Авиокомпании и линии

Стопирани директните летови за Брисел?

Никој не ја објаснува причината за привременото укинување на оваа авионска линија

Миркица Поповиќ

Директните летови за Брисел се стопирани до пролет. Никој не ја објаснува причината за привременото укинување на оваа авионска линија ниту во „Ерлифт“, кој ја воспостави линијата, ниту, пак, во „Скајвингс“, кој ги издава картите.

Ако се јавите да резервирате директен лет за Брисел преку единствениот македонски авиопревозник „Ерлифт сервис - скајвингс“, одговорот ќе биде дека нема директен лет за Брисел. На македонскиот аеродром „Александар Велики“, пак, ќе ви кажат дека има летови секој понеделник и петок. Веднаш се наметнува прашањето што се случува со единствената директна линија кон Брисел, која „Ерлифт сервис“ ја воспостави кон крајот на октомври 2009 година?

Информацијата за прекин на сообраќајот кон срцето на Европската унија викендот се прошири преку агрегаторот Пинг (http://ping.mk), кој на едно место презентира новости од македонската блогосфера. Имено, на потенцијални патници за Брисел, кои контактирале со други туристички агенции и со авиопревозникот, им било речено дека нема директни летови за Брисел.

Оваа информација ги изненади граѓаните на кои уште во декември им било речено дека летовите се целосно букирани до март. Кога се јавивме во „Скајвингс“, ни рекоа дека последниот лет за Брисел бил минатиот петок и дека летовите се стопирани се' до пролет, а сега има летови само за Дизелдорф. Цената на билетот до Брисел изнесуваше 299 евра за повратна карта и 189 евра за еден правец.

Поради зафатеност на менаџерскиот тим, од „Ерлифт“ не беа во можност да ни образложат зошто се укинува овој лет. Дали можна причина за укинувањето е нерентабилноста на летот? Неодамна во разговор со „Ерлифт“ ни беше кажано дека поради големи трошоци за такси на скопскиот аеродром, меѓу другото, и за прескапото гориво, некои од нивните летови не се рентабилни како што очекувале.

„Нема разбирање од државата и од аеродромот. Мора да дојде до намалување на цените и да се инвестира во кампања за да се зголеми фреквенцијата на патници. Само со еден лет дневно не може да се задоволи пазарот. На пример, од Словенија има лет два пати во денот кон Брисел и обратно, што би требало да се практикува и кај нас како држава-кандидат за ЕУ“, рече во тогашниот разговор за „Утрински“ Игор Анастасовски, директор на земната оператива на единствената македонска авиокомпанија.

Стечајот за МАТ одложен за март

На бившиот национален авиопревозник МАТ, иако му се закануваше стечај, засега се спаси од ваквата постапка до март. Причината за одложување на стечајната постапка е што на вчерашното судско рочиште закажано во Основниот суд во Скопје, авиокомпанијата МАТ не доставил целосна документација до стечајниот управник. Поради ова, новото рочиштето е пролонгирано за 3 март. Иницијативата за стечај ја поднесе Агенцијата за цивилно воздухопловство (АЦВ), која се надева дека само на овој начин може да си ги намири долговите што ги има кон неа оваа авиокомпанија во висина од околу три милиони евра.

Освен кон АЦВ, МАТ му должи и на Јавното претпријатие за аеродромски услуги, долг што е двојно поголем, потоа кон Еуроконтрол, аеродромите во земјава и кон српски ЈАТ.

Компанијата им должи и на вработените по основа на неисплатени плати и придонеси. Сепак, колку точно должи МАТ ќе биде познато дури откако ќе биде отворена стечајната постапка и кога сите доверители ќе ги достават побарувањата.

Статусот на редовен авиопревозник МАТ го загуби лани откако неколку пати беше приземјуван единствениот авион со кој располагаше. Авионот немаше дозвола за летање, затоа што, како што тврдат надлежните, не му биле извршени потребните сервиси и биле констатирани одредени технички недостатоци.

Од септември МАТ ја загуби и лиценцата за летање, а дел од вработените се префрлени во новоформираната компанијата „МАТ ервејс“, која неодамна ја презеде српскиот туроператор „Контики“. (Ј.Ј.)

Од 25 јануари чартер летови Риека-Скопје

Скопје со авиолинија ќе се поврзе со хрватскиот приморски град Риека. Промотивниот лет е закажан за 25 јануари, а летовите се распоредени двапати неделно во текот на годината (понеделник и петок). Како што потенцира сопственичката на фирмата ГАТ Егзекјутив, Верица Смилевска, со поврзувањето на Риека со Скопје започнува регионалното поврзување на земјите од блиското соседство, особено во летните месеци кога ќе бидат отворени и туристички линии, што претставува огромен потенцијал во стопанска и туристичка смисла. Покрај Риека се планира и поврзување со Осиечкиот аеродром.

Чартер летовите ги поттикнува ГАТ Егзекјутив, користејќи го македонскиот авиопревозник Ерлифт Сервис сопственост на германскиот туроператор Скајвингс. На патниците ќе им биде на располагање Боинг 737-300 со капацитет од 148 места. Повратна карта со сите такси изнесува 170 евра. Според директорот на Аеродромот Риека, Младен Пасариќ, новата линија претставува вистински исчекор во соработката на двете пријателски држави, особено во зимските месеци во кои до сега не постоеле никакви воздушни врски.

http://vecer.com.mk/?ItemID=83C51FC3EB40B242A817E753597E566C