Забележавме триесет огништа каде што се готвела скара, а што според Законот за јавна чистота е забрането и казниво. Ако знаеме дека за ваков престап се наплатува казна од 200 евра, јасно е дека само со една обиколка на четири локации надлежните служби би можеле да испишат казни во вредност од 6.000 евра, и тоа само во Скопје. Пресметките би се книжеле во милиони евра ако секој друг комунален престап се казнува по 50 евра

Водно пред празнувањето на 1 Мај / Фото: Игор Бансколиев

Посетата на излетничките места пред и по празнувањето на 1 Мај ја покажа нашата комунална и еколошка (не)свесност

Врнежливото и нестабилно време што ја зафати државава изминативе неколку недели влијаеше и на посетеноста на излетничките места за празникот на трудот - Први мај. Дваесетината излетнички места во државава и околу Скопје што ги посетивме покажаа дека празникот во голем дел беше обележан со излет во природа, правење скара, музика и дружење, иако мора да се истакна дека ни оддалеку не беа толку масовно посетени како порано.

Пред и по празникот

Традицијата празникот на трудот да се прослави со одмор на излетничко место, парк, шума, покрај река или на ливада стана правило, кое и годинава, иако помалобројно, се покажа и потврди. Се потврди и правилото што вели дека екологијата и совеста ни се слаби теми за разговор и уште послаби како полиња за дејствување. Дописниците на весникот од неколку града од државава и неколку екипи што работеа во главниот град направија споредба на најголемите излетнички места и ја забележаа состојбата пред и по прославата на 1 Мај. Заклучокот е дека секаде каде што имаше помасовно присуство на посетители остана и поголемо количество ѓубре, кое беше фрлено или едноставно натрупано околу локациите каде што се славеше празникот. Не се почитуваше ниту забраната за палење оган, па триесетина граѓани на трите посетени локации околу главниот град со палење скара во природа ризикуваа да заработат по 200 евра казна. Оние што ги посетија Дојран и Охрид велат дека генерално хигиената била запазена, додека новинарска екипата што беше кај Тиквешко Езеро испрати спротивни извештаи и фотографии според кои јасно се гледа дека голем дел од ѓубрето завршило во езерото и на неговите брегови.

Купишта ѓубре и милиони евра потенцијални казни

На Водно, на Матка и на падините на ридовите околу Волково, како и на Скопска Црна Гора, на 30 април забележавме дека генерално не се присутни големи количества отпадоци и акумулирано ѓубре. Иако состојбата не беше за пофалба, сепак она што го видовме веднаш по прославата на 1 Мај беше многу полошо од претходно. Речиси половина од граѓаните не си го зедоа со себе ѓубрето што го направија додека беа на споменатите локации. Забележавме и триесет огништа каде што се готвела скара, а што според Законот за јавна чистота е забрането и казниво. Ако знаеме дека за ваков престап се наплатува казна од 200 евра, јасно е дека со само една обиколка на четири локации надлежните служби би можеле да испишат казни во вредност од 6.000 евра, и тоа само во Скопје. За другите комунални прекршоци и да не зборуваме. Тие се броеја во стотици и илјадници пати. Фрлени шишиња, амбалажа, догорчиња, хартија и ќеси имаше во голем број. Пресметките би се книжеле во милиони евра ако секој престап се казнува по 50 евра, како што е предвидено според законот. За волја на вистината, имаше и совесни граѓани, кои буквално не оставаа никаков отпад зад себе, а не беше мал бројот и на оние што крајно дисциплинирано и одговорно си го спакуваа отпадот во најлонски ќеси и го депонираа во кантите или во контејнерите.

Дождот ги остави тетовци дома

Временските услови го спасија спортскиот центар во Тетово од фрлен отпад по првомајските излети. Спортскиот центар во Тетово е една од најпосетените локации од страна на жителите за пригоден првомајски излет. Оваа година поради променливото време, односно врнежите од дожд, излетници имаше помалку, а со тоа изостана грдата слика што секоја година беше присутна по првомајските прослави т.е. изостанаа купишта фрлени отпадоци и остатоци од храна.                                       А. С.

Скарите по дворовите замена за првомајскиот пикник во Кичево

Дождливото време и високата влага на тревните површини во голем дел ги оставија граѓаните на Кичево без традиционалниот првомајски пикник. За разлика од претходните години, кога за овој ден излетничките места околу Кичево беа преполни, годинава во Крушино, Кнежино, Св. Пречиста, бреговите на Треска немаше речиси никого.
Но граѓаните не останаа без првомајската скара, бидејќи во многу дворови во градот и во селата се подготвуваше празничниот ручек. Локалите исто така беа полни со гости, а не мал број кичевци прошетаа и до Охрид.
- Она што дождот нѐ спречи да го направиме во природа, во некое од излетничките места, го реализиравме во нашиот двор. Не изостанаа ниту првомајска скара ниту неизбежното пиво и добрата музика - рекоа Влатко, Дејан и Стојан, млади кичевци што првомајскиот празник го прославија во урбани услови.
Бидејќи излетничките места останаа без очекуваните гости, на истите локации беше многу почисто и немаше воопшто ѓубре расфрлано од неодговорните излетници. Но тоа нема да ја поправи грдата слика од падините на Крушино, каде што ако прошетате, ќе останете без зборови од глетката што се укажува пред вашите очи. На тој потег ќе се соочите со еколошка бомба создадена од човечки раце. Расфрлани тоалетни хартии, најлони, шишиња, пакувања од цигари, делови од долна облека, кондоми, догорчиња од цигари и што уште не. Иста или слична е состојбата со крајбрежјето на некогаш бистрата Треска, чија околина денес изгледа жалосно. За хигиената на овие простори никој не се грижи и затоа од година на година ѓубрето зазема сѐ поголеми површини.                                          З. А. 

Неизгаснати скараџиски огништа околу Струмица

Струмичани за Први мај, Денот на трудот, во најголем број ги посетија околните излетнички места, приготвувајќи ја традиционалната првомајска скара и одморајќи во природа. Не ги поколеба ниту променливото време, да престојуваат на отворено цел ден, сѐ до попладневните часови, кога обилниот дожд ги избрка од излетничките места.
Најпосетени беа: излетничкото место Суви Лаки, Хамзали, како и околните полјани покрај рекичките и излетничкото место над градот, околу манастирот „Свети Илија“.    
Најголем дел граѓани-викендаши, по завршувањето на денот, отпадот од нивниот престој го оставија на полјаните покрај патиштата и во планина, а имаше и такви што докрај не ги изгасија огновите од приготвената скара, иако се наоѓаа во планина, веројатно надевајќи се дека тоа ќе го стори дождот што заврна. Исклучок, се малиот број на граѓани, кои поради својата совесност, ѓубрето пред заминување го собраа во најлонски ќеси, за да го фрлат во еден од најблиските контејнери патем или во градот.                               С.Џ.