Реконструкција на Собранието

Овоа би било интересно кога би се направило како шо требе.

Скапите куполи капак на кризата

Реализацијата на проектот, која пред изборите беше сопрена поради високата цена од 17 милиони евра, ќе почне на 1 јули

Собранието на 1 јули ќе стане градилиште ако се' оди според планот со конкурсот, кој вчера беше повторно објавен.Зградата ќе добие уште еден кат врз кој ќе бидат поставени три големи стаклени куполи. Неколку дена пред претседателските и локалните избори беше поништен претходно распишаниот конкурс, со образложение дека трите градежни компании што учествуваа во наддавањето барале премногу буџетски пари - околу 17 милиони евра.

Во Собранието сега очекуваат поевтини понуди, иако во огласот не се предвидени намалувања на големите градежни зафати. И понатаму останува на покривот да се конструира огромна стаклена купола под која ќе се направи конференциска сала од 600 квадратни метри, како и две помали куполи, кои всушност најмногу ја дигаат цената на градежниот зафат. Покрај надградбата со уште еден кат, предвидено е преадаптирање на целиот простор, ќе се засили статиката на зградата и ќе се направи студио за собранискиот телевизиски канал.За разлика од претходно, сега не се бараат понуди за потребната електронска опрема. Тоа ќе се прави по реализацијата на градежните работи, кои треба да почнат на 1 јули и да завршат по две години.

- Криза е и не требаше повторно да се распише огласот. А поголем простор за работа ќе добиеме и затоа што за неколку дена претседателот на државата и неговиот кабинет ќе ја напуштат собраниската зграда - вели пратеникот и поранешен прв човек на парламентот, Стојан Андов.Од кабинетот на претседателот на собранието Трајко Вељановски велат дека Владата при неодамнешниот ребаланс на буџетот не предвидела измени во средствата за оваа намена и затоа јавниот оглас е пак распишан. Останува порано даденото објаснување на првиот парламентарец дека сумата за изградбата нема да се плаќа наеднаш, туку и во наредните две буџетски години.

Поништувањето на претходниот оглас пратениците од опозицијата го коментираа како предизборно манипулирање на граѓаните. Тие повикуваат навистина да се стопира проектот, а парите да се искористат за ублажување на кризата. Од парламентарното мнозинство и понатаму со истиот став дека со надградбата на собранието градежниците ќе добијат работа, а сите народни избраници - добри работни услови.

Пропадна тендерот за куполите на Собранието

Изградба на трите куполи на зградата на Собранието, која се најавуваше за по изборите, е одложена на неопределено време. Тендерот за надградба на парламентот пропаднал, од законодавниот дом најавуваат дека ќе има нов, но не се знае кога ќе биде распишан.

Секретарот на Собранието, Жарко Денковски, ни потврди дека не е избрана ниту една од трите фирми кои конкурирале на тендерот: „Бетон“, „Гранит“ и „Конструктор“ од Сплит“ и дека конкурсот ќе се повтори. Денковски не знаеше детали зошто не е направен избор, само кусо ни кажа дека „фирмите имале несоодветни спецификации за цените што ги понудиле“.

Проектот за изградба на куполи - една огромна централна и две странични, владејачката ВМРО-ДПМНЕ го турка уште од преземањето на власта во 2006 година. Идејата за реконструкција на парламентот пред речиси три години ја пласираше тогашниот спикер Љубиша Георгиевски, а беше протуркана во Собранието како решение за просторните проблеми на пратениците. Фирмите кои аплицираа на првиот конкурс за надградба на парламентот понудија: „Бетон“ - 16,7 милиони евра, „Гранит“ - 17,6 милиони евра и „Конструктор“ од Сплит - 14,4 милиони евра. Во буџетот за годинава, пак, за изградба на куполите се предвидени околу 100 милиони денари (1,5 милиони евра).

Денковски неодамна во изјава за „Утрински“ рече дека „тоа е голема градежна интервенција што ќе опфати три буџетски години, планирано е да почне годинава, но сигурно ќе се гради најмалку три години“.

Стручната јавност жестоко ја критикуваше идејата за изградба на куполи на парламентот која се смета за најскапа инвестиција од буџетски средства. Експертите се убедени дека надградбата на Собранието немаше да чини толку да не беа куполите кои ќе се прават од метална конструкција со специјално стакло со кружни форми. (О.В.)