпадни води. Висината на инвестициите оваа година се проценува на околу пет милиони евра“ објаснува Плачковска, за градежните активностите на ски центарот.
Од оваа година за прв пат посетителите ќе можат да престојуваат и повеќе денови во рамки на ски центарот бидејќи на располагање имаат 26 апартмани со 100 легла, еден ресторан и едно бачило-ресторан. Покрај скромниот број на сместувачки капацитет со кој располага Ски центар Кожуф, постојат и алтернативни услови за сместување во месноста Смрдлива вода, која што е оддалечена само 13 километри од населбата на Ски Кожуф, каде што на располагање има уште 100 легла. Минатата година во рамки на ски центарот посетителите доаѓаа само на дневно скијање, бидејќи немаше капацитети за сместување.
Ски сезоната на Кожуф се планира да започне на 25 декември и до 15 јануари ски центарот ќе работи секој ден во неделата. Ски лифтовите ќе работат од 08:00-16:30 часот, а жичарата од 08:00 до 17:00 часот.