Македонското вклучување во „Јужен поток“ станува поизвесно По вчерашните разговори со високи претставници на рускиот енергетски гигант „Газпром“, вицепремиерот и министер за финансии Зоран Ставрески изјави дека Македонија е чекор поблиску до вклучување во големиот гасовод „Јужен поток“ и дека останува уште да завршат техничките анализи, а потоа да се потпише меѓудржавен договор со Русија за реализација на проектот. Во опција се повеќе варијанти за тоа каде и како ќе биде изведен приклучокот за земјава и за тоа дали ќе функционира како крак или и како транзитен вод за Албанија и Косово. Треба да биде решено и колкаво количество на гас ќе добие Македонија. Поврзувањето на Македонија со „Јужен поток“ е во тесна врска со подмирувањето на рускиот клириншки долг кон државава и реализацијата на неколку крупни гасификациони проекти во рамки на нашите граници. Македонија својата гасификација ја започна во деведесетите години на минатиот век, но позначајни ефекти досега изостанаа, меѓудругото и поради долготрајниот спор помеѓу државата и „Макпетрол“ за сопственоста врз гасоводниот оператор „Гама“. Постоечкиот гасовод од Крива Паланка до Скопје во должина од 160 километри има капацитет од 800.000 кубни метри годишно, капацитет кој до неодамна беше многу малку искористен. Но нашите потреби за гас нагло растат и во Владата се надеваат дека дополнителните потребни количини ќе бидат обезбедени преку „Јужен поток“. Владата веќе го има формирано претпријатието „Македонија гас“ кое заедно со „Газпром“ ќе работи на реализација на проектот во Македонија. „Јужен тек“ е партнерски проект на руски „Газпром“ и италијанската компанија „Ени“. Гасоводот ќе почнува во Џубга, на рускиот брег на Црно Море, а потоа под вода ќе се движи до брегот на Бугарија, на чија територија ќе се двојат двете главни гранки. Едната преку Србија и Унгарија ќе завршува во Австрија и Словенија, додека другата преку Грција и Јонското Море ќе завршува во Италија. Капацитетот на гасоводот ќе биде 63 милијарди кубни метри гас годишно. Се предвидува пуштањето во употреба да биде до крајот на 2015, а реализацијата на проектот да чини помеѓу 19 и 24 милијарди евра.

http://www.build.com.mk/?p=5096

Настрана фактот што приклучувањето на уште еден гасовод во земјава нема никаква логика од деловна гледна точка. Имено, постоечкиот гасовод, кој поминува низ земјава, има капацитет од 800 милиони кубни метри годишно, а ние користиме само 10 отсто од капацитетот. Пресметките се дека и со целосна гасификација на земјава, и тоа и на стопанството и на домаќинствата не би можеле да искористиме повеќе од 70 отсто. Што се мисли да се постигне кон приклучувањето кон „Јужен тек“ во ситуација кога не можеме да ги искористиме ниту постоечките капацитети, останува нејасно.

Како што стана обичај, многу плитко од страна на Шпиц... Во моментов капацитетот на постоечкиот магистрален гасовод го користиме со само 10% единствено затоа што нивото на гасификација на земјата ни е симболично. Еве само Те-То кога ќе почне да работи ќе користи околу 50% од капацитетот на постоечкиот гасовод. А каде се другите најавени гасни електрани и топлани, каде е индустријата, каде се домаќинствата, каде е транзитот кон Косово и Албанија, каде е резервниот капацитет за пораст на потрошувачката со тек на време...

Природен гас од Македонија кон Косово

 Со евентуалното градење на дел од рутата на гасоводот Јужен Поток низ земјава, тој би можел да продолжи и кон Косово за да понуди пристап до овој ефтин енергенс и за тамошните компании и домаќинства. За Алсат-М ова го најавуваат од кабинетот на претседателот Ѓорге Иванов од каде напоменуваат дека сепак она што евентуално ќе се гради низ Македонија и Косово, нема да биде главната рута на гасоводот, туку негов крак. Јужен Поток е проект од 2007 година со кој треба да се заобиколи проблематичната Украина и рускиот гас да се доставува до Италија и Централна Европа. Главните цевководи треба да минуваат под Црното Море, Бугарија, Грција, Србија и Унгарија. Се предвидува изградбата да заврши до 2015 година. Руската енергетска компанија Гаспром која е главен изведувач на работите во јуни летово веќе се согласи Македонија да се вклучи во проектот, но нејзини експерти најнапред треба да дојдат да ги испитаат техничките можности за приклучок на еден крак кон Македонија. Нивното доаѓање од македонаската Влада го очекуваат кон средината на месецов. Инаку, во Европа веќе се гради другиот проект на Русија за испорака на гас кон потрошувачите во ЕУ. Станува збор за Северниот Поток кој веќе е во напредна фаза, а ќе ги поврзе Русија и Германија, повторно заобиколувајќи ја Украина.

http://alsat.mk/vesti/zemja/1221810.html

Гасификација со јавно-приватно партнерство

Општина Крива Паланка планира гасифицирање на градот преку јавно-приватно партнерство за што веќе се во тек подготвителните активности. Идејата за заедничка реализација на проектот на општината со приватен партнер е поттикната од повеќето заинтересирани инвеститори, кои се подготвени да инвестираат во изградбата на овој инфраструктурен објект.

