Авиокомпании и линии

Нов „боинг“ во флотата на МАТ

Новиот авион „боинг 737-500“, кој од неодамна е дел од флотата на македонскиот национален авиопревозник МАТ, вчера на аеродромот „Александар Велики“ ги донесе првите патници. На „боингот“, како што најавуваат од МАТ, за десетина дена ќе му се придружи уште еден ист авион, а двата авиона веднаш ќе бидат вклучени во редовните и чартер-летовите на МАТ.

Новите авиони компанијата ги набави со кредит од Еуростандард банка и од странска банка, а ќе се отплатуваат во следните пет години. Во план, велат во МАТ, е купување на уште еден авион од типот „бомбардир ЦРЈ 900“, каков што веќе поседува компанијата, кој моментно е во процес на производство, а ќе биде испорачан во текот на мај следната година. (С.Н.)

КОРЕКЦИЈА НА ЦЕНОВНИКОТ ЗА АЕРОДРОМСКИТЕ УСЛУГИ

Попуст за авиокомпании со два дневни лета

Поевтинувањето на цените за опслужување на двата аеродроми го зголемија бројот на превезени патници

Ќе се корегира ценовникот за услугите на двата домашни аеродроми. Аеродромските власти имаат намера да овозможат поголеми попусти за оние авиокомпании што ќе воведат втор дневен лет кон Скопскиот аеродром. Со летниот ред на летање што стартуваше од 30 март, втор дневен лет воспоставија Адрија Ервејз и Малев.

- Некои компании бараат да летаат во утринските часови кога има ограничена услуга и капацитет. Поголеми поволности ќе им дадеме на оние превозници што ќе прифатат да летаат во термините по 8 или 9 часот. Со ваквите стимулации сакаме авиокомпаниите да го зголемат обемот на сообраќај од Скопскиот и Охридскиот аеродром - појаснува Крстевски.

Доколку Владата го одобри ценовникот, тоа ќе биде трета корекција што ќе се направи за една година. Во средината на април 2007 година, аеродромските услуги на Скопскиот аеродром беа намалени до 17 проценти, а на Охридскиот до 27 отсто. Еден месец подоцна власта го корегира надоместокот што странските авиокомпании го плаќаат за лендинг, АТЦ-услуги и за осветление на аеродромот Александар Велики, а за истите услуги на охридскиот се ослободени од плаќање.
Ефектите од поевтинување на цените за опслужување на двата аеродроми се видливи. Забележливо е зголемување на авиосообраќајот и на бројот на превезени патници.

- Ако во првите три месеци од годинава сообраќајот во ЕУ просечно пораснал за четири проценти, на Скопскиот аеродром е над 10 отсто, а само минатиот месец - 17,5 проценти. Ова е поради тоа што се појавија нискобуџетски компании, како бугарската Булгар Ер која од Софија лета кон Македонија три пати неделно и има има врзан лет до Тирана преку Скопје. Нејзините авиобилети се многу евтини и за 100 евра може да се стигне до било која атрактивна европска дестинација - вели Крстевски.

Се преговара и со познатата нискобуџетска унгарска компанија Виз Ер со која се дефинирани условите за летање кон Охридскиот аеродром. Има најави за повеќе чартер летови за во летниот период.

Виена топ дестинација
Во периодот јануари-март годинава на Александар Велики биле обавени 2.869 летови и се превезени 129.087 патници. МАТ учествува со 24 проценти во вкупниот број комерцијални операции, а во бројот на патници со 32,8 отсто.

Со 15,8 проценти од вкупниот број на патници, Виена се зацврсти како топ дестинација, пред Цирих каде има намалување од 12,4 отсто во однос на лани. Намалување има и кај германските дестинации Дизелдорф и Хамбург/Берлин кое донекаде го надополнува новата дестинација Келн. Најголем пораст има кај Љубљана, Загреб, Будимпешта, Истанбул и Рим кои како трасфер дестинации ги презедоа патниците на Алиталија која престана да лета кон Македонија. Гледано по превозници, најголем пораст на бројот на патници во однос на лани има кај Адрија Ервејз - 85 проценти и кај Кроација Ерлајнс (43,3 отсто), а намалување има само Хелветик Ервејз.