Авиокомпании и линии

Домашни бизнисмени сакаат да формираат авиокомпанија-преговорите со АЦВ во тек

Не само ТАВ туку и македонските власти ја посакуваат оваа реномирана турска компанија

Соња Маџовска


„Туркиш ерлајнз“ да биде новиот национален авиопревозник во земјава, лобира ТАВ откако ги презеде аеродромите. Од ТАВ очигледно не седат со скрстени раце. Турците само што дојдоа во Македонија, најавија дека и самите преговараат да донесат авиокомпанија што ќе го носи македонското знаме, бидејќи сметаат дека само така аеродромите во земјава ќе можат да се борат со конкуренцијата во регионот, а патниците да добијат поевтини авиобилети.

Претставниците на ТАВ во Македонија, освен оваа информација, во оваа фаза не сакаат ништо повеќе да коментираат.

Сепак, позитивни сигнали за влегувањето на „Туркиш ерлајнз“ во авиобизнисот во земјава стигнуваат и од македонските воздухопловни власти. Тие со задоволство ја чекаат апликацијата од оваа реномирана турска авиокомпанија, по што веруваат дека таа без никакви проблеми ќе добие дозвола за работа.

Според првиот човек на Агенцијата за цивилно воздухопловство Зоран Крстевски, се' зависи од тоа кога и за што ќе аплицира „Туркиш ерлајнз“.

„’Туркиш ерлајнз‘ треба прво да аплицира кај нас. Доколку го сторат тоа, би ги прифатиле. Нормално, треба да ги исполнат условите согласно со европските стандарди. Компанијата треба да поднесе бизнис-план до АЦВ, да го определи типот на сообраќајот и да прецизира дали сакаат да бидат чартер или редовен авиопревозник во земјава. Позитивен е односот на државата. ’Туркиш ерлајнз‘ веќе е присутна во регионот и ова е оправдан пристап да сакаат да дојдат и во земјава. Станува збор за многу реномирана авиокомпанија. Нејзиниот влез во земјава може да предизвика интерес и кај други авиокомпании. Тоа ќе биде добро за Македонија“, изјави вчера Кртсевски за „Утрински весник“.

Тој смета дека со модернизацијата на „Александар Велики“ ќе се создадат сите предуслови тој да прерасне во регионален аеродром. Само софискиот аеродром ќе биде сличен како нашиот по големина, додека другите аеродроми во регионот се многу помали.

Крстевски вели дека во прилог на сево ова се и измените на Законот за воздухопловство, кој е веќе во собраниска процедура, а со кој ќе се создаде целосна либерализација на македонското небо. Со овој Закон државата ќе има можност да субвенционира летови за кои не постои комерцијален интерес, но се значајни за економскиот и за социјалниот развој на одреден регион во земјава. „Со Законот се пренесуваат и правата од АЦВ кај аеродромите. Тие ќе одредуваат, односно турски ТАВ, која авиокомпанија ќе лета од Македонија и кон Македонија. Секоја авиокомпанија ќе може да лета и затоа нема да бара дозвола од државата, туку од ТАВ. Ние само ќе ја регулираме безбедноста“, вели Крстевски.

И покрај овие интересни најави за зголемување на бројот на летовите и авиокомпаниите што ќе оперираат во земјава, сепак, и натаму останува неизвесно кога официјално ќе почне модернизацијата на аеродромот „Александар Велики“. Според претставниците на ТАВ во земјава, тие се подготвени да почнат, но се' уште чекаат договор меѓу двете Влади за доаѓањето на турскиот премиер Реџеп Таип Ердоган. Тој треба да ја посети Македонија со уште 150 бизнисмени за да и' се даде поголемо значење на оваа турска инвестиција, тешка 200 милиони евра. „ТАВ веќе започна со подготовка за градежните работи. Најпрво ќе се гради во областа каде што сега е лоцирана воената инфраструктура. Таа ќе биде дислоцирана, за што чекаме писмено одобрување од Министерството за одбрана. Тоа е процес што е во тек и го очекуваме тоа одобрение многу скоро. ТАВ е подготвен со целата механизација, а во меѓувреме се финализираат дизајните и истражувањето на почвата на таа локација. Што се однесува до церемонијата за официјален почеток на изградбата на која треба да присуствува и турскиот премиер, ТАВ е во очекување на конкретен договор меѓу македонската и турската влада. ТАВ е подготвен за организација на тој настан, во оној момент кога ќе биде постигнат договор со турскиот премиер. Очекуваме тоа да се случи многу скоро. ТАВ веќе го започна процесот на градба, при што нема никакви проблеми и сите активности се спроведуваат според планираното“, изјавија вчера за нашиот весник претставниците на ТАВ во Македонија.                                                                                                                                            http://www.utrinski.com.mk/?ItemID=8ECF68B5FA0B6D4ABE2C1A170F565122