- Подготвуваме изработка на студија за јавно-приватно партнерство за гасификација на градот. Првичната идеја беше да го гасифицираме само индустрискиот дел, но поради интересот на повеќе инвеститори, со гасоводот ќе биде опфатено целото градско подрачје. Според првичните процени целата инвестиција би била 2,5 милиона евра - вели градоначалникот Арсенчо Алексовски.

Уште пред десетина години Крива Паланка има обезбедено идеен проект за целиот град и главен проект за гасификација на централното градско подрачје, изработен од бугарската компанија „Овергас“ од Софија, со што беше првата општина во државата со готова планска документација за воведување на овој енергенс во потрошувачката.

- Постојниот проект ќе ни послужи како идеен за изработка на потребната документација за јавното-приватно партнерство. Општината ќе учествува во делот на изработка на документацијата и комуналиите, а ако е законски изводливо и со закуп на одредени водови. Преку Североисточниот плански регион веќе имаме аплицирано за средства за потребната документација, а приватниот партнер би ја презел изградбата на целиот гасовод - вели Алексовски.

Во оптек се две варијанти за реализацијата на јавното-приватно партнерство. Според едната, општината би си го наплатила делот за градежните дозволи и комуналиите, а, според другата, би требало да се откаже од овој дел и да добие процент од експлоатацијата и продажбата на гасот.

- Мислам дека за општината е подобро да имаме удел како косопственици во јавното-приватно партнерство од експлоатацијата на гасоводниот систем, со што континуирано ќе добиваме процент во општинската каса - истакнува Алексовски.

Според сегашниот проект, гасоводниот систем опфаќа 5 км од главниот градски колектор и 50 км од градската гасоводна мрежа. Пред неколку години беше извршено и истражување кај 500 домаќинства и 12 јавни и стопански субјекти од кои речиси сите беа подготвени да го вклучат гасот во производството и во индивидуалната потрошувачка. Дел од нив веќе имаат и изградени инсталации, кои само би се преадаптирале за искористување на овој еколошки и најекономичен енергенс.

- Штета е Крива Паланка да не го искористи гасот, на кој нашата општина може најлесно и најбргу да се приспособи. Низ нашето подрачје минува гасоводната магистрала, а во селото Жидилово се наоѓа главната мерна станица за државата, која претставува влез на гасот во земјава. Воедно, веќе имаме и главна мерно-регулациона станица и приклучок за градот, па затоа ќе гледаме што е можно побргу да го подготвиме овој проект, кој ќе биде вистински благодат за градот - вели Алексовски.

Со јавно-приватно партнерство општината веќе реализира проект за изградба на административно деловна зграда и смета дека овој модел, како светски тренд, е многу погоден за побрза реализација на потребните проекти, кои придонесуваат за развој на градот.

http://www.dnevnik.com.mk/?ItemID=BFE219C8A9C4544AA43E4A03E2173625

Скопје ќе се изначека за гас

Градските власти допрва ќе ја кројат стратегијата за работа на „Енергетика Скопје“, иако претпријатието функционира веќе три години, а директорот редовно зема плата

Овие летни месеци градската власт требаше да распише меѓународен конкурс за гасификација на Скопје, но тој, според сегашните изјави на градоначалникот Коце Трајановски, не е ни на повидок. Напротив, наместо тендер, наесен градоначалникот допрва ќе отвора тема пред Советот за тоа како во иднина ќе функционира акционерското друштво „Енергетика Скопје“. А само пред неколку месеци беше најавувано дека како Град очекуваат да се пријават многу заинтересирани фирми, како и дека ако тендерот помине како што треба, ќе биде зацртана целата стратегија за изградба на мрежата.

„Енергетика Скопје“ беше формирано како јавно претпријатие во времето на поранешниот градоначалник Трифун Костовски, а потоа стана акционерско друштво. Постои веќе три години, има директор и Управен одбор, но и покрај тоа, стратегијата за неговото работење допрва ќе се крои. Иако без стратегија за работа, неговите вработени три години редовно земаат плата од градскиот буџет, па затоа опозицискиот СДСМ на една од последните седници на Советот го праша градоначалникот Трајановски што работи ова претпријатие, кои се резултатите и дали некој води евиденција за трошоците.

Скопскиот градоначалник рече дека ќе биде искрен со членовите на Советот.

- Советот одобри дополнителни средства за „Енергетика“, но не сум среќен со начинот и работата на ова акционерско друштво. По летните одмори на седниците ќе дебатираме како ќе функционира во иднина, бидејќи ова сега е затечена состојба. Имаме трошоци само за директорот, сметководителот и за управниот одбор. Тие до крајот на годината ќе треба да дадат стратегија за ангажирање на концесионер кој ќе го стопанисува гасот - изјави градоначалникот.

Прашањата кои и после три години висат во воздух, според него, се дали „Енергетика“ да биде акционерско друштво или јавно претпријатие и дали ќе се распишува оглас за влегување на странски капитал.

- Не е во ред ваквото однесување од ова акционерско друштво за решавање на проблемот со гасификацијата на Скопје. Директорот и сметководителот ги гоиме две години - рече советникот Драги Давчевски од опозицискиот СДСМ.

Трајановски изрази задоволство од нивната работа и рече дека резултатите зависат од други фактори, а не од нив.

Сумата што е потребна за градење на гасификациската мрежа во Скопје, според процените, би требало да изнесува некаде од 30 до 40 милиони евра. Беше кажано дека меѓу првите општини што ќе бидат приклучени на гас се планирани Кисела Вода, Ѓорче Петров и Гази баба, имајќи предвид дека таму се наоѓаат големи заинтересирани потрошувачи.

Благодети од гасификацијата се намалување на увозот на електрична енергија, намалување на одливот на пари во други земји, поевтинување на трошоците на живот на граѓаните, помало загадување итн. Гасификацијата, според објаснувањата од Градот, не е конкуренција на „Топлификација“, но во секој случај ќе им понуди на потрошувачите можност за избор.

http://www.dnevnik.com.mk/?ItemID=9997E32F0760254E9811D72C24486ADB

Премиерот Груевски за гасоводната мрежа и за заштитата на домашните производители на пченица

Изработката на техничка документација за гасоводот чини 2,7 милиони евра

Скопје Министерството за транспорт и врски склучи договори за изработка на техничка документација на ниво на основен и изведбен проект за магистралната линија на гасоводен систем во Република Македонија во вредност од 2,7 милиони евра.

Како што е соопштено најповолен понудувач за изработка на техничка документација за магистралниот гасовод од Клечовце до Неготино во должина од околу 100 км е скопската компанија „Прима Инженеринг“ ДОО.

За магистралниот гасовод од Неготино до Битола во должина од околу 100 км, како и од Чвор Штип до Чвор Хамзали во должина од околу 60 км, е склучен договор со компанијата ОАД „Укргазпроект“, од Киев, Украина.

Техничка документација на ниво на Основен и Изведбен проект за магистрален гасовод од Чвор Хамзали до Стојаково во должина од околу 50 км, ќе подготвува  конзорциумот „DIWI Cosult International GmbH“, од Есен, Германија и „ДИВИ Консалт Интернационал Македонија“, од Скопје, Република Македонија.

Избраните компании треба да достават банкарски гаранции, а проектите треба да бидат завршени проектите, кои чинат 166.174.475 денари без ДДВ

http://www.makfax.com.mk/#112279;jsessionid=DDBD3F110FC8AC3938B482A67C27C977

Струмица ќе чека на гасификација

Сузана Тасева	Коментари (4)

12.07.2010 17:51

Министерството за финансии ја кочи гасификацијата на Струмица, обвинува градоначалникот Заев. И по шест месеци финансии не дава ни позитивно, ниту негативно мислење за кредитно задолжување на општината од 2 милиони и 800 илјади евра од Светска банка.

„Би било навистина штета и жално кога општина Струмица е со огромен финансиски капацитет, може да подигне кредит да не добие никаква согласност“ рече Зоран Заев, градоначалник на Струмица.

Од министерството за финансии велат дека ќе се изјаснат кога ќе биде комплетирана документацијата, бидејќи се работело за голем и специфичен проект досега тоа неколкупати го побарале од општината. На ова Заев вели дека доставиле се што било потребно.

„Тие мораат да ја оценат финансиската способност на општината но да навлегуваат во одредени барања на решенија кон општина Струмица тоа не е нивно право, ниту нивна обврска“ додаде Заев.

Доколку до крајот на овој месец финансии не даде согласност, Заев најави дека ќе ја повлече документацијата и заедно со бизнис секторот ќе ја реализираат гасификацијата на Струмица. Проектот вкупно чини 3 милиони и 800 илјади евра, 1 милион евра обезбедува општината.

http://a1.com.mk/vesti/default.aspx?vestID=125247

Во септември параф за „Јужен тек“ низ Македонија

Првиот човек на „Газпром“, Алексеј Милер, доаѓа да го потпише договорот. Вкупниот проект за гасификација на Македонија се проценува на 300 милиони евра. Само во делот што ќе се затвора со парите од клириншкиот долг, предвидено е учество на руски и на македонски фирми
Меѓудржавниот договор за изградба на крак од гасоводот „Јужен тек“ низ Македонија ќе биде потпишан во септември кога во нашата земја ќе допатува првиот човек на „Газпром“, Алексеј Милер, дознаваме од дипломатски извори од Руската Федерација. Македонија со тоа во последен час успева да фати приклучок кон еден исклучително важен енергетски проект, за кој сé повеќе лобира и Романија. Покрај влегувањето во мапата на европските енергетски коридори, вклучувањето во „Јужен тек“ за Македонија ќе значи енергетска преродба, поконкуретно производство и пониски трошоци за сите. - Првиот човек на „Газпром“ беше особено заинтересиран за овој проект и во септември се планира негова посета на Македонија, кога ќе биде потпишан и договорот. Во меѓувреме, оперативни групи составени од неколку експерти ќе ја посетат Македонија, за да направат анализи каде ќе биде приклучокот, за кој временски рок ќе се изгради кракот, вредноста на инвестицијата, економската оправданост и слично. До крајот на август треба сé да биде готово - ни изјави Илија Исајловски, македонски амбасадор во Москва. Од владини извори дознаваме дека во тек се преговорите со „Газпром“ и договорот што ќе се постигне мора да се ратификува во парламентот, бидејќи се работи за меѓудржавен договор. Она на што посочуваат од амбасадата во Москва е да не се меша затворањето на клириншкиот долг од 60 милиони долари и изградбата на „Јужен тек“ низ Македонија, иако „Газпром“ учествува и во двете работи. - Сега партнер на македонската влада е Владата на Русија. Во втората фаза македонската влада треба да потпише посебен договор или инструмент со „Газпром“ за целиот проект - објаснува амбасадорот Исајловски. Во однос на дилемата дали руска компанија може да гради во Македонија, тој тврди дека тоа е надминато преку договорот за враќање на клириншкиот долг. Станува збор за поранешен долг што се третира како стоки и услуги и тука е најдена правната можност „Газпром“ да го гради кракот кај нас, што исто така се третира како стоки и услуги. Во втората фаза, токму преку тој инструмент што треба да го потпишат македонската влада и „Газпром“, ќе се знаат и деталите за тоа кој ќе биде партнерот од македонска страна и како ќе се затвори финансиската конструкција - нагласува Исајловски. За експертите, прашањето за сопственоста на земјиштето каде што ќе поминува гасоводот не може да биде предмет на договарање со „Газпром“. Сопственик на земјиштето е македонската влада или некое домашно јавно претпријатие, задолжено да стопанисува со трасата и со гасоводот. И од Министерството за финансии нагласуваат дека нема барање од Русија за сопственост врз земјиштето каде што би поминувал гасоводот. - Тоа не е ниту правно можно. Во однос на изградбата, само во делот кој ќе се затвора со парите од клириншкиот долг, предвидено е учество на руски и на македонски фирми - ни изјави Ивана Билбиловска, портпаролка во Министерството за финансии. Реализацијата на вкупниот проект за гасификација на Македонија се проценува на 300 милиони евра. Со „Газпром“ се преговара и за учество во изградба на гасни електроцентрали и евентуална трансформација на ТЕЦ „Неготино“ во гасна електрана. Димитар Хаџимишев, претседател на Македонската енергетска асоцијација, смета дека за Македонија е најдобро приклучокот да биде близу Гевгелија. - Доколку еден крак од „Јужен тек“ оди низ Македонија, се отвора можноста и за поврзување на Албанија и на Косово кон овој гасоводен систем. Во ваков случај, Македонија би имала пристап до два гасовода, постојниот од Бугарија и новиот преку „Јужен тек“ - нагласува тој. Сегашниот гасоводен систем во Македонија е со капацитет од 800 милиони кубни метри годишно. Според анализите, на Македонија и требаат 2 милијарди кубни метри гас годишно и токму кракот на „Јужен тек“ може да го обезбеди тоа количество гас што недостига.

http://www.novamakedonija.com.mk/NewsDetal.asp?vest=7710106519&id=10&prilog=0&setIzdanie=22027